Read lubukusu Khur. 32 Bible Online

Khur. 32 - lubukusu bible

Khur. 32

¹ Babaandu nga ne babona bali Musa aaiyiliile khukhwiikha khukhwama khu sikulu, babuusiana alala khu Aruni mala bamuboolela bali, “Yiicha okhukholele bawele[26] bakhwimelele. Ne omundu Musa yuno owakhureera efwe khukhwama e Misiri, se khunyala khwamanya kamwekholekhekho tawe.”

²Aruni ababoolela ali, “Bukula bipalakasa bie sahabu nibio bakhasi benywe, babaana benywe be sisoleeli, nende be siikhaana befwarire khu maru, mala mundereere.”

³Nono babaandu boosi, babukula bipalakasa biabwe bie sahabu bibiaba khu maru kabwe mala bareerera Aruni.

⁴ Aruni abukula bipalakasa, abiyenguusia, achukha esahabu akiroka, mala akhola emoosi euunwa eye sahabu. Babaandu baloma bali, “Ee Isiraeli, Oyuno niye wele wenywe, owamurusia enywe khukhwama mu sibala sie Misiri!”

⁵Nio Aruni nga ne abona kano, ombakha alutare ebweeni we euunwa eye esahabu mala alaangilila ali, “Kumuchuli naikara eya Wele Omunyali Owa Bioosi ekhabeo.”

⁶ Babaandu benyokha kumutikhinyi makhelebeende mala baana biianwa bie khukhwosia nende bie kimileembe. Babaandu bekhala asi khulia ne khunywa mala benyokha bakhina.

⁷Wele Omunyali Owa Bioosi aboolela Musa ali, “Yiikha asi, sikila babaandu bowo, nibo warusia khukhwama e Misiri, bakholile bumayaanu.

⁸Balekhile khaangu engila niyo nabalaka khu kiloonda. Bekholeele emoosi khukhwama khu sahabu eyenguukhe mala bakisaayile niyo lundi bakiaaniile niyo embosio. Balikho baloma bali, ‘Oyuno niye wele wenywe, ee Isiraeli owamurusia enywe khukhwama mu sibala sie Misiri!’

⁹Ese naboone babaandu bano ne lola bali babaluma emirwe.

¹⁰Nono khwako, ndekhe seng'ene mala lirima liase libe likali khu nibo mala mbabunie. Ne kakhali endakhola lisaaye liowo libe likali.”

¹¹ Ne kakhali Musa ekoonjelela Wele Omunyali Owa Bioosi, Wele wewe ne aloma ali, “Ee Wele Omunyali Owa Bioosi, sikila siina ne oli ne lirima likali khu baandu bowo nibo warusia khukhwama mu sibala sie Misiri ne bunyali bukali ne kamaani?

¹²Bamisiri bakhakhola bario baloma bali ‘Wele Omunyali Owa Bioosi aba ne sifuno simayaanu sie khusikula babaandu bewe. Abasikula nio abeerere mu bikulu mala ababunisilie elala khukhwama khu sibala.’ Lekha khukhalala. Yebiiya lilibaasia liowo lie kamabi lino mala okhareera butinyu khu baandu bowo tawe.

¹³ Khebulila bakholi bowo Aburahamu, Isaaka, ne Yakobo. Khebulila liliechuba nilio wamweene wabaelesia mala wababoolela oli, ‘Ekhatase lisaaye lienywe likuche libe nga ching'enieesi ne khulielesia kamaloba kabe kumukabwa kwabwe mindali na mindali.’ ”

¹⁴Nio Wele Omunyali Owa Bioosi ebiiya butinyu nibwo aba ne ebaasia khukholela babaandu bewe.

¹⁵Ne Musa ayuukha ekha khukhwama khu sikulu, ne asutile kamabaale kabili kakaandikwakho kamalaka chimbeka chombi.

¹⁶Wele omwene akhola kamabaale mala aandikakho kamalaka.

¹⁷Nga Yoshua ne aulila babaandu ne bayokela, aboolela Musa ali, “Luyoka lwe liie luli mu kambi.”

¹⁸Ne kakhali Musa aloma ali, “Se nauliile kumumilo kwe luyoka lwe bukhili namwe kwe lilila lie khuulwa tawe, ne kakhali nauliile luyoka lwe khukhwimba.”

¹⁹Ne nga Musa ne embiya ekambi busa ari mala abona emoosi ne babaandu balikho bakhina, lirima liamubamo likali. Amwaata kamabaale ke kamalaka niko aba ne asutile mala akaarira mu maayo mwe sikulu.

²⁰Abukula euunwa niyo baba ne bakholile, akiosia, akisia yaba nga bufu mala abuchukha mu meechi. Nio akhola babaandu ba Isiraeli banywa kameechi ako.

²¹Musa areeba Aruni ali, “Babaandu bano bakhukholela siina, nio ewe wabakhola bakhola bumayaanu bukali buno?”

²²Aruni amukobosia ali, “Okhaba ne lirima likali khwise tawe Omwami. Ewe omanyile kimiooyo kie babaandu bano nga kierekekha khukhola bumayaanu.

²³Bambooleele ese bali, ‘Khukholele wele onyala akhwimeelela. Efwe se khumanya sisiekholekha khu Musa yuno, omundu owakhurusia efwe khukhwama mu sibala sie Misiri tawe.’

²⁴Ese nabakobosia ndi, ‘Lekha yesi yesi oli ne esahabu akirusie.’ Nono bambelesia mala nakimwaata mu mulilo mala euunwa emoosi yino yamamo.”

²⁵Musa abona ali babaandu balobile khuba asi we bubwimeelesi (Aruni abalekha balobe bubwimeelesi nio baambwe chisoni ebweeni we basiku babwe).

²⁶Nono Musa eema asilibwa sie kambi mala areeba ali, “Naanu oli lubeka lwa Wele Omunyali Owa Bioosi? Yiicha ano.” Balawi boosi bamwebuusiao.

²⁷Ne aboolela Balawi ali, “Wele Omunyali Owa Bioosi, Wele owa Isiraeli aloma ali, ‘Buli mundu abanule embalu yewe mala ache buli mu silibwa mu kambi yoosi mala eere omulebe wewe, omusaale, no wasie.’ ”

²⁸Balawi bakhola bario mala beera babaandu be siseecha ambi chi elefu chitaru endaalo ng'eneyo.

²⁹Musa aboolela Balawi ali, “Endaalo eya luno mweyaule[27] mwabeene nga basaayi mu bukholi bwa Wele Omunyali Owa Bioosi, buli mulala khulwe khukhwira babaana benywe ne bawandaayenywe. Wele Omunyali Owa Bioosi amuelesie ekhabi endaalo yino.”

³⁰Endaalo eyaloondakho Musa aboolela babaandu ali, “Mwakholile bumayaanu bukali. Nono ndikho nja khu Wele Omunyali Owa Bioosi. Wakana nyala nanyoola sibeelwa khulwe bumayaanu bwenywe.”

³¹Nio Musa akobola khu Wele Omunyali Owa Bioosi mala aloma ali, “Babaandu bano bakholile bumayaanu bukali. Bekholeele wele khukhwama khu sahabu.

³² Ne kakhali luno, babeele bumayaanu bwabwe. Ne waaba ne okhababeela tawe, ekhusaba orusie lisina liase nilio wamala khuandika khukhwama mu sitabu nisio waandikamo kamasina ke babaandu bowo.”

³³Ne kakhali Wele Omunyali Owa Bioosi akobosia Musa ali, “Oyo okholile bumayaanu niye lisina liewe licha khurusibwa khukhwama mu sitabu siase.

³⁴Ne kakhali cha oraangirire babaandu bache abuundu niio nakhubooleele. Lola malaika wase acha khubarangirira. Kakhaba kario endaalo ne yoola eye khuaana kumunaanio, ndibaa kumunaanio khulwe bumayaanu bwabwe.”

³⁵Nono Wele Omunyali Owa Bioosi areera butinyu khu baandu, sikila bakhola Aruni abakholela emoosi euunwa eye sahabu.