Read lubukusu Khur. 8 Bible Online

Khur. 8 - lubukusu bible

Khur. 8

¹Nio Wele Omunyali Owa Bioosi aaboolela Musa ali, “Cha khu Farao mala omuboolele oli, Wele Omunyali Owa Bioosi aloma ali ‘Lekha babaandu base bache, nio basaaye ese.

²Ne kakhali waaba ne oloba khubafukiilila bache, nja khu khusindikhila butinyu bwe chikhele mu sibala siowo sioosi.

³Luluuchi lwa Naili lucha khwichula chikhele, chiicha khururamo mala chingile munju mwowo ne mu lusiro nimwo okona, khu sitanda siowo, ne munju che bakholi bowo nende che babaandu bowo. Lundi chiicha khwingila mu mayika kowo ne mu bibuumba bie khung'oonelamo kimikaati.

⁴Chiicha khusuna khwiwe, khu baandu bowo, ne khu bakholi bowo boosi.’ ”

⁵Wele Omunyali Owa Bioosi aaboolela Musa ali, “Boolela Aruni abukule esiimbo yewe akiekesielele khu njichi, khu miliinda kie kameechi, ne khu matiisi, nio akhole chikhele chirure chiiche mu sibala sia Misiri.”

⁶Kwako Aruni ekesielelela kumukhono kwewe ne esiimbo yewe khu meechi ka Misiri. Aakhola chikhele charura mala chechula mu sibala.

⁷Ne kakhali bafumu ba Misiri bakhola kamayia kabwe nga ka Musa ne Aruni, mala bosi bakhola chikhele checha khu sibala sia Misiri.

⁸Farao aalaanga Musa ne Aruni mala aloma ali, “Saba Wele Omunyali Owa Bioosi andusieo chikhele ne khu baandu base, mala ndalekhuula babaandu bowo bache, nio baane chimbosio khu Wele Omunyali Owa Bioosi.”

⁹Musa aakobosia Farao ali, “Rekekha siise nisio khusabila ewe, bakholi bowo, ne babaandu bowo. Nio chikhele chirure mwinywe ne munju chenywe mala chirame mu luuchi lwa Naili.”

¹⁰Farao amukobosia ali, “Sabile muchuli.” Musa aaloma ali, “Ndakhola nga nilwo osaba. Nio omanye oli se aliio Wele okundi oli nga Wele Omunyali Owa Bioosi, Wele wefwe tawe.

¹¹Chikhele chiicha khurusibwa mwinywe ne munju chenywe, khu bakholi benywe, ne babaandu benywe, mala chirame mu luuchi lwa Naili mwong'ene.”

¹²Nio Musa ne Aruni balekha Farao, mala Musa asaba Wele Omunyali Owa Bioosi khurusiao chikhele khuloondekhana nga aaba ne afukiilisiane ne Farao.

¹³Wele Omunyali Owa Bioosi akhola nga Musa ne asaba. Chikhele che mu chinju chafwa, che mu chingo, ne che mumikuunda.

¹⁴Bamisiri bachibungikha mu bituumi bikali, mala sibala siaunya bubolo.

¹⁵Ne kakhali Farao nga abona ali banyoolile siiuluukho, alumia kumwoyo kwewe lundi, nga nilwo Wele Omunyali Owa Bioosi ne aloma.

¹⁶Nio Wele Omunyali Owa Bioosi aaboolela Musa ali, “Boolela Aruni ape lipukhuulu ne esiimbo yewe. Mu sibala sioosi sia Misiri lipukhuulu lilekela chiinda.”

¹⁷Khwako bakhola bario: Aruni aapa lipukhuulu ne esiimbo yewe. Nio lipukhuulu lioosi mu Misiri liekela chiinda. Mu Misiri mwoosi lipukhuulu liakaluukhana liekela chiinda. Chiinda echo chaniina khu buli mundu ne buli saang'i.

¹⁸Bafumu bakhaka khurumikhira kamaya kabwe khukhola chiinda chibonekhe, mala bakhilwa. Nio chiinda chaba khu buli mundu nende khu buli saang'i.

¹⁹ Nio be kamaya baboolela Farao bali, “Wele niye okholile kano.” Ne kakhali Farao alumia kumwoyo ne se abaulila tawe, nga Wele Omunyali Owa Bioosi ne aloma.

²⁰Nio Wele Omunyali Owa Bioosi aboolela Musa ali, “Yinyokha muchuli mu makhelebeende mala olindiilile Farao, ne alikho arura ne acha eluuchi. Muboolele oli, Wele Omunyali Owa Bioosi aloma ali, ‘Lekha babaandu base bache, nio basaaye ese.

²¹Ne waaba ne oloba khufukiilila babaandu base bache, lola, enja khu khurumira ewe chiisi chingali ne khu bakholi bowo, ne khu baandu bowo, ne munju chenywe. Ne chinju che Bamisiri chiicha khwichula chiisi. Ne sibala sioosi silifuunikhwa nacho.

²²Ne kakhali mu ndaalo ng'eneyo nja khwaula kamaloba ka Kosieni, niio babaandu base bamenyile, nio chiisi chikhabayo tawe, nio omanye oli Ese ndi Wele Omunyali Owa Bioosi oli khu liloba.

²³Khwako ndarao lulwaakha[9] akari we babaandu base ne babaandu bowo. Kamayia kano kakhekholekhe muchuli.’ ”

²⁴Ne Wele Omunyali Owa Bioosi akhola ario. Chiisi chingali checha munju mwa Farao ne munju che bakholi bewe. Sibala sioosi sia Misiri siabunisibwa sikila chiisi.

²⁵Nio Farao alaanga Musa ne Aruni mala aloma ali, “Khemuche muaane chimbosio khu Wele wenywe mu sibala sino.”

²⁶Musa aamukobosia ali, “Se khukhoyeele khukhola khurio tawe, sikila khucha khuaana chimbosio khu Wele Omunyali Owa Bioosi, Wele wefwe nicho Bamisiri bakhenyanga tawe. Khwaaba ne khuaana chimbosio chisinyisia Bamisiri, se bacha khu khupa efwe kamabaale bakhwiire?

²⁷“Khukhoyeele khuche lukeendo lwe chindaalo chitaru mu sichiimi mala khuaane chimbosio khu Wele Omunyali Owa Bioosi, Wele wefwe khuloondekhana nga ne acha khu khulaka efwe.”

²⁸Farao aaloma ali, “Ndamulekhuula muche muaane chimbosio khu Wele Omunyali Owa Bioosi, Wele wenywe mu sichiimi. Ne kakhali mukhacha aleeyi tawe. Khe musabile ese seesi.”

²⁹Nio Musa aaloma ali, “Nga ne nja khu khururao ndi, ndasaba Wele Omunyali Owa Bioosi nio chiisi chikhururekho, ne khu bakholi bowo, ne khukhwama mu baandu bowo, muchuli. Ne kakhali lundi okhakhola bubeeyi khulwe khulekha khufukiilila babaandu bache khuaana chimbosio khu Wele Omunyali Owa Bioosi tawe.”

³⁰Nio Musa alekha Farao mala acha aasaba Wele Omunyali Owa Bioosi.

³¹Wele Omunyali Owa Bioosi aakhola nga Musa aasaba, mala aarusia chiisi khu Farao, khu bakholi bewe, ne khukhwama mu baandu bewe. Mbao akhaba ndala eya sikala tawe.

³²Ne kakhali Farao alumia kumwoyo kwewe akhaba mu siise sino siosi. Se aafukiilila babaandu bacha tawe.