Read lubukusu Khur. 34 Bible Online

Khur. 34 - lubukusu bible

Khur. 34

¹Wele Omunyali Owa Bioosi aboolela Musa ali, “Choonga kamabaale kabili nga ke khunyoa. Nja khukaandikakho kamakhuwa ka kaaba khu mabaale ke khunyoa niko waraakaka.

²Yirekekha kumutikhinyi mala wiiche niio ndi khu ndeleelwa khwe sikulu sia Sinai.

³Mbao omundu akhaba mulala onyala wecha ne nawe tawe. Ne omundu akhaba mulala akhabonekhakho khu lubeka lwosi lwosi lwe sikulu tawe. Ne kamakheese namwe chikhaafu chosi chosi chikhaayakho khu sikulu tawe.”

⁴Nono Musa achonga kamabaale kabili nga ke khunyoa. Enyokha makhelebeende kumutikhinyi kukwaloondakho akasuta acha nako khu Sikulu sia Sinai, nga Wele Omunyali Owa Bioosi ne amulaka.

⁵Wele Omunyali Owa Bioosi ekhela mu lifuumbi, eema ne Musa ebweeneyo, mala alaangilila lisina liewe, Wele Omunyali Owa Bioosi.[28]

⁶ Wele Omunyali Owa Bioosi abira ebweeni wa Musa ne elaanga ali, “Wele Omunyali Owa Bioosi, Wele Omunyali Owa Bioosi, Wele ooli ne kumwalaalo ne siisa, ookhali ne lirima lia khangu tawe, lundi owe busiime bukali bukhawa tawe ne busuubilwa.

⁷Ekesianga busiime bwewe bukhawa tawe khu selukho chielefu[29] ne khubeela kamabi, bumayaanu ne kamakhiikha. Ne kakhali se acha khulekha khuelesia kumunaanio babaana ne babechukhulu be eselukho eya khataru ne eya khane khulwe bumayaanu bwe bapaapa babwe tawe.”

⁸Musa khangu busa enama asi mala asaaya.

⁹Musa aloma ali, “Ee Wele Omunyali Owa Bioosi, waaba ng'ali ne osiimisibwa ne nase, ekhusaba oche ne nafwe, babaandu bowo bakhaba ne baluma emirwe. Ne khubeele bumayaanu bwefwe ne kamakhiikha, mala okhufukiilile nga babaandu khuuli kumukabwa kwowo.”

¹⁰Wele Omunyali Owa Bioosi aboolela Musa ali, “Ese ndikho ekhola endakaano ne babaandu ba Isiraeli. Nja khukhola bibiindu bie liukia ebweeni we babaandu bowo bisiili khwikholekhakho osi osi khu liloba namwe mu kholo yosi yosi tawe. Babaandu boosi nibo mumenyile nabo balibona bikholwa biase, sikila nja khumukholela enywe sisiindu sie liriisia.

¹¹Loonda kamalaka niko Ese ndikho emuelesia endaalo eya luno. Nja khuoona Baamori, Bakanaani, Bahiti, Baperisi, Bahibi, ne Bayebusi barure ebweeni wenywe.

¹²Yeliinda mukhakhola murio mwakhola endakaano ne bamenywa be mu sibala nimwo muchamo tawe, sikila okuno kunyala kwaba kumureko akari wenywe.

¹³ Mukhatechulake chi alutare chabwe, mufuniakake chinjeko chabwe, mala muremakakile asi bifwaani bia wele wabwe Ashera.

¹⁴“Mukhasaayakho wele okundi tawe, sikila Ese, Wele Omunyali Owa Bioosi, olaangwa bali Likhendekha ndi ne likhendekha.

¹⁵Mukhakhola endakaano ne babaandu be sibala esio tawe. Busa bakhola bario bamulaanga enywe ne balikho besaaya bawele babwe ne khubaanila chimbosio. Nio mukhola murio mwalia chinyama che chimbosio chabwe.

¹⁶Babaana benywe be sisoleeli bakhola bario bakhwa bakhaana babwe. Lundi bakhaana babwe bakhola bario bakhola bueeyani ebweeni we bawele baabwe mala bakhole babaana benywe be sisoleeli basaaye bawele baabwe.

¹⁷ “Okhekholela wele owe sibia tawe.

¹⁸ “Liinda Naikara eye kumukaati kukhalimo limela tawe. Nga ne nakhulaka, lia kumukaati kukhalimo limela ta khu ndaalo saba, mu siise sisiaroborwa mu mweesi kwa khane (Abibu), sikila mu mweesi mwene okwo nimwo mwamilamo e Misiri.

¹⁹ “Buli sibele sili sisiase, siakhaba sie ekhaafu namwe sie likheese.

²⁰ Ne sikula epunda embele ne likheese khulwe khuruunga likheese. Ne waaba ne okhakhola orio mala wakisikula kiborore likosi lifunikhe. Musikule buli omwana owe sisoleeli omubele. “Mbao akhaba mulala obonekha ebweeni wase ne akhali ne siianwa tawe.

²¹ “Khola kimilimo khulwe chindaalo sita. Ne okhakhola kimilimo khu ndaalo eya saba tawe, akhaba ne bili biise bie lilima namwe likesa.

²² “Liinda Naikara eye Bisali ne olikho ne orakikha likesa lie engaanu, ne Naikara eye Likesa kumwiiko ne kulikho kuwa.

²³“Babaandu bowo bakhoya beche banjisaaye Ese, Wele Omunyali Owa Bioosi, Wele owa Isiraeli, khataru buli kumwiiko.

²⁴Ekhatimanie chikholo ebweeni wenywe ne khubalaayisia chinjakha che sibala sienywe. Mbao omundu akhaba mulala ocha khukhwikoomba sibala sienywe mu biise bitaru bie kumwiiko nibio muchilakho ebweeni wa Wele Omunyali Owa Bioosi tawe.

²⁵ “Mukhaana kamafuki ke embosio yase ne siosi siosi silimo limela tawe. Ne embosio eya naikara eye Epasaka ekhalekhwa khukhwola kumutikhinyi tawe.

²⁶ “Reera buli mwiiko munju eya Wele Omunyali Owa Bioosi, Wele wowo bibiaamo biowo binyoa khulaba bie likesa. “Okhateekha limeeme ne likhalukuwa tawe.”

²⁷Wele Omunyali Owa Bioosi aboolela Musa ali, “Andika kamakhuwa kano. Sikila nakholile endakaano ne nawe ne Isiraeli khuloondekhana ne kamakhuwa menako.”

²⁸Musa aba ebweeneyo ne Wele Omunyali Owa Bioosi khulwe chindaalo kamakhumi kane, siilo ne kumuusi ne akhalia namwe ne akhanywa sisiindu siosi siosi tawe. Aandika khu mabaale kamakhuwa ke ndakaano, Kamalaka Likhumi ako.

²⁹ Musa ekha khukhwama khu sikulu sia Sinai ne asutile kamabaale kabili kalikho Kamalaka Likhumi. Bubweeni bwewe bwaba bulikho bukhosia ne se amanya tawe, sikila aba ama khulomaloma ne Wele.

³⁰Aruni ne babaandu boosi ba Isiraeli nga ne balola Musa mala babona bali bubweeni bwewe bwaba bulikho bukhosia, baaria khumwimbiya niio aba.

³¹Ne kakhali Musa abalaanga. Ne Aruni ne babemeelesi boosi be libuusiana bacha niio aba mala Musa alomaloma ne nabo.

³²Enyuma wako, babaandu boosi ba Isiraeli babuusiana niio Musa aba mala abaelesia kamalaka khuloondekhana ne koosi niko Wele Omunyali Owa Bioosi amuboolela khu Sikulu sia Sinai.

³³Musa nga ne amala khulomaloma ne nabo, efuuma bubweeni bwewe ne neti.

³⁴Ne kakhali buli lwosi nga Musa ne engilaanga mu liiema khulomaloma ne Wele Omunyali Owa Bioosi, afuulanga e neti khukhwola nga ne aruranga. Ne nga aruranga enje, aboolelanga babaandu ba Isiraeli buli sisiindu nisio aba ne alakiilwe.

³⁵Baisiraeli babona bali bubweeni bwa Musa bwaba ne bukhosia. Nio Musa afwaraanga e neti lundi khukhwola siise sisiindi nisio achilakho khulomaloma ne Wele Omunyali Owa Bioosi.