Read lubukusu Khur. 5 Bible Online

Khur. 5 - lubukusu bible

Khur. 5

¹Enyuma wako, Musa ne Aruni bacha khu Farao owa Misiri mala bamuboolela bali, “Wele Omunyali Owa Bioosi owe Baisiraeli aloma ali, ‘Lekha babaandu base bache, bakholele ese naikara mu sichiimi.’ ”

²Ne kakhali Farao owe Misiri areeba ali, “Wele Omunyali Owa Bioosi niye naanu niye khoyela muulile nio endekhe Baisiraeli bache? Se emanyile Wele Omunyali Owa Bioosi tawe. Ne lundi kakhaba kario se nja khulekhuula Baisiraeli bache tawe.”

³Musa ne Aruni bamukobosia bali, “Wele owe Baeburania akhubonekheele efwe. Khu khusaba, khufukiilile khuche lukeendo lwe chindaalo chitaru mu sichiimi mala khuaane embosio khu Wele Omunyali Owa Bioosi, Wele wefwe. Ne khukhakhola khurio tawe, acha khukhwira ne lufu namwe liie.”

⁴Ne kakhali omwami owa Misiri aareeba Musa ne Aruni ali, “Siina sikila ne murusia babaandu khu milimo kiabwe? Kobola khu milimo kienywe!

⁵Lola Baeburania babeele bakali mala luno mwenya khubakhola balekhe khukhola kimilimo!”

⁶Endaalo eyo ne ng'ene Farao arusia lilaka khu ba bakhosianga banasioobi kimilimo ne babemeelesi. Aaloma ali,

⁷“Mukhaelesiakho babaandu bunyaasi bwe khukholela kamatifari nga mwakholilenge tawe. Khukhwama luno babeene bache beyiimile.

⁸Ne kakhali bakhoya baape kamatifari kamakali nga niko bapaanga. Mukhabuboombiakho tawe. Sikila Baisiraeli bali bakara, liakilile balikho balila bali, ‘Khulekhe khuche khuaane chimbosio khu Wele wefwe chimbosio.’

⁹Baelesie kimilimo kimisiro, nio balekhe khurekeeresia kamakhuwa ke bubeeyi.”

¹⁰Ba bakhosianga banasioobi kimilimo ne babemeelesi barura enje mala baboolela Baisiraeli bali, “Farao alomile ali se acha khumuelesia bunyaasi lundi tawe.

¹¹Ali mukhoya mwabeene muche mulole osi osi niio mubunyoola lundi mukhoya murusie kamatifari kamakali nga khale.”

¹²Babaandu basalasala mu sibala sia Misiri sioosi ne bayiima bunyaasi.

¹³Ba bakhosianga banasioobi kimilimo ba bayuyuukhasia ne baloma bali, “Maliila kimilimo kienywe kia buli ndaalo nga mwakholilenge ne muli ne bunyaasi.”

¹⁴Bamisiri ba bakhosianga banasioobi kimilimo, baapa babemeelesi Baisiraeli, nibo barakho khukhwimeelela Baisiraeli khukhola kimilimo. Babareeba bali, “Siina sikila ne mukhakhola kamatifari kamakali nga niko mwakholilenge anyuma ao tawe?”

¹⁵Nio babemeelesi Baisiraeli bacha khu Farao mala beloocha bali, “Siina sikila ne okhukholela kano?

¹⁶Se khulikho khunyoola bunyaasi tawe. Ne kakhaba kario bakhuboolela bali khukhole kamatifari! Ne luno khulikho khupwa, mala babaandu bowo babeene nibo babekhiikhile.”

¹⁷Farao aabakobosia ali, “Enywe muli bakara lukali, mala liliene elio liakilile mulikho muloma muli ‘Khulekhe khuche khuaane embosio khu Wele Omunyali Owa Bioosi.’

¹⁸Cha mala mukhole kimilimo! Se mucha khunyoolakho bunyaasi bwosi bwosi tawe. Ne kakhaba kario khola kamatifari kamakali nga niko mukholanga.”

¹⁹Babemeelesi be babaandu ba Isiraeli bamanya bali bali mu butinyu bukali. Bamanya bario sikila benyekhana bakhole kamatifari kamakali nga buli endaalo.

²⁰Nga baba ne balikho barekukha khukhwama wa Farao, bakaanana Musa ne Aruni, ba baliindile.

²¹Baboolela Musa ne Aruni bali, “Wele Omunyali Owa Bioosi aaboone niko mukholile mala alamuukuuma enywe sikila mwakilile Farao owa Misiri ne bakholi bewe bakhubiile efwe. Mwakilile benya khukhwiira efwe.”

²²Nio Musa aasaba Wele Omunyali Owa Bioosi mala aloma ali, “Wele Omunyali Owa Bioosi, siina sikila nokholela babaandu bowo kamabi? Siina sikila ne wanduma ese?

²³Sikila khukhwama nga necha khu Farao khumuboolela niko wanduma, Farao aabakholeele bukuluumi ne ewe se wabayeetilekho tawe!”