Read lubukusu Khur. 29 Bible Online

Khur. 29 - lubukusu bible

Khur. 29

¹“Elino nilio okhoyeele okholeele Aruni ne babaana bewe khubaaula bakholele nga basaayi. Bukula euunwa ndala endoro ne kamamiiku kabili kakhalikhoomo bubi tawe.

²Bukula kumukaati kwe ngaanu kukhalimo limela tawe ne chikeki chiikhalimo limela tawe nicho batubasiisie ne kamafura lundi obukule akhaba ne chipisikuuti chitambamo limela chiaakhilwekho kamafura.

³Ra bioosi mu sikono silala mala obireere alala ne euunwa ne kamamiiku kabili.

⁴“Reera Aruni ne babaana bewe amuliango kwe liiema lie kumuse, obasiinge ne kameechi.

⁵Nio fwara Aruni chingubo che busaayi, ekaanjo, engubo endeeyi eya efodi, ne engubo eye mu sifuba mala omuboe ne lukhoba lwa efodi lulwanabwa mu busicha.

⁶Mufwaare sileemba khu murwe mala okelekhekho limili litakatifu.

⁷Nio bukula kamafura ke khuchukha okachukhe khu murwe kwewe, mala omwaaule.

⁸“Nio reera babaana bewe mala obafwaare chikaanjo.

⁹Baboe chikhoba munda mwabwe mala obafwaare chi kuutwa khu mirwe kiabwe. Ne busaayi buliba bubwabwe khulwa mindali. Mungila yino yaaulilamo Aruni ne basoleeli bewe.

¹⁰“Nio reera euunwa ebweeni we liiema lie kumuse. Aruni ne babaana bewe bare kamakhono kabwe khu murwe kwayo.

¹¹Khonyela euunwa eyo ebweeni wa Wele Omunyali Owa Bioosi, a muliango kwe liiema lie kumuse.

¹²Bukulakho kamalasile ke euunwa khu lwaala lwowo okare khu njika cha alutare. Nio chukha kamalasile karama a sibale sia alutare.

¹³Lundi, bukula kiminawa kikiafuunikha bie munda kioosi, ne abuundu alayi e siini, ne chimbiko chibili ne kiminawa kiacho mala obioselie khu alutare.

¹⁴Ne kakhali yoselia enje we kambi enyama eye euunwa ne lisieelo liayo, ne kamasisie kaayo. Esino sili siianwa sie khumalao bumayaanu.

¹⁵“Bukula lilala khu mamiiku mala oboolele Aruni ne babaana bewe bare kamakhono kabwe khu murwe kwalio.

¹⁶Nio yiira limiiku elio mala obukule kamalasile kaalio okaanyake khu alutare okibotookhelesie.

¹⁷Ne omalile, tonyaka limiiku mu bitonyi. Siinga bie munda bialio bioosi ne binama bialio mala ore alala bitonyi bie chinyama chalio ne kumurwe.

¹⁸ Yoselia limiiku lioosi khu alutare. Sili siianwa sie khukhwosia khu Wele Omunyali Owa Bioosi. Kuli kumuuya kumulayi kwe siianwa sisiosebwe sia Wele Omunyali Owa Bioosi.

¹⁹“Bukula limiiku liliindi, mala oboolele Aruni ne babaana bewe bare kamakhono kabwe khu murwe kwalio.

²⁰Liire, mala obukule kamalasile kaalio malalakho okare khundulo khwe liiru liseecha lia Aruni ne ndulo khwe kamaru ke babaana bewe. Lundi kare khu njala chabwe chikhuumwa cha buli mukhono museecha ne khu njala chabwe chikhuumwa che khu bikele biabwe biseecha. Chukha kamalasile karamire khu alutare okibotookhelesie.

²¹Nio bukula kamalasile malala kaali khu alutare ne kamafura, mala okachukhe khu Aruni ne khu ngubo chewe ne khu baana bewe ne khu ngubo che babaana bewe. Mu ngila yino Aruni, babaana bewe, ne chingubo chabwe balaba batakatifu.

²²“Bukula lundi kamafura ke limiiku ne ke kumusieembe, kamafura, kakafuunikha bie munda, lubeka lulayi lwe siini, chimbiko chibili ne kamafura kacho, ne sinama sie kumukhono kumuseecha. (Khola orio sikila lino lili limiiku lie liliaaula).

²³Bukula kumukaati mulala, ekeeki ndala eye kamafura ne episikuuti ndala khukhwama mu sikono sie kimikaati kikhalimo limela tawe kiili ebweeni wa Wele Omunyali Owa Bioosi.

²⁴Elesia Aruni ne babaana bewe bibiindu bino bioosi mala obaboolele babiaane nga biianwa khwise Wele Omunyali Owa Bioosi.

²⁵Nio obibukule khukhwama khu nibo mala obioselie khu alutare khutasa khu biianwa bie khukhwosia. Biaane nga biianwa bie kumuuya kusiimisia ebweeni wa Wele Omunyali Owa Bioosi. Ebino bili biianwa bie khukhwosia khu Wele Omunyali Owa Bioosi.

²⁶“Bukula enyama eye lituru eye limiiku lie liliaaula lia Aruni mala okiaane khu Wele Omunyali Owa Bioosi. Sitonyi sino silaba sisiowo.

²⁷“Ne bukula enyama eye lituru ne sinama sie limiiku bibiarumikhirwa khuura Aruni ne babaana bewe mu wakifu khuuba basaayi. Bitonyi bino bilaba bibiabwe.

²⁸Ebino bikhabe bitonyi bia Aruni ne basoleeli bewe buli lwosi khukhwama khu baandu ba Isiraeli. Kaliba kario sikila bitonyi bie basaayi bikhoya biianwa ne Baisiraeli khukhwama khu biianwa biabwe bie kumuleembe. Ebino bili biianwa biabwe khu Wele Omunyali Owa Bioosi.

²⁹“Chingubo cha Aruni che busaayi chilirumikhwa ne lisaaye liewe enyuma wewe. Baliefwara ne balikho bachukhwakho kamafura ne balikho baaulwa khuba basaayi.

³⁰Omwana okobola mu bweyaangu bwa Aruni nga omusaayi, akhoya efwaare chingubo echo khulwe chindaalo saba ne engila mu liiema lie kumuse khukhola kimilimo abuundu atakatifu.

³¹“Bukula enyama eye limiiku lie liliaaula mala okiteekhele Abuundu Atakatifu.

³²Aruni ne basoleeli bewe baliile enyama eyo ne kumukaati kuuli mu sikono a muliango kwe liiema lie kumuse.

³³Balalia biianwa bibiarumikhirwa khurusiao bumayaanu bwabwe nio bauulwa mala bakholwa batakatifu. Ne kakhali omundu okundi akhaliakho biianwa bino tawe sikila bili bitakatifu.

³⁴Ne enyama yosi yosi eye liliaaula namwe kumukaati biarama khukhwola kumutikhinyi, mukhoyeele mubioosie. Se bikhoyeele bialiibwa tawe sikila bili bitakatifu.

³⁵“Kholela Aruni ne basoleeli bewe khuloondekhana ne koosi niko ekhulakile. Baaulwe khulwe chindaalo saba.

³⁶Buli endaalo oaane euunwa nga siianwa sie bumayaanu khulwe khurusiao bumayaanu. Lundi aana siianwa sie bumayaanu khulwa alutare ne olikho orusiakho bumayaanu. Nio okichukhekho kamafura mala okiaule.

³⁷Rusia bumayaanu khu alutare khulwe chindaalo saba mala okiaule. Nio alutare elaba endakatifu lukali. Buli siindu sisietiila khu alutare sienyekha sibe sitakatifu.[23]

³⁸“Bino nibio oliaana khu alutare: buli endaalo oliaana kamameeme kabili kaali bukhulu bwe kumwiiko mulala biise bioosi.

³⁹Aana limeeme lilala kumutikhinyi ne liliindi ekolooba.

⁴⁰Ne limeeme linyoa aana ne sikelo silala khwi khumi mu siikula sie bufu bunosie bwe engaanu butubaanisibwe ne kamafura kamalayi ke kumuseituni matiiti mu chuupa. Chukha endali ndiiti mu chuupa nga siianwa.

⁴¹Aana limeeme liliindi ekolooba, mala oliaane ne siianwa sie biakhulia ne sie khunywa. Khola ekolooba bulayi bwene nga ne okhola kumutikhinyi. Siianwa sisiosebwe sili siianwa sie kumuuya kumulayi ebweeni wa Wele Omunyali Owa Bioosi.

⁴²Khulwe biise bioosi bibiicha, siianwa sie khukhwosia sino siikhoya siaanilwe ebweeni wase ese Wele Omunyali Owa Bioosi, amuliango we liiema lie kumuse buli lwosi khulwe chiselukho choosi. Ao niio nja khwakaanana ne nanywe mala ndomalome ne nanywe.

⁴³Lundi ebweeneyo ndiakaanana ne babaandu ba Isiraeli, ne abuundu ao aliaulwa khubirira khu luyali lwase.

⁴⁴Ndiaula liiema lie kumuse ne alutare. Lundi ndiaula Aruni ne ba okhwa Aruni khukhukholela nga basaayi.

⁴⁵Ne ndimenya mu baandu ba Isiraeli, ne nja khuba Wele wabwe.

⁴⁶Balimanya bali Ese ndi Wele Omunyali Owa Bioosi, Wele wabwe owabaamia mu sibala sie Misiri nio embamenyamo. Ese ndi Wele Omunyali Owa Bioosi, Wele wabwe.