Read lubukusu Khur. 36 Bible Online

Khur. 36 - lubukusu bible

Khur. 36

¹“Nono Besaleli ne Oholiabu, ne bakholi babaandi boosi nibo Wele Omunyali Owa Bioosi aelesia sinani ne bukesi khumanya khukhola kimilimo khu Lukaangu, balakhola khuloondekhana nende koosi niko Wele Omunyali Owa Bioosi alakile.”

²Musa alaanga Besaleli ne Oholiabu, alala ne bakholi babaandi boosi banyala, nibo Wele Omunyali Owa Bioosi aelesia sinani lundi ba baaba ne kumwoyo kwe khuyeeta, beeche bakhole kimilimo.

³Banyoola khukhwama khu Musa biianwa bie khukhwerusia bioosi nibio Baisiraeli bareera khulwe khukhwombakhila Abuundu Atakatifu. Ne babaandu ba Isiraeli bachiililila khureerera Musa biianwa bie khukhwerusia buli kumutikhinyi.

⁴Nio bakholi be sinani boosi ba baaba ne balikho bakhola kumulimo bacha barura buli mundu khukhwama khu mulimo nikwo aba ne alikho akhola.

⁵Ne baboolela Musa bali, “Babaandu balareeranga khutuumia sikelo sisienyekhana khulwe kumulimo nikwo Wele Omunyali Owa Bioosi alaka khukhola.”

⁶Nono Musa aaana lilaka, mala likhuwa lialaangililwa mu kambi lili, “Mbao omundu owe siseecha namwe owe siikhasi yesi yesi ocha khuaana lundi khulwe liiema litakatifu tawe.” Nio babaandu bakhiingililwa khuaana.

⁷Kaba kario sikila bibiindu nibio bakholi be mu liiema litakatifu baba ne nabio biaba bioola khukhola kimilimo kioosi mala bisikale.

⁸Babaandu boosi ba banyala, bakhola liiema litakatifu. Balikhola khulwe khurumikhira chipasia ekhumi. Chipasia echo chaba chanabwa khukhwama khu ngubo eya katani eyanabwa bulayi ne buusi bubuusi, bunapeenda, bubesemu mala chanabwakho ekerubi mungila eye busicha.

⁹Buleeyi bwa buli epasia bwaba bikele kamakhumi kabili na munaane ne bukhiikha bikele bine. Chipasia choosi chaba chindekhaane buleeyi ne bukhiikha.

¹⁰Banabila alala chipasia chiraano ne chichiindi chiraano bachinabila alala.

¹¹Bakhola chimbete chimbuusi khu likemo lie epasia eye enje khu buli sipupu sie chipasia.

¹²Bakhola chimbete kamakhumi karaano khu pasia chiraano che khunyoa ne chimbete kamakhumi karaano bachibotookhelesia khu pasia che khabili. Chimbete echo chaloleelelana.

¹³Bakhola chingaki che esahabu kamakhumi karaano, nicho baambanisilia chipasia bipupu bibili, buli sipupu khu sindi nio liiema litakatifu liaba busa lilala.

¹⁴Nio bakhola chipasia khukhwama khu bufuumbo bwe chimbusi, khulwe sifuunikho sie liiema litakatifu. Choosi alala chaba chipasia ekhumi na ndala.

¹⁵Buleeyi bwa buli epasia bwaba bikele kamakhumi kataru ne bukhiikha bikele bine. Chipasia ekhumi na ndala echo choosi chaba chilekhaana, buleeyi ne bukhiikha.

¹⁶Banabila alala chipasia chiraano. Lundi chichiindi sita bachinabila alala.

¹⁷Banabila chimbete kamakhumi karaano khu likemo lie epasia eye enje eye chipasia che khunyoa ne chimbete kamakhumi karaano bachinabila khu likemo lie enje lie chipasia che khabili.

¹⁸Ne akhola chingaki kamakhumi karaano che kumukasa khuambanisilia alala liiema litakatifu nio libe lilala.

¹⁹Akholela liiema sifuunikho sie kamasieelo kamabesemu ke kamamiiku ne ke chimbusi.

²⁰Nio akhola kimitalaachi nikio emia khukhwama khu murongooro kumunyaali khulwe liiema litakatifu.

²¹Buli kumutalaachi kwaba buleeyi bikele likhumi ne bukhiikha sikele silala ne enusu.

²²Buli kumutalaachi kwaba ne biaambaania bibili khulwe khuambaania alala. Aakhola ario khu mitalaachi kioosi kie liiema.

²³Eyino niyo engila niyo bakholelamo kimitalaachi kie liiema litakatifu: kimitalaachi kamakhumi kabili kialoleelela lubeka lwe ebunafubo.

²⁴Ne akhola bibale kamakhumi kane bie efwesa asi we kimitalaachi kamakhumi kabili. Bibale bibili biaba asi we kumutalaachi mulala khulwe khutiililila biaambaania bibili. Ne bibale bibiindi bibili biaba asi we kumutalaachi kukuundi.

²⁵Bakhola kimitalaachi kamakhumi kabili lubeka lwe ebunaswa we liiema litakatifu.

²⁶Kimitalaachi kiaba ne bibale biakio kamakhumi kane bie efwesa. Biabao bibale bibili asi owa buli kumutalaachi.

²⁷Ne khulwe enyuma we liiema litakatifu, lubeka lwe mumbo balikholela kimitalaachi sita.

²⁸Bakhola kimitalaachi kibili khulwe chikhuumbo che liiema litakatifu enyuma.

²⁹Kimitalaachi kie mu khuumbo kino kiakabukhanamo asi ne kakhali kiaambaana kiombi mu mukhono kwe khunyoa khucha angaaki. Nono bakhola kimitalaachi kibili khulwe chikoona chibili.

³⁰Khwako kiabao kimitalaachi munaane ne bibale biakio bie efwesa. Biaba bibale likhumi na sita, bibale bibili asi owa buli kumutalaachi.

³¹Bakhola kimilapa kie kimirongooro kiminyaali, kiraano khulwe kimitalaachi kiili khu lubeka lulala lwe liiema,

³²kiraano khulwe kimitalaachi kie lubeka luluundi lwe liiema, ne kiraano luundi khulwe kimitalaachi kie enyuma, lubeka lwe mumbo.

³³Bakhola kumulapa kwe akari kwabira khukhwama khu ndulo khulala khwe liiema litakatifu khukhwola khu luundi.

³⁴Bafuunikha kimitalaachi ne esahabu mala barakho kamakhono ke esahabu khulwe khutiila kimilapa. Akhaba kimilapa kiosi kiafuunikhwa ne esahabu.

³⁵Banaba epasia eye buusi bubuusi, bunapeenda, bubesemu ne engubo eya katani eyanabwa bulayi. Lundi balunabilakho chikerubi mu ngila eye busicha.

³⁶Bakholela epasia eyo chinjeko chine che kimirongooro kiminyaali, mala bakifuunikha ne esahabu. Chingaki che chinjeko chaba che esahabu. Nio bakhola bibale bine bie efwesa bie khurakho chinjeko.

³⁷Lundi bakholela kumuliango kwe liiema epasia. Epasia eyo yanabwa ne buusi bubuusi, bunapeenda ne bubesemu ne engubo endayi eya katani mu bunabi bwe busicha.

³⁸Bakhola chinjeko chiraano khulwe epasia yino ne chingaki chacho. Bafuunikha bimuli ne chimbete chabio ne esahabu. Ne kakhali bibale biacho biraano biaba bie kumukasa.