Read lubukusu Khur. 38 Bible Online

Khur. 38 - lubukusu bible

Khur. 38

¹Akhola alutare khukhwama khu murongooro kumunyaali khulwe biianwa bie khukhwosia. Alutare eyo yaba elekhaana buleeyi ne bukhiikha: Buleeyi bwaba bikele biraano, bukhiikha bikele biraano, ne buniina bifuba bitaru.

²Akikholela chinjika khu khuumbo chayo chine mala achifuunikha ne kumukasa. Chinjika chayo chakholwa chaba siindu silala ne alutare.

³Akhola bibiindu bioosi khulwa alutare eyo: Akhola chinyuungu, chimbako, bibuumba, chiuma, ne chinjo. Bibiindu bino bioosi biakholwa khukhwama khu mukasa.

⁴Akhola lutimba lwe kumukasa lubalaayi asi we sibale sia alutare abotookhelesia sibale. Lutimba lwoola akari wa alutare khukhwama asi.

⁵Akhola kamakhono kane khu khuumbo chine che epasia che kumukasa. Kamakhono ako kaba ke khutiila chinguulo che khusuta alutare.

⁶Akhola chinguulo echo khukhwama khu murongooro kumunyaali mala achifuunikha ne kumukasa.

⁷Ara chinguulo mu makhono ke mukhuumbo cha alutare nio chisute alutare. Akhola alutare eye chimbao mala mukari mwayo mwalaangilila busa.

⁸ Akhola sibuumba sie kumukasa. Sibale siayo siosi siaba sie kumukasa. Arumikhira kumukasa khukhwama mu bikiio bie bakhasi babakholanga kimilimo a muliango kwe liiema lie kumuse.

⁹Akhola lumako lwe liiema. Lubeka lwe ebunafubo arayo chipasia che engubo eya katani endayi. Engubo eyo yaba yoola bikele emia ndala buleeyi.

¹⁰Chinjeko chacho chaba kamakhumi kabili ne akhaba bibale biacho bioosi biaba kamakhumi kabili. Chinjeko echo ne bibale biaba biakholwa khukhwama khu mukasa. Ne chikhali chingaki che chinjeko ne kimitiindi biaba biakholwa khukhwama khu fwesa.

¹¹Lubeka lwe ebunaswa lwosi arayo chipasia buleeyi bikele emia ndala. Chinjeko chacho chaba kamakhumi kabili. Bibale bioosi biaba kamakhumi kabili. Chinjeko ne bibale biaba bie kumukasa. Ne chingaki chacho ne chinjeko ne kimitiindi biaba bie efwesa.

¹²Lubeka lwe mumbo chabayo chipasia buleeyi bikele kamakhumi karaano. Chinjeko chacho chaba likhumi ne bibale likhumi. Chingaki che chinjeko ne kimitiindi biaba bie efwesa.

¹³Lubeka lwe bukwe lwaba buleeyi bikele kamakhumi karaano.

¹⁴Chipasia lubeka lulala lwe silibwa chaba buleeyi bikele likhumi na biraano ne chinjeko chitaru ne bibale bitaru.

¹⁵Akhaba lubeka luluundi lwe silibwa lwosi lwaba lurio: chipasia chaba buleeyi bikele likhumi na biraano ne chinjeko chitaru ne bibale bitaru.

¹⁶Chipasia choosi chichabotookhelesia lumako chaba che engubo eya katani eyanabwa bulayi.

¹⁷Bibale bie chinjeko biaba bie kumukasa. Ne chikhali chingaki che chinjeko ne kimitiindi kiacho biaba bie efwesa. Ne bituumi bie chinjeko bioosi biafuunikhwa ne efwesa. Chinjeko che lumako choosi chaba ne kimitiindi kie efwesa.

¹⁸Epasia eye silibwa sie lumako yaba yanabwa ne buusi bubuusi, bunapeenda ne bubesemu ne bwe engubo eya katani endayi. Epasia eyo yaba eye buleeyi bikele kamakhumi kabili ne buniina bifuba biraano. Buniina bwe epasia eyo bwalekhaana ne buniina bwe chipasia che lumako lwe liiema litakatifu.

¹⁹Epasia eyo yaba ne chinjeko chine ne bibale biacho bine bie kumukasa. Chingaki ne kimitiindi biaba bie efwesa. Ne bituumi biafuunikhwa ne efwesa.

²⁰Biaambania bioosi bie mu liiema ne chipasia che lumako choosi khubotookhelela biaba bie kumukasa.

²¹Ebino nibio bibiindu bibiarumikhwa mu liiema litakatifu. Biabalwa khubirira khu lilaka lia Musa khulwe kimilimo kie Balawi. Balawi bemeelelwa ne Itamari okhwa Aruni omusaayi.

²²Besaleli okhwa Uri lundi omwichukhulu owa Huri, khukhwama mu kholo eya Yuda, akhola koosi niko Wele Omunyali Owa Bioosi alaka Musa.

²³Ne Oholiabu okhwa Ahisamaki, khukhwama mu kholo eya Dani aba omuyeeti wewe. Oholiabu aba anyala akhola bibiindu khukhwama khu buusi bubuusi ne bunapeenda ne bubesemu ne akhaba bwe chingubo cha katani chindayi.

²⁴Esahabu yoosi eyaanwa khulwe khurumikha khukhola kimilimo kioosi kie liiema litakatifu yakelwa. Yaba yoosi alala bitonyi kamakhumi kabili na tisa ne chishekeli chimia saba ne kamakhumi kataru. Yakelwa khuloondekhana ne bikelo bie Abuundu Atakatifu.

²⁵ Ne efwesa yaama mu libuusiana lie babaandu ba babalwa. Yoosi yaba bitonyi emia ndala ne chishekeli eelefu ndala ne chimia saba ne kamakhumi saba na chiraano. Efwesa yosi yakelwa khuloondekhana ne bikelo bie Abuundu Atakatifu.

²⁶ Buli mundu arusia enusu eye eshekeli khuloondekhana ne bikelo bie Abuundu Atakatifu. Babaandu boosi babalwa khukhwama khu bukhulu bwe kimiiko kamakhumi kabili ne khuniina. Baba boosi alala babaandu chielefu chimia sita na chitaru, ne chimia chiraano ne kamakhumi karaano.

²⁷Bitonyi bie efwesa emia ndala biarumikhwa khulwe khura bibale Abuundu Atakatifu ne bibale bie lububi. Buli sitonyi silala siaba khulwe sibale, nio biaba bitonyi emia khulwe bibale emia ndala.

²⁸Ne akhola chingaki che chinjeko, afuunikha bituumi biacho ne khuchikholela kimitiindi khulwe khurumikhira chishekeli chimia saba ne kamakhumi saba na chiraano.

²⁹Kumukasa nikwo bareera kwaba busiro bitonyi kamakhumi saba ne chishekeli chielefu chibili ne chimia chine.

³⁰Arumikhira kumukasa okwo khukhola bibale bie kumuliango kwe liiema lie kumuse, alutare ne neti yayo ne bibiindu bioosi bie mu alutare.

³¹Lundi akurumikhira khukhola bibale bibiabotookhelesia lumako ne bibale bie silibwa sie lumako ne biaambaania bioosi bie liiema litakatifu ne biaambaania bibiabotookhelesia lumako.