Read lubukusu Khur. 40 Bible Online

Khur. 40 - lubukusu bible

Khur. 40

¹Wele Omunyali Owa Bioosi aboolela Musa ali, “Khu ndaalo enyoa

²eye kumwesi kunyoa yombakha liiema lie kumuse.

³Liremo Lisanduku lie Ndakaano. Ne mukhoya mulikhiinge ne epasia.

⁴Ra emesa mu liiema mala murekekhekho bibiindu biayo nga bienyekha. Lundi ramo siteetwe sie taa mala musirekho chi taa.

⁵Lundi ra alutare eye esahabu khulwe biiunya bulayi ebweeni we Lisanduku lie Ndakaano. Ne mure epasia emuliango we liiema.

⁶Ra emuliango we liiema lie kumuse alutare eye khukhwosia.

⁷Lundi ra lulweelo akari we liiema ne alutare mala muluchukhekho kameechi.

⁸Ne khola lumako lubotookhelesie liiema mala mure epasia esilibwa walio.

⁹“Nio obukule kamafura ke khuchukha mala ochukhe khu alutare khulwe khukiaula ne bioosi bikilimo. Ne omalile orio liiema lilaba litakatifu.

¹⁰Lundi, okhoyeele ochukhe kamafura khu alutare eye biianwa bie khukhwosia ne bibiindu biayo bioosi mala waule alutare. Nio alutare elaba endakatifu lukali.

¹¹Akhaba lundi chukha kamafura khu lwelo ne bibale bialwo mala olwaule.

¹²“Nio reera Aruni ne babaana bewe amuliango we liiema lie kumuse mala obasiinge ne kameechi.

¹³Ne fwara Aruni chingubo che busaayi, omuchukhekho kamafura, mala omwaule, nio akholele ese nga omusaayi.

¹⁴Reera babaana bewe boosi obafwaare chikaanjo.

¹⁵Nio obachukhekho kamafura, bulayi bwene nga ne ochukhile khu raarawabwe. Nio boosi banyale khukhukholela ese nga basaayi. Liliaaulwa liabwe lino likhabengisie mu busaayi mu biise bioosi ne chiselukho chabwe choosi.”

¹⁶Musa akhola koosi nga Wele Omunyali Owa Bioosi ne amulaka.

¹⁷Nono mu ndaalo enyoa eye kumwesi kunyoa kwe kumwiiko kukhola khabili ne bamalile khukhwaama e Misiri, liiema liemisibwa.

¹⁸Musa akholela liiema litakatifu bibale, kimitalaachi, chinguulo ne chinjeko.

¹⁹Ara liiema lienje khu liiema litakatifu mala alifuunikha nga Wele Omunyali Owa Bioosi ne amulaka.

²⁰Nio abukula kamalaka mala akara mu Lisanduku lie Ndakaano. Nio ara chinguulo khu Lisanduku lie ndakaano mala ara endebe eye siisa khu ngaaki khwalio.

²¹Nio aara Lisanduku mu liiema litakatifu mala emisia epasia akhiinga lisanduku elio nga Wele Omunyali Owa Bioosi ne amulaka.

²²Ara emesa mu liiema lie kumuse, lubeka lwe ebunaswa, we liiema litakatifu enje we epasia.

²³Ne akirakho kumukaati kumutakatifu nga kenyekha ebweeni wa Wele Omunyali Owa Bioosi, khuloondekhana ne lilaka lia Wele Omunyali Owa Bioosi.

²⁴Nio aara siteetwe sie taa mu liiema lie kumuse lubeka lwe ebunafubo, sialoleelelana ne emesa.

²⁵Arekekha chitaa ebweeni wa Wele Omunyali Owa Bioosi, khuloondekhana ne lilaka lia Wele Omunyali Owa Bioosi.

²⁶Aara alutare eye esahabu mu liiema lie kumuse, ebweeni we epasia.

²⁷Musa oselia bimuli biiunya bulayi khubwenokhwo, khuloondekhana ne lilaka lia Wele Omunyali Owa Bioosi.

²⁸Aara epasia a muliango kwe liiema.

²⁹Ara alutare eye biianwa bie khukhwosia a muliango kwe liiema litakatifu lie kumuse. Khu alutare okhwo aanilakho biianwa bie khukhwosia ne biianwa bie biakhulia nga Wele Omunyali Owa Bioosi ne amulaka.

³⁰Musa ara lulweelo akari we liiema lie kumuse ne alutare mala aluchukhakho kameechi ke khusaaba.

³¹Musa ne Aruni, ne ba okhwa Aruni basaabanga kamakhono kabwe ne khusiinga bikele biabwe mubweene omwo.

³²Basaabanga nio ne bengila mu liiema lie kumuse namwe ne bembiiya alutare nga Wele Omunyali Owa Bioosi ne alaka Musa.

³³Musa ombakha lumako lwabotookhelesia liiema ne alutare mala ara khu silibwa sie lumako olwo epasia. Nono Musa amala kimilimo.

³⁴ Nio lifuumbi liafuuma liiema lie kumuse mala luyali lwa Wele Omunyali Owa Bioosi lwechusia liiema litakatifu.

³⁵Musa se anyala khukhwingila mu liiema lie kumuse tawe sikila lifuumbi liabakho ne luyali lwa Wele Omunyali Owa Bioosi lwaba lwechuusiemo.

³⁶Mu ngendo che Baisiraeli choosi, lifuumbi nga ne lienyokhanga khu liiema litakatifu Baisiraeli baba banyala bachiililila ne lukeendo.

³⁷Ne kakhali yaba lifuumbi ne likhenyokhekho tawe, se bachiililila tawe khukhwola siise nisio lifuumbi linyokhela khu liiema.

³⁸Mu ngendo chabwe choosi, lifuumbi lia Wele Omunyali Owa Bioosi liabechanga khu liiema litakatifu kumuusi ne kumulilo kwabamo siilo. Kano kekholekha Baisiraeli boosi ne babona.