Read lubukusu Khur. 31 Bible Online

Khur. 31 - lubukusu bible

Khur. 31

¹Wele Omunyali Owa Bioosi aboolela Musa ali,

²“Lola, naroboore Besaleli, okhwa Uri lundi omwichukhulu owa Huri, khukhwama mu kholo ya Yuda.

³Ne namwichuusie ne Roho[25] owa Wele. Namuele kamaani, bukesi, limanya, ne busicha bwe khukhola kumulimo kwa buli lukano.

⁴Namukholile endio nio anyale khukhola bibiindu mu busicha khukhwama mu sahabu, efwesa, ne kumukasa.

⁵Lundi khulwe khukhalaka kamabaale ke khurekekha, khulwe khubeecha kimirongooro, ne khulwe khukhola kimilimo chingano choosi.

⁶Naroboore akhaba Oholiabu okhwa Ahisamaki, khukhwama mu kholo eya Dani, khukhola ne naye. Lundi naelesie akhaba babaandu babaandi boosi basicha kamaani nio banyale khukhola bioosi nibio namulaka.

⁷Balakhola liiema lie kumuse, Lisanduku lie Ndakaano ne ndebe eyayo eye siisa, ne bibiindu bioosi bie mu liiema.

⁸Bakhakhole akhaba emesa ne bibiindu biayo, siteetwe sie sahabu yong'ene ne bibiindu biasio bioosi ne alutare eye bibiindu biiunya bulayi.

⁹Lundi bakhakhole alutare eye biianwa bie khukhwosia ne bibiindu biayo bioosi, lulweelo ne sibale sialwo,

¹⁰chingubo chindakatifu chichanabwa bulayi khulwa Aruni ne khulwe babaana bewe nga basaayi,

¹¹kamafura ke khuchukha, ne bibiindu biiunya bulayi khulwe Abuundu Atakatifu. Bakhakhole khuloondekhana nga ne namulaka enywe.”

¹²Wele Omunyali Owa Bioosi alaka Musa ali,

¹³“Boolela babaandu ba Isiraeli oli ‘Liinda chindaalo chase che Sabato, sikila eli simanyisio akari wenywe ne nase khulwe chiselukho chenywe choosi, nio mumanye muli ese, Wele Omunyali Owa Bioosi namutakaasile enywe.

¹⁴Liinda e Sabato, sikila eli endakatifu khwinywe. Omundu yesi yesi okhakiliinda tawe, akhoya erwe. Yesi yesi okhola kimilimo khu ndaalo ng'eneyo, akhoya anjukhwa khukhwama mu baandu bewe.

¹⁵ Khola kimilimo kienywe khu ndaalo sita, ne endaalo eya saba eli endaalo eya sabato eye khuola eli endakatifu khu Wele Omunyali Owa Bioosi. Yesi yesi okhola kimilimo mu ndaalo eya sabato akheerwe.

¹⁶Khwako babaandu ba Isiraeli bakhoya baliinde endaalo eya sabato mala bakikhole ebe likhebulila mu selukho chabwe choosi nga endakaano echiililila.

¹⁷ Sili simanyisio sia mindali akari wase ne babaandu ba Isiraeli sili, khu ndaalo sita Wele Omunyali Owa Bioosi akhola likulu ne liloba. Ne khu ndaalo eya saba alekha kimilimo mala aola.’ ”

¹⁸Nga Wele Omunyali Owa Bioosi ne amala khulomaloma ne Musa khu sikulu sia Sinai, amuelesia kamabaale kabili ke kamalaka kakaandikwa ne lulwala lwa Wele.