Read lubukusu Khur. 6 Bible Online

Khur. 6 - lubukusu bible

Khur. 6

¹Ne kakhali Wele Omunyali Owa Bioosi aboolela Musa ali, “Luno olabona niko ndakhola khu Farao. Enja khurumikhira kamaani kaase kamakali khu niye. Lino lilakila atimanie babaandu bano barure mu sibala siewe khangu.”

² Wele aboolela Musa ali, “Ese ndi Wele Omunyali Owa Bioosi.

³Nabonekhela Aburahamu, Isaaka, ne Yakobo nga Wele Owe Bunyali Bwoosi. Ne kakhali se nebuula khu nibo ndi lisina liase lili Wele Omunyali Owa Bioosi tawe.[8]

⁴Lundi nakhola endakaano yase nabo khubaelesia sibala sia Kanaani, mu sibala nisio bamenyamo nga bakwa.

⁵Khutasa khwako, nauliile khulila khwe Baisiraeli, nibo Bamisiri bara mu bunasioobi, lundi nakhebuliile endakaano yase.

⁶Nono boolela Baisiraeli oli, ‘Ese ndi Wele Omunyali Owa Bioosi. Nja khumurusia enywe khukhwama khu milimo kimisiro nikio Bamisiri bamurakho. Enja khumuonia khukhwama mu bunasioobi. Lundi enja khumusikula enywe khulwe kamaani kase nende khulwe khukhalakila Bamisiri.

⁷Enja khumubukula nga babaandu base babeene, lundi ndaba Wele wenywe. Nio mulamanya muli ndi Wele Omunyali Owa Bioosi, Wele wenywe owamurusia khukhwama mu bunasioobi mu Misiri.

⁸Nja khumuelesia enywe sibala nisio nelakana khuelesia Aburahamu, Isaaka, ne Yakobo. Ne nja khumusielesia enywe nga kimiaandu kienywe. Ese ndi Wele Omunyali Owa Bioosi.’ ”

⁹Musa aaboolela kano Baisiraeli, ne se bamurekeeresia tawe, sikila kimiooyo kiabwe kiaba kiafuuniikhe khulwe bukuulumi bwe bunasioobi.

¹⁰Nio Wele Omunyali Owa Bioosi aaboolela Musa ali,

¹¹“Cha oboolele Farao omwami owa Misiri alekhuule Baisiraeli barure mu sibala siewe.”

¹²Ne kakhali Musa aaboolela Wele Omunyali Owa Bioosi ali, “Kaaba bali Baisiraeli se bandekeeresia tawe, kalaba kariena nio Farao omwami owa Misiri andekeeresie ese? Ese ndi omundu okhamanyile khulomaloma bulayi tawe.”

¹³Ne kakhali Wele Omunyali Owa Bioosi aalomaloma khu Musa ne Aruni mala abaelesia lilaka khu Baisiraeli ne Farao. Alaka Musa ne Aruni khurusia Baisiraeli khukhwama e Misiri.

¹⁴Rubeni, okhwa Yakobo omubele aba ne babaana bane basoleeli: Anoki, Palu, Hesironi ne Karimi. Baba bakuuka be chikholo chichalangilwa khu masina kabwe.

¹⁵Simoni aba ne babaana basoleeli sita: Yemueli, Yamini, Ohati, Yakini, Soari ne Saulo. Saulo aba omwana owo mukhaana mukanaani. Baba bakuuka be chikholo chichalangilwa khu masina kabwe.

¹⁶ Lawi aba ne babaana basoleeli bataru: Kerishoni, Koati, ne Merari. Baba bakuuka be chikholo chichalangilwa khu masina kabwe. Lawi amenya ambi kimiiko emia ndala ne kamakhumi kataru ne saba.

¹⁷Ba okhwa Kerishoni baba babili: Libini ne Shimei. Baba baakuka be chikholo chabwe.

¹⁸Ba okhwa Koati baba bane: Amuramu, Ishihari, Heburoni, ne Usieli. Koati amenya embi kimiiko emia ndala ne kamakhumi kataru ne kitaru.

¹⁹Ba okhwa Merari baba babaana basoleeli babili: Mayili ne Musiyi. Chino nicho chinju cha Lawi khuloondekhana ne lisaaye liabwe.

²⁰Amuramu akhwa sengeewe Yakobeti, omukooko owa raraawe. Amusaalamo Aruni ne Musa. Amuramu amenya kimiiko emia ndala ne kamakhumi kataru ne saba.

²¹Ba okhwa Ishihari baba bataru: Kora, Nefeki, ne Sikiri.

²²Ba okhwa Usieli baba Mishaeli, Elisafani, ne Sitiri.

²³Aruni akhwa Elisieba, omukhaana owa Aminatabu, lundi omukooko owa Nasioni. Elisieba asaalila Aruni Natabu, Abiiu, Eliesa, ne Itamari.

²⁴Ba okhwa Kora baba bataru: Asiri, Elikana, ne Abiasafu. Baba bakuuka be chinju che luuya lwa Kora.

²⁵Eliesa okhwa Aruni akhwa omukhaana owa Putieli, mala amusaalila Fineasi. Bano nibo babemeelesi be kholo eya Lawi ne kimiliango kiabwe ne chinju chabwe.

²⁶Aruni ne Musa bali nibo Wele Omunyali Owa Bioosi aboolela ali, “Yimeelela chikholo cha Isiraeli chirure mu Misiri.”

²⁷Nibo ba baboolela Farao owe Misiri bali alekhuule Baisiraeli.

²⁸Wele Omunyali Owa Bioosi aalomaloma ne Musa mu sibala sie Misiri.

²⁹Aloma ali, “Ese ndi Wele Omunyali Owa Bioosi. Boolela Farao omwami owa Misiri buli siindu nisio khuboolela.”

³⁰Ne kakhali Musa aboolela Wele Omunyali Owa Bioosi ali, “Ewe omanyile oli, ese ndi ne siilimi. Farao kane aambulile ariena?”