Read lubukusu Khur. 33 Bible Online

Khur. 33 - lubukusu bible

Khur. 33

¹ Wele Omunyali Owa Bioosi aboolela Musa ali, “Rekukha oche, ewe ne babaandu nibo wareera khukhwama e Misiri. Cha mu sibala nisio nechubila Aburahamu, Isaaka, ne Yakobo. Nababoolela ndi, ‘Ndielesia kamaloba kano lisaaye lienywe.’

²Nja khuruma malaika amurangirile, ne nja khuoonamo Bakanaani, Baamori, Bahiti, Baperisi, Bahibi, ne Bayebusi.

³Cha mu sibala nisio kamabeele ne bubuukhi biseleetekhanga. Ne ese se endacha ne nanywe tawe, sikila muli babaandu babaluma emirwe, khwako ekhola ndio namubunisilia khu ngila.”

⁴Babaandu nga ne baulila kamakhuwa kamabi kano, barakikha khulila mala se befwara kamamili lundi tawe.

⁵Sikila Wele Omunyali Owa Bioosi aba abooleele Musa ali, “Boolela babaandu ba Isiraeli oli, ‘Enywe muli babaandu ba baluma emirwe. Naaba ne nja ne nanywe akhaba khulwe siise, nyala nababunisilia elala. Nono fuula kamamili kenywe nio emanye nisio emukholela.’ ”

⁶Nono babaandu ba Isiraeli se bafwarakho lundi kamamili tawe khukhwama nga ne barura a sikulu sia Sinai, khuchiililila.

⁷Nono buli lwosi Musa abukulanga liiema ne alira enje we kambi, sinaao ne kambi. Alilaanga ali liiema lie kumuse. Buli mundu yesi yesi oyiima Wele Omunyali Owa Bioosi yaba anyala acha mu liiema lie kumuse liliaba enje we kambi.

⁸Musa buli lwosi nga ne achichanga mu liiema, babaandu boosi baba banyala beema a miliango kie kamaeema kabwe mala baloleelela Musa khukhwola nga ne engila mwieema lie kumuse.

⁹Nga Musa ne engilanga mu liiema, lifuumbi liekhaanga asi mala liba a muliango we liiema, ne Wele Omunyali Owa Bioosi alomaloma ne Musa.

¹⁰Ne nga babaandu boosi ne babonanga lifuumbi amuliango kwe liiema lie kumuse, boosi benyokhanga ne basaayila buli omundu amuliango kwe liiema liewe.

¹¹Khwako Wele Omunyali Owa Bioosi alomalomanga ne Musa moni na moni, nga omundu ne alomaloma ne omusaale wewe. Enyuma wako, Musa akobolanga mu kambi. Ne omuyeeti wewe omuele, Yoshua okhwa Nuni se aruranga mu liiema lie kumuse tawe.

¹²Musa alomaloma ne Wele Omunyali Owa Bioosi ali, “Lola ewe wambooleele ese oli ndangirire babaandu bano ne se wambooleele unduma ne naanu tawe. Ne walomile oli umanyile ese ne lisina lundi oli nakhusiimiisie.

¹³Nono khwako ekhusaba, naaba ne ekhusiimisie, mboolele chingila chowo nio ese ekhumanye ewe mala khusiimisie. Lundi khebulila oli ekholo yino eli babaandu bowo.”

¹⁴Nio Wele Omunyali Owa Bioosi aloma ali, “Ese samwene ndacha ne nanywe, mala nja khumuelesia kumuleembe.”

¹⁵Musa aloma ali, “Waaba ewe wamweene ne okhacha ne nafwe tawe, okhakhukhola khwama ano tawe.

¹⁶Sikila lilamanyikhana liriena lili ese ne babaandu bowo khwakhusiimisie ewe? Khucha khwowo ne nafwe khucha khukhwaukhasia efwe khukhwama khu baandu babaandi be khu liloba.”

¹⁷Wele Omunyali Owa Bioosi aboolela Musa ali, “Nisio olomile sino nisio nja khukhola sikila wasiimiisie ese lundi ese ekhumanyile.”

¹⁸Nio Musa asaba ali, “Nosiima, njekesie luyali lwowo.”

¹⁹ Wele Omunyali Owa Bioosi amukobosia ali, “Ese nja khukhola bulayi bwase bwoosi bubire ebweeni wowo, ne bucha khulangilila lisina liase, ‘Wele Omunyali Owa Bioosi.’ Ese khabe ne kumwalaalo khuyo niye nenya khua kumwalaalo ne ekhabe ne siisa khwaabo nibo nenya khukholela siisa.

²⁰Ne kakhali se nja khukhufukiilila obone bubweeni bwase tawe, sikila mbao omundu yesi yesi onyala wambona mala amenya tawe.

²¹Lola aliio abuundu embi ne nase niio onyala weema khu lwanda.

²²Luyali lwase ne lubira, nja khukhura mu lubangaachi lwe lulwanda mala ekhufuunikhe ne kumukhono kwase khukhwola nga ne nja khubira.

²³Nio ndusieo kumukhono kwase, mala ocha khubona kumukoongo kwase ne se ocha khubona bubweeni bwase tawe.”