Read lubukusu Khur. 3 Bible Online

Khur. 3 - lubukusu bible

Khur. 3

¹Endaalo ndala Musa aba alikho aaya bibiaayo bia Yetiro raraawe omukhwe, owaba omusaayi owa Midiani. Musa aayila bibiaayo lubeka lwe mumbo mwe sichiimi mala ola khu sikulu sitakatifu sia Sinai.

² Malaika owa Wele Omunyali Owa Bioosi amubonekhela mu lumemu lwe kumulilo akari we sichakha. Musa aalola mala abona sichakha ne siburukha kumulilo. Ne kakhali se siaba silikho siya tawe.

³Aaloma ali, “Lekha nisende siimbi mala mbone kamayia kano, siina sikila sichakha ne sikhalikho ne siya tawe!”

⁴Nga Wele Omunyali Owa Bioosi abona Musa ne eseenda siimbi khubona, aamulaanga khukhwama akari we sichakha mala aloma ali, “Musa! Musa!” Musa afukiilila ali, “Yee,”

⁵Wele amuboolela ali, “Okhecha siimbi tawe. Fuula biraaro biowo, sikila abuundu niio wimile ali atakatifu.”

⁶Wele aloma ali, “Ese ndi Wele owe bakuuka bowo, Wele owa Aburahamu, Isaaka, ne Yakobo.” Nio Musa efuuma mumoni mwewe, sikila aria khulola Wele.

⁷Nio Wele Omunyali Owa Bioosi aloma ali, “Naboone linaanisibwa lie babaandu base bali mu Misiri. Lundi nauliile khulila khwabwe nga babemeelesi be kimilimo ne ba bapia siibi. Manyile khunyasiikha khwabwe.

⁸Nekhile asi khubareesia khukhwama khu Bamisiri. Nenya khubarusia mu bunyali bwe Bamisiri. Nenya khubayila mu sibala silayi lundi siili sibalaayi, sibala nisio kamabeele ne bubuukhi biseleetekhanga, sibala sie Bakanaani, Bahiti, Baamori, Baperisi, Bahibi, ne Bayebusi.

⁹Lola nauliile bililo bie babaandu base Baisiraeli, mala naboone nga nilwo Bamisiri ne balikho ba bapia siibi.

¹⁰Yiicha, khurume khu Farao nio oraangirire babaandu base Baisiraeli barure mu Misiri.”

¹¹Ne kakhali Musa akobosia Wele ali, “Ese ndi naanu onyala acha khu Farao mala areera Baisiraeli khukhwama mu Misiri?”

¹²Wele aamukobosia ali, “Nja khuba nawe. Ne sino sicha khuba simanyisio khwiwe sisiekesia sili ese nakhurumire, ne omalile khureera babaandu khukhwama mu Misiri, mukhasaaye ese khu sikulu sino.”

¹³ Nio Musa akobosia Wele ali, “Naaba ne enja khu Baisiraeli mala nababoolela ndi ‘Wele owe bakuuka benywe andumire khwinywe,’ ne bandeeba bali, ‘Lisina liewe bali naanu?’ Mbaboolela ndi siina?”

¹⁴ Wele akobosia Musa ali, “Ese Niise.[6] Boolela Baisiraeli oli, ‘ESE, andumire khwinywe.’ ”

¹⁵Lundi Wele aboolela Musa ali, “Boolela Baisiraeli oli ‘Wele Omunyali Owa Bioosi, Wele owe bakuuka benywe, Wele owa Aburahamu, Isaaka, ne Yakobo, andumire khwinywe.’ Lino nilio lisina liase lia mindali na mindali. Ndimanyikhana ne lisina lino khu selukho choosi.

¹⁶Khoche obuusie basaakhulu Baisiraeli alala mala obaboolele oli, ‘Wele Omunyali Owa Bioosi, Wele owe bakuuka benywe, Wele owa Aburahamu, Isaaka ne Yakobo, ambonekheele. Amboleele ali namuloleelesie mala naboone niko Bamisiri balikho bamukhola.

¹⁷Ne ndikho ndaka ndi enja khumurusia mu butinyu nibwo mulimo mu Misiri, mala emuyile mu sibala nisio kamabeele ne bubuukhi biseleetekhanga, sibala sie Bakanaani, Bahiti, Baamori, Baperisi, Bahibi, ne Bayebusi.’

¹⁸“Basaakhulu be Baisiraeli bacha khu khurekeeresia. Khwako okhoya oche ne basaakhulu be Baisiraeli khu mwami owe Misiri mala omuboolele oli, ‘Wele Omunyali Owa Bioosi, Wele owe Baeburania, akhubonekhele efwe. Nono khukhusaba okhufukiilile khuche lukeendo lwe chindaalo chitaru mu sichiimi khuaanile Wele Omunyali Owa Bioosi Wele wefwe chimbosio.’

¹⁹Manyile ndi omwami owa Misiri se acha khumufukiilila muche ne akhayingiliilwe khukhola ario tawe.

²⁰Ne kakhali enja khurumikhira bunyali bwase mala ndeere siiuukuumo khu Misiri khubirira mu khukhola bibiindu bie liukia ebweeneyo. Enyuma wako acha khu mulekhuula enywe muche.

²¹ “Ndakhola Bamisiri bamukoosie enywe, nio oli babaandu base barekukha, balekhe khucha busa tawe.

²²Buli mukhasi muisiraeli acha khucha khu wasie Omumisiri nende khu buli mukhasi omukwa omenyile munju mwewe mala amusabe chingubo, esahabu ne efwesa. Bamisiri bacha khumuelesia bibiindu bino mala mubielesie babaana benywe basoleeli ne bakhaana. Mulasuta kimiaandu kie Bamisiri muche nakio.”