Read lubukusu Khur. 4 Bible Online

Khur. 4 - lubukusu bible

Khur. 4

¹Nio Musa akobosia Wele Omunyali Owa Bioosi ali, “Ne kaaba bali Baisiraeli se basuubila namwe bandekeeresia tawe? Ne lundi baaba ne baloma bali, ‘Wele Omunyali Owa Bioosi se aakhubonekhela tawe?’ ”

²Wele Omunyali Owa Bioosi amureeba ali, “Waambile siina mukhono mwowo?” Musa akobosia ali, “Esiimbo.”

³Wele Omunyali Owa Bioosi aloma ali, “Kimwaate asi.” Aakimwaata asi, yekela endemu, mala Musa akiilukha.

⁴Ne kakhali Wele Omunyali Owa Bioosi aboolela Musa ali, “Yinama mala okitiile kumukhiinga.” Musa enama mala akitiila mukhono, yekela esiimbo lundi.

⁵Wele Omunyali Owa Bioosi aloma ali, “Khola kano khukhwekesia Baisiraeli bamanye bali Wele Omunyali Owa Bioosi, oli Wele owe bakuuka babwe, Wele owa Aburahamu, Isaaka, ne Yakobo, akhubonekheele.”

⁶Wele Omunyali Owa Bioosi aboolela Musa lundi ali, “Ra kumukhono kwowo mu ngubo yowo.” Musa aara kumukhono kwewe mu ngubo yewe. Ne nga akurusia enje, kwaba kwanyoolile bulwaale bwe kamakele. Kwaba kumuwaanga nga kamaarara.

⁷Nio Wele aaloma ali, “Kobosia kumukhono kwowo mu ngubo yowo.” Musa akobosia kumukhono kwewe mu ngubo. Ne nga akurusiamo, siise sino kwaba kumulamu nga kumubili kwewe kwoosi.

⁸Wele aaloma ali, “Baaba ne bakhakhusuubila namwe barekeeresia khu sikholwa sie kamayia sie khunyoa tawe, wakana banyala basuubila sie khabili.

⁹Ne baaba ne bakhasuubila akhaba kamayia kabili kano namwe khu khureekeresia ewe tawe, ocha otae kameechi khukhwama mu luuchi lwa Naili mala okachukhe osi. Kameechi ako kacha khwikela kamafuki.”

¹⁰Ne kakhali Musa aaboolela Wele Omunyali Owa Bioosi ali, “Wele Omunyali Owa Bioosi, ese se ndi omulomalomi omulayi tawe khukhwama khale. Lundi khukhwama nga orakikhe khulomaloma khwise se ndomaloma bulayi tawe. Ese ndi owikhoyoola mu khulomaloma lundi owe siilimi. Okhanduma ese tawe.”

¹¹Nio Wele Omunyali Owa Bioosi amureeba ali, “Naanu owakhola kumunwa kwo omundu? Naanu omuaandia lulimi? Naanu omuminyaasia? Naanu omukhola abona, namwe aamubofusia? Se ndi ese, Wele Omunyali Owa Bioosi tawe ku?

¹²Nono, khoche, ndakhuboolela niko olomaloma.”

¹³Ne kakhali Musa aamukobosia ali, “Tawe, Wele Omunyali Owa Bioosi, nosiima ruma omundu okundi.”

¹⁴Abweene ao Wele Omunyali Owa Bioosi akhalalila Musa mala aaloma ali, “Ne wandaayo Aruni, Omulawi se aliio? Manyile ndi anyala alomaloma bulayi. Ne lola alikho echa khukhwakaanana nawe. Ne alakhubona ewe alekhoya.

¹⁵Olamukachulila mala omuboolele niko aloma. Nja khumuyeeta mwembi khulomaloma, lundi nja khumuboolela mwembi niko mulakhola.

¹⁶Acha khuba omulomalomi wowo mala akhulomalomele khu baandu. Khwako akhabe nga wele khu niye, ne omuboolela niko alomaloma.

¹⁷Bukula esiimbo yino, mala okirumikhire khukhola kamayia.”

¹⁸Nio Musa aakobola owa Yetiro, raraawe omukhwe, mala aamuboolela ali, “Nosiima ndekhe ngobole khu balebe base baali e Misiri mbabone baaba ne bali balamu.” Yetiro aamukobosia ali, “Cha mu muleembe.”

¹⁹Musa ne asiili mu Midiani, Wele Omunyali Owa Bioosi aamuboolela ali, “Kobola e Misiri sikila babaandu boosi babenyanga khukhwira ewe baafwa.”

²⁰Musa abukula omukhasi wewe ne babaana bewe mala abara khu punda mala aarakikha lukeendo lwewe lwe khukobola e Misiri. Asuta esiimbo eya Wele mukhono mwewe.

²¹Lundi Wele Omunyali Owa Bioosi aboolela Musa ali, “Ne okobola e Misiri, khaka nga onyala okhole kamayia koosi niko khuelesie bunyali khukhola ebweeni wa Farao owa Misiri. Ne ndakhola kumwoyo kulume nio akhafukiilila babaandu bache tawe.

²²Boolela Farao oli, Wele Omunyali Owa Bioosi, aloma ali, ‘Isiraeli ali omwana wase omubele.

²³ Ne khuboolela ndi lekha omwana wase ache anjisaaye. Ne oloba khumulekhuula ache, luno enja khwira omwana wowo omubele owe sisoleeli.’ ”

²⁴Abuundu niio bakona ne bali khu lukeendo lwe khucha e Misiri, Wele Omunyali Owa Bioosi aakaanana ne Musa mala enya khumwiira.

²⁵Nio Sipora aabukula libaale liliooki akhala lifuunga lio mwana wewe, mala alitiisia khu bikele[7] bia Musa.

²⁶Sipora aloma ali, “Ng'ali ewe oli omuseecha owe kamafuki khwise.” Aloma ario sikila siikhebo. Ne Wele Omunyali Owa Bioosi alekha khumwiira.

²⁷Wele Omunyali Owa Bioosi aboolela Aruni ali, “Khoche mu sichiimi wakaanane ne Musa.” Aruni acha, aamwakaanana a sikulu sitakatifu, mala aamwikwayila.

²⁸Nio Musa aboolela Aruni kamakhuwa koosi niko Wele Omunyali Owa Bioosi aamuruma khukhola ne kamayia koosi niko Wele Omunyali Owa Bioosi aamulaka khukhola.

²⁹Musa ne Aruni bacha babuusia alala basaakhulu be Baisiraeli boosi e Misiri.

³⁰Aruni aaloma kamakhuwa koosi niko Wele Omunyali Owa Bioosi aaboolela Musa. Ne Musa aakhola kamayia ebweeni we babaandu.

³¹Babaandu basuubila. Ne nga baulila bali Wele Omunyali Owa Bioosi abakholeele siisa mala abone butinyu bwabwe, benamia asi kimirwe kiabwe mala besaaya.