Read lubukusu Khur. 37 Bible Online

Khur. 37 - lubukusu bible

Khur. 37

¹Besaleli akhola Lisanduku lie ndakaano khukhwama khu murongooro kumunyaali. Buleeyi bwe lisanduku elio bwaba bikele bibili ne enusu, bukhiikha sikele silala ne enusu ne buniina sifuba silala ne enusu.

²Alifuunikha ne esahabu yong'ene mukari ne enje mala alimalilila khu ndulo khwalio ne esahabu alibotookhelesia.

³Arakho kamakhono kane ke esahabu khulwe chikhuumbo chalio. Ara kamakhono kabili buli lubeka.

⁴Alikholela chinguulo che kumurongooro kumunyaali, mala achifuunikha ne esahabu.

⁵Ara chinguulo echo mu makhono ako, kakaba buli lubeka lwe lisanduku khulwe khulisuta.

⁶Akhola sifuunikho sie esahabu yong'ene. Siaba buleeyi bikele bibili ne enusu ne bukhiikha sikele silala ne enusu.

⁷Nio abasa chikerubi chibili che esahabu yong'ene. Chikerubi echo achikhola chibe khu ndulo khwe sifuunikho.

⁸Ekerubi ndala yaba khu ndulo khulala khwe sifuunikho ne ekiindi khu ndulo khukhuundi. Akhola chikerubi chibili echo ne sifuunikho biaba siindu silala.

⁹Chikerubi echo chabalaaya chindaa chacho chafuunikha sifuunikho. Chikerubi chaloleelela sifuunikho. Lundi chaloleelelana.

¹⁰Lundi akhola emesa eye kumurongooro kumunyaali. Buleeyi bwaba bikele bibili, bukhiikha sikele silala ne buniina sifuba silala ne enusu.

¹¹Afuunikha emesa eyo ne esahabu yong'ene mala lundi akimalilila ne esahabu akibotookhelesia.

¹²Akibotookhelesia ne kumutalaachi kuuli bukhiikha sikalabo silala. Amalilila kumutalaachi okwo ne esahabu akubotookhelesia.

¹³Ara khu mesa okhwo kamakhono kane ke esahabu mala akara khu khuumbo chine che bikele biayo bine.

¹⁴Kamakhono kaba siimbi ne kimitalaachi nio katiile chinguulo chisuta emesa.

¹⁵Akhola chinguulo che khusuta emesa khukhwama khu murongooro kumunyaali mala achifuunikha ne esahabu.

¹⁶Ne akholela emesa bibiindu bibienyekha khukhwama khu sahabu yong'ene. Bibiindu ebio biaba: chipwakuli, bibuumba khulwe bibiindu biiunya bulayi, bibuumba ne kimieendo kie khuchukha biianwa bie khunywa.

¹⁷Lundi akhola siteetwe sie taa sie esahabu yong'ene. Sibale siasio ne kumukhono kwayo biakholwa ne esahabu embase. Bikoombe biasio, ne bimuli biasio biaba siindu silala ne sie siteetwe.

¹⁸Chisakia sita chacha khukhwama chimbeka chasio, chitaru khukhwama buli lubeka.

¹⁹Buli lulala musakia sita echo lwabakho bikoombe bitaru bibiakholwa nga bimuli bie kumurongooro alimondi. Buli sikoombe siabakho situumi ne simuli.

²⁰Ne khu siteetwe sie taa khubwene khwabakho bikoombe bine bibiakholwa nga bimuli bie kumurongooro kwa alimondi alala ne bituumi biabio ne bimuli biabio.

²¹Buli asi we chisakia chibili siabakho simuli. Buli simuli siakholwa siaba siindu silala ne lusakia.

²²Bimuli, chisakia, ne siteetwe sie taa bioosi biaba biakholwa khukhwama khu siindu silala. Bioosi biaba biakholwa ne bubasi bwe esahabu yong'ene.

²³Akhola chitaa saba khulwe siteetwe mala akhola chindaambi chayo ne chisahani chayo che esahabu yong'ene.

²⁴Akhola siteetwe sie taa ne bibiindu biasio bioosi khulwe khurumikhira chikiilo kamakhumi kataru na chiraano che esahabu yong'ene.

²⁵Akhola alutare khukhwama khu murongooro kumunyaali, khulwe khukhwoseliakho biiunya bulayi. Yaba elekhaana buleeyi ne bukhiikha. Buleeyi bwayo bwaba sikele silala ne bukhiikha bwayo bwaba sikele silala. Buniina bwayo bwaba bifuba bibili. Bifwaani bie chinjika biayo biaba biakholwa khukhwama khu siindu silala ne nayo.

²⁶Afuunikha khu ngaaki khwayo, chimbeka choosi chine, ne bifwaani bie chinjika biasio ne esahabu yong'ene mala amalilila esahabu khu ndulo khwayo asibotookhelesia.

²⁷Akhola kamakhono kabili ke esahabu mala akara asi we bumalilile bwe sahabu. Kamakhono ako akakhola khu mbeka chibili cha alutare kaloleelelana. Kamakhono ako kaba ke chinguulo khulwe khusuta alutare.

²⁸Akhola chinguulo che kumurongooro kumunyaali mala achifuunikhila esahabu.

²⁹ Akhola akhaba kamafura kamatakatifu ke khuchukha khu barobore ne biiunya bulayi binosie. Abikhola nga omundu otubaanisia kamafura kaunya bulayi.