Read lubukusu Khur. 7 Bible Online

Khur. 7 - lubukusu bible

Khur. 7

¹Wele Omunyali Owa Bioosi aaboolela Musa ali, “Lola, nakhukholile ewe nga wele khu Farao. Ne wandaayo Aruni acha khuba nga Omung'oosi khwiwe.

²Boolela Aruni buli siindu nisio khulaka, mala niye aboolele Farao alekhuule Baisiraeli barure mu sibala siewe.

³ Ne kakhali enja khulumia kumwoyo kwa Farao. Akhaba ne ndakhola bimanyisio ne bie khuukia bikali mu Misiri,

⁴Farao se acha khumuulila enywe tawe. Nio ndeere siiukuumo sikali khu Misiri mala ndangirire chikholo che babaandu base barure mu sibala.

⁵Ne Bamisiri bacha khumanya bali Ese ndi Wele Omunyali Owa Bioosi, nga ndabaelesia siiukuumo mala ndusie Baisiraeli mu sibala siabwe.”

⁶Musa ne Aruni bakhola nga Wele Omunyali Owa Bioosi aabalaka.

⁷Mu siise nisio baboolelamo Farao, Musa aba ne bukhulu bwe kimiiko kamakhumi munaane. Ne Aruni aba ne bukhulu bwe kimiiko kamakhumi munaane na kitaru.

⁸Wele Omunyali Owa Bioosi aboolela Musa ne Aruni ali,

⁹“Farao ne aloma ali, ‘Yimanyisia mwabeene khulwe khukhola kamayia,’ boolela Aruni abukule esiimbo yewe, mala akimwaate asi ebweeni wa Farao, echa khwikela endemu.”

¹⁰Nio Musa ne Aruni bacha khu Farao mala bakhola nga nilwo Wele Omunyali Owa Bioosi aabalaka. Aruni amwaata esiimbo yewe asi ebweeni wa Farao ne bakholi bewe mala yekela endemu.

¹¹Nio Farao alaanga babaandu bakesi ne balakusi ne bafumu be Misiri, mala bosi bakhola kamayia kaabwe bario.

¹²Bamwaata asi chisiimbo chabwe, mala chekela chindemu. Ne kakhali esiimbo eya Aruni yamila chichaabwe.

¹³Kakhaba kario, kumwoyo kwa Farao kwaluma, ne se aulila Musa ne Aruni tawe, nga Wele Omunyali Owa Bioosi aaba ne alomile.

¹⁴Nio Wele Omunyali Owa Bioosi aaboolela Musa ali, “Kumwoyo kwa Farao kwalumile. Alobile khulekha babaandu bache.

¹⁵Cha mutikhinyi omwakaanane ne alikho ekha e luuchi lwa Naili. Bukula esiimbo eyekela endemu, mala omuliindiilile khu sikiingi sie luluuchi.

¹⁶Olaboolela Farao oli, ‘Wele Omunyali Owa Bioosi, Wele owe Baeburania, aandumire khwiwe khuboolele, olekhuule babaandu bewe bache, nio bamusaayile mu sichiimi. Ne lola khukhwola luno, se wariire tawe.

¹⁷ Luno, Wele Omunyali Owa Bioosi aloma ali, lino lilakila omanye oli ese niye Wele Omunyali Owa Bioosi’, enja khupila esiimbo kameechi ke mu luuchi lwa Naili, mala kameechi kacha khwikela kamafuki.

¹⁸‘Ching'eeni mu luuchi lwa Naili chiicha khufwa ne luluuchi lucha khuunya bubolo bukali. Bamisiri se bacha khunyala khulunywamo tawe.’ ”

¹⁹Wele Omunyali Owa Bioosi aaboolela Musa ali, “Boolela Aruni abukule esiimbo yewe mala akiekesielele khu njichi chabwe choosi, ne kameechi ke mumiliinda, ne chisebele chabwe choosi ne kameechi ke mu matiisi nio keekele kamafuki. Ne kamafuki kacha khuba khu sibala sioosi sie Misiri, mu njelo ne mu chinyuungu.”

²⁰Nio Musa ne Aruni bakhola nga Wele Omunyali Owa Bioosi abalaka. Ebweeni owa Farao ne bakholi bewe, Aruni aasuta esiimbo yewe aapa khu meechi ka Naili, mala kameechi kamwo koosi keekela kamafuki.

²¹Ching'eeni che mu luuchi chafwa, mala lwaunya bubi lukali. Liakila Bamisiri khulunywamo tawe. Kamafuki kasalaasala buli abuundu mu Misiri.

²²Ne kakhali be kamaya be mu Misiri bakhola bulayi bwene nga Musa ne Aruni bakhola. Nio Farao alumia kumwoyo kwewe nga nilwo Wele Omunyali Owa Bioosi aaloma.

²³Farao engila munju yewe, ne se enaana khukanakana likhuwa lino tawe.

²⁴Bamisiri boosi bayaba khundulo khwe luluuchi lwa Naili banyoole kameechi ke khunywa, sikila se banyala khunywa kameechi ke mu luuchi tawe.

²⁵Chindaalo saba enyuma wa Wele Omunyali Owa Bioosi khukaluukhasia kameechi ka Naili chabira.