Read lubukusu Khur. 30 Bible Online

Khur. 30 - lubukusu bible

Khur. 30

¹“Khola alutare khukhwama khu murongooro kumunyaali khulwe khukhwoseliakho bupaani.

²Ekhoya ebe elekhaana bukhiikha ne buleeyi. Bukhiikha bube sikele silala ne buleeyi bwosi sikele silala. Buniina bube bifuba bibili. Bifwaani bie chinjika biayo bikhoya bikholwe khukhwama khu siindu silala ne sia alutare eng'ene.

³Fuunikha khu ngaaki khwayo, chimbeka choosi chine, ne bifwaani bie chinjika biayo ne esahabu yong'ene. Ne kibotookhelesie ne kumutiindi kwe sahabu.

⁴Khola chimbete chibili che esahabu chibe asi we kumutiindi khu mbeka chombi chichaloleelelana cha alutare. Ra kamakhono ako khu ndulo khwe chimbeka chayo chibili khutiila chinguulo nicho basutila.

⁵Khola chinguulo chibe che kumurongooro kumunyaali mala ochifuunikhe ne sahabu.

⁶Ra alutare eyo ebweeni we neti eeli siimbi ne Lisanduku lie Ndakaano. Ekhoya ebe ebweeni we endebe eye siisa, eli khu lisanduku lie Ndakaano. Abweene ao niio ndiakaanana ne nanywe.

⁷Aruni alioseliangakho bupaani bwe kumuuya kumulayi buli kumutikhinyi ne acha khurekekha chitaa.

⁸Akhoya akhole ario ne alikho ne aambia chitaa ekolooba. Siaanwa sie bupaani buno bukhoya bwachiililila ebweeni wa Wele Omunyali Owa Bioosi mu selukho chenywe choosi.

⁹Okhaanila khu alutare yino biiunya bulayi biikhali bitakatifu tawe, siakhaba siianwa sie khukhwosia, namwe sie biakhulia. Ne okhakichukhakho kamalwa kosi kosi tawe.

¹⁰Aruni akhakhole siianwa sirusiao bumayaanu lulala khu mwiiko. Akhaane siianwa sirusiao bumayaanu khulwe khurumikhira kamalasile ke siianwa sie khurusiao bumayaanu. Elino likhoya liekholekha buli mwiiko mu selukho chenywe choosi. Alutare yino eli endakatifu lukali khu Wele Omunyali Owa Bioosi.”

¹¹Wele Omunyali Owa Bioosi aboolela Musa ali,

¹²“Ne olikho ne obala babaandu ba Isiraeli, buli mundu akhoya anduunge kumuruungo khulwe bulamu bwewe. Bakhole bario nio butinyu bulekhe khubechakho ne olikho obabala tawe.

¹³ Buli mundu obalwa akhoya aruunge enusu eye sitonyi sie eshekeli khuloondekhana ne sikelo sie Abuundu Atakatifu, ne nusu eye sitonyi sie eshekeli silala nga siianwa khu Wele Omunyali Owa Bioosi.

¹⁴Buli mundu obala mu libalwa, oli ne bukhulu bwe kimiiko kamakhumi kabili ne khukhilakhoo, aliaana siianwa sia Wele Omunyali Owa Bioosi.

¹⁵Omundu omuiinda se aruunga khutuumao enusu eye shekeli tawe. Ne omutaambi se aruunga asi we nusu eye shekeli ta, ne balikho ne baruunga biianwa bino khulwe bulamu bwabwe.

¹⁶Bukula chirupia che khurusiao bumayaanu khukhwama khu baandu ba Isiraeli mala ochaule khulwe kimilimo kie liiema lie kumuse. Busuuru buno bucha khuba likhebulila khulwe Baisiraeli ebweeni wa Wele Omunyali Owa Bioosi nio berusiekho bumayaanu.”

¹⁷Wele Omunyali Owa Bioosi aboolela Musa ali,

¹⁸ “Khola lulweelo lwe kumukasa ne bibale bialwo bie kumukasa khulwe khukhwisiinga. Lure akari we liiema lie kumuse ne alutare, mala oluchukhekho kameechi.

¹⁹Aruni ne babaana bewe balirumikhira kameechi ako khusaaba kamakhono ne khusiinga bikele biabwe.

²⁰Bakhesiinge ne bengila mu liiema lie kumuse namwe ne bembiisia alutare khukhola kimilimo nga kie khukhwosia biiunya bulayi ne busa bafwa.

²¹Bakhoyeele basaabe kamakhono kabwe ne khusiinga bikele biabwe, nio balekhe khufwa tawe. Elino lili lilaka lia mindali khu Aruni ne lisaaye liewe khulwe chiselukho chichiicha choosi.”

²² Wele Omunyali Owa Bioosi lundi aboolela Musa ali,

²³“Bukula biiunya bulayi binosie. Bibe chishekeli chimia chiraano che kamafura ka manemane, bibiindu biiunya bulayi khukhwama khu murongooro kumudalasini bibioola chishekeli chimia chibili ne kamakhumi karaano, ne biiunya bulayi bie kumwiba kumunulu bioosi chishekeli chimia chibili ne kamakhumi karaano.

²⁴Bukula akhaba kamoola ke kumurongooro kwa kida kaunya bulayi chishekeli chimia chiraano. Bino bioosi bikelwe khuloondekhana ne bikelo bie Abuundu Atakatifu. Tasakho kamafura ke kumuseituni chichupa chiraano.

²⁵Nio khola khukhwama mu bino kamafura kamaule ke khuchukha, kamafura katubanisibwe mu busicha.

²⁶Nio ochukhe kamafura ako khu liiema lie kumuse ne lisanduku lie Ndakaano.

²⁷Chukha kamafura ako khu mesa ne bibiindu biayo bioosi, khu siteetwe sie etaa ne bibiindu biasio bioosi, ne khu alutare eye khukhwosia bibiindu biiunya bulayi.

²⁸Lundi chukha kamafura ako khu alutare eye biiunya bulayi ne alutare eye biianwa bie khukhwosia ne bibiindu biayo bioosi alala ne lulweelo ne sibale sialwo.

²⁹Yaula bibiindu bino nio bibe bitakatifu lukali. Siosi siosi sibietisiakho sikhoya sibe sitakatifu.[24]

³⁰Ne chukha khu Aruni ne khu baana bewe kamafura nio bakholele nga basaayi.

³¹Ne boolela babaandu ba Isiraeli oli, ‘Kano niko kamafura kase kamatakatifu ke khuchukha mu selukho chenywe chichiicha choosi.

³²Mukhakachukha khu baandu busa tawe, lundi mukharumikhirakho engila ng'eneyo khukhola kamafura kosi kosi tawe. Kali kamafura kamatakatifu ne kakhoya kabukulibwe khuuba kamatakatafu khwinywe buli lwoosi.

³³Yesi yesi okholakho kamafura nga ako kario namwe yesi yesi olikachukha khu mukwa akhanjukhwe ne babaandu bewe.’ ”

³⁴Wele Omunyali Owa Bioosi aboolela Musa ali, “Bukula bibiindu biiunya bulayi lukano na lukano mala obitubaasie mu bikelo bilekhaana.

³⁵Khola bibiindu biiunya bulayi bibiatubaanisibwa mu busicha. Tasamo kumuunyu kubikhole khuba bimiliiu lundi bitakatifu.

³⁶Chunga bilala bibe binosie mala obire ebweeni we lisanduku lie Ndakaano mu liiema lie kumuse, nimwo ndiakaananila ne nanywe. Bikhoya biaba bitakatifu elala khwinywe.

³⁷Mukhang'oona biiunya bulayi bienywe mwabeene khulwe khurumikhira engila niyo emwekesie yino tawe. Bukula engila yino khuuba endakatifu khu Wele Omunyali Owa Bioosi.

³⁸Omundu yesi yesi aaba ne akhola bioosi biili nga nibio mala abirumikhira nga biiunya bulayi bie khukhwiakha acha khwanjukhwa ne babaandu bewe.”