Read lubukusu Khur. 35 Bible Online

Khur. 35 - lubukusu bible

Khur. 35

¹Musa abuusia libuusiana lie babaandu ba Isiraeli lioosi alala. Ne ababoolela ali, “Ebino bili bibiindu nibio Wele Omunyali Owa Bioosi amulakile enywe khukhola.

² Muli ne chindaalo sita che khukholelamo kimilimo, ne endaalo eya saba eli endakatifu, eye sabato, eye liola lia Wele Omunyali Owa Bioosi. Omundu yesi yesi okhola kimilimo khu ndaalo ng'eneyo eerwe.

³Mukhabwaanakho kumulilo mu chingo chenywe mu sabato tawe.”

⁴Musa aboolela libuusiana lioosi lie babaandu ba Isiraeli ali, “Elino nilio Wele Omunyali Owa Bioosi alakile.

⁵Buli mulala mwinywe aanile Wele Omunyali Owa Bioosi siianwa. Lekha omundu yesi yesi owe kumwoyo kwe khuaana areere siianwa sia Wele Omunyali Owa Bioosi sie esahabu, efwesa ne kumukasa.

⁶Lundi areere buusi bubuusi, bunapeenda, bubesemu, engubo eya katani eyanabwa bulayi ne bufuumbo bwe chimbusi.

⁷Enyekha lundi areere akhaba engubo eye bufuumbo bwe kamamiiku nibwo baakhile erangi embesemu, kamasieelo ke chimbusi, chimbao che chinyaali.

⁸Lundi areere kamafura ke chitaa, bibiindu bing'ayilisia khulwe mumafura ke khuchukha khu barobore ne khulwe bibiindu biiunya bulayi.

⁹Lundi areere kamabaale ke bukusi ne kamabaale kakaandi ke khurekekha mu efodi ne khulwe engubo eye musifuba.

¹⁰“Lekha buli mundu mwinywe oli omusicha eeche mala akhole koosi niko Wele Omunyali Owa Bioosi alakile.

¹¹Lekha bakhole liiema litakatifu, liiema lialio lie enje ne sifunikho sialio. Lundi bakhole chingaki ne kimitalaachi kialio kimilapa kialio, chinjeko chalio ne bibale bialwo.

¹²Lekha bakhole akhaba lisanduku lie Ndakaano, chinguulo chalio, endebe eye siisa ne lububi lukikhiinga.

¹³Bakhole emesa, chinguulo chayo ne bibiindu biayo bioosi, ne kumukaati kwe khubao khwa Wele Omunyali Owa Bioosi.

¹⁴Lundi siteetwe sie taa khulwe buwaanga ne bibiindu biasio, chitaa chasio ne kamafura khulwe buwaanga.

¹⁵Bakhole alutare eye biiunya bulayi ne chinguulo chayo ne kamafura ke khuchukha khu barobore, biiunya bulayi ne epasia khulwe kumuliango kwe liiema litakatifu.

¹⁶Alutare eye biianwa bie khukhwosia alala ne bitiila bie kumukasa, chinguulo chayo, bibiindu biayo bioosi, enjikha ne sibale siayo.

¹⁷Chipasia che luuya chinjeko chacho ne bibale, ne epasia khulwe silibwa sie luuya bioosi bikholwe.

¹⁸Bitiila liiema litakatifu ne bitiila luuya ne kimikoye kiabio,

¹⁹ne chingubo chichanabwa bulayi nicho basaayi befwara ne balikho bakhola Abuundu Atakatifu, chingubo chindakatifu khulwo Omusaayi Aruni ne khulwe babaana bewe khulwe kimilimo kiabwe nga basaayi.”

²⁰Nio libuusiana lie babaandu ba Isiraeli lioosi liarekukha liarura niio Musa aba.

²¹Buli owaba ne lilienya ne kumwoyo kwe khukhola ario areera siianwa sia Wele Omunyali Owa Bioosi khulwe liiema lie kumuse nende khulwe kimilimo kioosi ne chingubo chindakatifu.

²²Nono babaandu boosi ba baaba ne kumwoyo becha, be siseecha nende be siikhasi. Bareera bipiini, chindeekwe, bipalakasa bie khu maru, chimbete, ne bibiindu bioosi bibiang'oonwa khu sahabu. Buli mundu aana siianwa sie esahabu khu Wele Omunyali Owa Bioosi.

²³Buli yesi yesi owaba ne buusi bubuusi, bunapeenda, namwe bubesemu bwe engubo eya katani eyanabwa bulayi namwe bufuumbo bwe chimbusi, namwe kamasieelo ke kamamiiku namwe kamasieelo ke chimbusi abireera.

²⁴Boosi babanyala khuaana siianwa sie efwesa namwe kumukasa basireera nga siianwa khu Wele Omunyali Owa Bioosi. Ne buli mundu owaba ne kumurongooro kumunyaali kukwanyala khukhola kumulimo kwosi kwosi akureera.

²⁵Ne bakhasi boosi ba baaba ne banyala khukhwokusa ne kamakhono kabwe bareera nibio baba ne bokuuse bie buusi bubuusi, bunapeenda, bubesemu ne bwe engubo eya katani eyanabwa bulayi.

²⁶Lundi bakhasi boosi ba baaba ne kumwoyo kwe khukhola kimilimo bakhola buusi bwe bufuumbo bwe chimbusi.

²⁷Babemeelesi bareera kamabaale kamelamela ne kamabaale kakaandi ke khurekekha khulwe efodi ne khulwe engubo eye mu sifuba.

²⁸Bareera akhaba bing'ayisia bulayi ne kamafura khulwe chitaa, khulwe khuchukha khu barobore ne khulwe bibiindu biiunya kumuuya kumulayi.

²⁹Babaandu boosi ba Isiraeli, be siseecha nende be siikhasi babeenya khureera sisiindu siosi siosi khulwe kimilimo nikio Wele Omunyali Owa Bioosi alaka Musa kiekholekhe, babireera nga biianwa bie khukhwerusia khu Wele Omunyali Owa Bioosi.

³⁰Musa aboolela Baisiraeli ali, “Lola Wele Omunyali Owa Bioosi aroboore Besaleli, okhwa Uri lundi omwichukhulu owa Huri, khukhwama mu kholo eya Yuda.

³¹Ne amwichuusie ne Roho[30] owa Wele, ne sinani, ne bukesi ne limanya khulwe bukholi bwe kimilimo chingano choosi.

³²Anyala akhola bibiindu mu busicha khukhwama khu sahabu, efwesa ne kumukasa.

³³Anyala akhala kamabaale khulwe khurekekha, ne khubeecha kimirongooro, ne khulwe kimilimo chingano choosi.

³⁴Lundi Wele Omunyali Owa Bioosi aelesiisie Besaleli ne Oholiabu okhwa Ahisamaki, khukhwama mu kholo eya Dani, kumukabwa kwe khukhwikisia.

³⁵Abaelesie bukesi bwe khukhola kimilimo chingano choosi nga khuchoonga, khuchoora, khunaba bie buusi bubuusi, buufwaana buseemwa, bubesemu nende bwe engubo eya katani endayi. Banyala khukhola bibiindu bie khurukwa ne kamakhono ne bibiindu bie bufundi.