Read lubukusu Khur. 39 Bible Online

Khur. 39 - lubukusu bible

Khur. 39

¹Banabila Aruni chingubo che busaayi. Nga nilwo Wele Omunyali Owa Bioosi alaka, banaba chingubo che buusi bubuusi, bunapeenda, bubesemu ne engubo eya katani endayi khulwe khukhola kimilimo Abuundu Atakatifu.

²Bakhola efodi khukhwama khu sahabu, buusi bubuusi, bunapeenda, bubesemu ne engubo eya katani endayi.

³Bakhola esahabu mala bakitonyaka yaaba oli bufu mala bakinabila mu ngubo eye buusi bubuusi, bunapeenda, ne bubesemu engubo eya katani endayi.

⁴Bakholela efodi bilaka bibili khu mabeka koombi. Bilaka ebio babiaambanisilia khu khuumbo chibili cha efodi.

⁵Lundi barakho lukhoba luboa efodi lulwakholwa mu ngila eye busicha. Lukhoba olwo lwaba lwakholwa lwaba siindu silala ne efodi. Lundi bunabi bwaba bufwaanana. Lwakholwa ne esahabu, buusi bubuusi, bunapeenda ne bubesemu ne engubo eya katani eyanabwa bulayi nga Wele Omunyali Owa Bioosi ne alaka Musa.

⁶Barekekha kamabaale ke kamelamela. Bara kamabaale ako mu nyilili che esahabu kaaba nga buaandike bwe kumuuri. Bakaramo khuloondekhana ne kamasina ke ba okhwa Yakobo.

⁷Babukula kamabaale ako bakara khu bilaka bia efodi bie khu mabeka kabe kamabaale ke likhebulila khulwe babaana ba Isiraeli nga Wele Omunyali Owa Bioosi ne alaka Musa.

⁸Banaba engubo eye musifuba mu ngila eye busicha nga nilwo bakhola efodi. Bakikhola khukhwama khu sahabu, buusi bubuusi, bunapeenda, bubesemu ne engubo endayi eya katani.

⁹Engubo eyo yalekhaana buleeyi ne bukhiikha, chisendimita kamakhumi kabili na chine. Yafumbwamo khabili.

¹⁰Bara mu ngubo omwo chinyilili chine che kamabaale. Lunyilili lunyoa, lwaba lwe libaale libesemu lukali, linamaki ne libesemu.

¹¹Mu lunyilili lukhola khabili, libaale lie lubookha, libuusi, ne lie kumutooba.

¹²Mu lunyilili lukhola khataru, libaale linakhanyuusi, lulwanda lumelamela ne linapeenda.

¹³Ne lunyilili lukhola khane, libaale lie lubookha lukali, limelamela ne lie kumutooba. Arumikhira esahabu khura kamabaale kano khu ngubo eye musifuba.

¹⁴Kabao kamabaale ekhumi na kabili, kakaandikwakho kamasina khuloondekhana ne ba okhwa Yakobo. Kamasina ako kaba nga kimiuuri buli libaale ne lisina lialio khulwe chikholo ekhumi na chibili cha Isiraeli.

¹⁵Bakhola kiminyololo kie esahabu yong'ene, eyabororwa nga kimikoye, khulwe engubo eye musifuba.

¹⁶Bakhola chinyilili chibili che esahabu ne chimbete chibili che sahabu, mala baara chimbete chibili echo khu khuumbo chibili che silaka sie engubo eye musifuba.

¹⁷Baboela chingoye chibili che esahabu khu mbete chibili chichaba khu likemo lie engubo eye mu sifuba.

¹⁸Bara chindulo chibili che kiminyololo kibili ekio khu nyilili chibili che esahabu. Bakira ebweeni bilaka bie khu mabeka bia efodi.

¹⁹Bakhola chimbete chibili che esahabu mala bachaambanisia khu likemo lie mukari lie engubo eye khu sifuba, embi ne efodi.

²⁰Bakhola chimbete chibili che esahabu bachira ebweeni asi we bilaka bibili bia efodi. Bachira ambi ne kumunabo, angaaki we lukhoba lwa efodi lulwanabwa mu busicha.

²¹Nio baboela engubo eye musifuba a mbete chayo mala bachwisilia alala ne chimbete cha efodi ne lukoye lubuusi. Bakhola bario nio silaka esio sibe khu lukhoba lwa efodi lulwakholwa mu busicha, lundi nio silaka esio silekhe khurura khu efodi tawe. Kano koosi kakholwa nga Wele Omunyali Owa Bioosi ne alaka Musa.

²²Lundi banaba engubo endeeyi mukari mwa eya efodi.

²³Kumwanya kwe kumurwe kwe engubo eyo kwanabwakho silaka sisiro nio engubo ekhatabukha tawe.

²⁴Babotookhelesia likemo liayo ne bifwaani bie kamatuunda kamakomanga ke buusi bubuusi, bunapeenda, bubesemu ne engubo eya katani eyanabwa bulayi.

²⁵Lundi bakhola chikengele che esahabu yong'ene mala bachira akari we bifwaani bie kamatuunda kamakomanga bibiaba mu makemo ke engubo endeeyi babotookhelesia.

²⁶Buli ekengele yaloondela sifwaani sie lituunda likomanga khubotookhelela kamakemo ke engubo eye kimilimo. Kaba kario khuloondekhana ne lilaka lia Wele Omunyali Owa Bioosi khu Musa.

²⁷Banabila Aruni ne babaana bewe chikaanjo che buusi bwe engubo eya katani endayi.

²⁸Akhaba banaba sileemba sie khumurwe, chikuutwa ne chisirwari. Bioosi bino biaba bie engubo eya katani eyanabwa bulayi.

²⁹Lundi bakhola kumusiipi kwe engubo eya katani eye buusi bubuusi, bunapeenda ne bubesemu kukwanabwa bulayi nga Wele Omunyali Owa Bioosi ne alaka Musa.

³⁰Bakhola limili litakatifu lie esahabu yong'ene. Ne baandikakho kamakhuwa kakafwaana oli kumuuri bali, “Litakatifu khu Wele Omunyali Owa Bioosi.”

³¹Nio baboakho kumukoye kwe buusi bubuusi khuchwiisilia khu sileemba angaaki. Kano kakholwa nga Wele Omunyali Owa Bioosi ne alaka Musa.

³²Nono kimilimo kioosi kie liiema litakatifu lie kumuse kiawa. Baisiraeli bakhola buli sisiindu khuloondekhana nende koosi niko Wele Omunyali Owa Bioosi alaka Musa.

³³Bareerera Musa liiema litakatifu ne bibiindu biamwo bioosi: liiema lialio lienje, chingaki chalio, kimitalaachi kialio, kimilapa kialio, chinjeko chalio, ne bibale bialio.

³⁴Lundi bareera kamasieelo ke kamamiiku, kamasieelo ke chimbusi ne epasia.

³⁵Bareera akhaba lisanduku lie Ndakaano, chinguulo chalio ne endebe eye siisa.

³⁶Bareera emesa ne bibiindu biakhwo bioosi, ne kumukaati kwe khubao khwa Wele Omunyali Owa Bioosi.

³⁷Akhaba bareera siteetwe sie taa eye esahabu yong'ene, chitaa chasio, bibiindu biasio bioosi, ne kamafura ke chitaa.

³⁸Alutare eye esahabu, kamafura kamatakatifu ke khuchukha, biiunya bulayi, ne epasia khulwe kumuliango kwe liiema bioosi biareerwa.

³⁹Lundi bareera alutare eye kumukasa ne neti yayo lwe kumukasa, chinguulo chayo, ne bibiindu biayo bioosi. Bareera lulweelo ne sibale sialwo.

⁴⁰Bareera chisuuka che lumako, chinjeko chalio, bibale bialio ne lububi khulwe silibwa sie lumako. Lundi bareera kimikoye, bitiila ne bibiindu bioosi khulwe kimilimo kie liiema litakatifu lie kumuse.

⁴¹Khutasa khwibio, bareerera Aruni omusaayi ne babaana bewe chingubo chindakatifu che busaayi. Chingubo echo chaba chakholwa bulayi khulwe kimilimo kie Abuundu Atakatifu.

⁴²Baisiraeli bakhola kimilimo kioosi khuloondekhana nende koosi niko Wele Omunyali Owa Bioosi alaka Musa.

⁴³Musa alola buli sisiindu mala abona ali siekholeekhe. Abona ali bakhola khuloondekhana ne lilaka lia Wele Omunyali Owa Bioosi. Nio Musa ababiita chikhabi.