Read lubukusu Khur. 9 Bible Online

Khur. 9 - lubukusu bible

Khur. 9

¹Nio Wele Omunyali Owa Bioosi aaboolela Musa ali, “Khoche khu Farao mala omuboolele oli Wele Omunyali Owa Bioosi, Wele owe Baeburania, aloma ali, ‘Lekha babaandu base bache, nio basaaye ese.

²Sikila waaba ne oloba khubafukiilila bache mala ochiililile khubakhosia kimilimo,

³ndakhureerera kumunaanio kwe lufu lurafu khu bibaywa biowo, chifarasi, chipunda, chingamia, chikhaafu, kamakheese ne chimbusi.

⁴Ne kakhali ndarao lulwaakha akari we bibaywa bie Baisiraeli nende bie Bamisiri. Ne mbao sibaywa akhaba silala sie Baisiraeli siicha khufwa tawe.

⁵Nerekeekhe muchuli siise nga sino siri nisio khakholelekho kano.’ ”

⁶Oli bwasia, endaalo eyaloondakho, Wele Omunyali Owa Bioosi aakhola nga aaloma, mala bibaywa bioosi bie Bamisiri biaafwa. Ne mbao sibaywa akhaba silala sie Baisiraeli sisiafwa tawe.

⁷Farao arumania bareeberesie kakekholeekhe khu bibaywa bie Baisiraeli. Aaboolelwa ali mbao sibaywa akhaba silala sie Baisiraeli sisiaba ne sifwiile tawe. Ne kakhali Farao alumia kumwoyo ne se alekhuula babaandu bacha tawe.

⁸Nio Wele Omunyali Owa Bioosi aaboolela Musa ne Aruni ali, “Bukula chifuusi che likokhe khukhwama mu siooso. Lekha Musa aliiaanye mu ngaaki ebweeni wa Farao.

⁹Licha khwikela lipukhuulu linosie khu sibala sie Misiri sioosi. Lipukhuulu lino lilareera kamabiimba kaakhekhole kamakoonjo khu baandu, khu saang'i ne khu bibaywa mu sibala sia Misiri sioosi.”

¹⁰ Nio babukula likokhe khukhwama mu siooso, mala beema ebweeni wa Farao. Musa aliiaanya mu ngaaki. Liekela kamabiimba kakeekhola kamakoonjo khu baandu, khu saang'i ne khu bibaywa.

¹¹Be kamaya se banyala khukhwima ebweeni wa Musa tawe, sikila bosi baba ne kamabiimba nga Bamisiri babaandi boosi.

¹²Ne kakhali Wele Omunyali Owa Bioosi aalumia kumwoyo kwa Farao mala Farao khurekeeresia Musa ne Aruni tawe. Se abarekeeresia tawe bulayi bwene nga Wele Omunyali Owa Bioosi ne aboolela Musa.

¹³Nio Wele Omunyali Owa Bioosi aaboolela Musa ali, “Yinyokha muchuli makhelebeende wime ebweeni wa Farao, mala omuboolele oli, Wele Omunyali Owa Bioosi, Wele owe Baeburania, aloma ali, ‘Lekha babaandu base bache, nio basaaye ese.

¹⁴Siise sino ndaruma butinyu bukali khwiwe ne khu bakholi ne khu baandu bowo nio omanye oli mbao akhaba mulala oli nga ese mu sibala sioosi tawe.

¹⁵Khukhwola siise sino andi narumikhira kamaani kaase nakhureerera ewe ne babaandu bowo lufu nakhurusiao khu sibala.

¹⁶ Ne kakhali khulwe sifuno sino nakhulekha omenye nio khwekesie kamaani kaase mala lisina liase lifume mu sibala sioosi.

¹⁷Osiili ne sileka lundi se wenya olekhuule babaandu base bache tawe.

¹⁸Lola, muchuli siise nga sino siri ndakhola kamaarara kamasiro kakwe. Kamaarara nga ako kario kakhakwakho mu Misiri, khukhwama endaalo niio sibala sianyoola bubwami khukhwola luno tawe.

¹⁹Khwako, luno, rumania mala obuusie chikhaafu ne bibiaayo biowo bioosi nibio oli nabio biili mu maayilwe. Biyile abuundu alayi niio bieyikama. Khola orio sikila kamaarara kacha khukwa khu buli mundu ne khu bibaywa biili mu ndaa, mala bicha khufwa bioosi.’ ”

²⁰Balala khu bakholi ba Farao baria niko Wele Omunyali Owa Bioosi aaloma. Lino liakila balootia banasioobi babwe ne bibaywa biaabwe.

²¹Ne kakhali abo bakhaulila likhuwa lia Wele Omunyali Owa Bioosi tawe balekha banasioobi babwe ne chikhaafu chabwe mu ndaa.

²²Wele Omunyali Owa Bioosi aaboolela Musa ali, “Suta kumukhono kwowo mu ngaaki, nio efula eye kamaarara ekwe khu sibala sia Misiri sioosi. Lundi ekwe khu baandu, khu saang'i ne khu bimelwa bioosi biili mu ndaa.”

²³Khwako Musa aasuta esiimbo mu ngaaki, mala Wele Omunyali Owa Bioosi aaruma likukuma lie efula ne kamaarara. Lueni lwameniuukha sibala sioosi.

²⁴ Wele Omunyali Owa Bioosi aaruma efula eye kamaarara engali ne lueni lwachiililila khumeniuukha mu fula. Kaba kamaarara kamasiro niko sibala sia Misiri siaba siikhabonakho khukhwama nga sianyoola bubwami tawe.

²⁵Efula eye kamaarara yonaka buli sisiindu sisiaba mu ndaa mu sibala sia Misiri sioosi. Lundi yonakaka babaandu boosi ne chisaang'i ne bibiaayo. Yonaka bimelwa bioosi bibiaba mundaa ne khufuniakaka kimirongooro kioosi.

²⁶Abuundu niio kamaarara kakhaapa tawe, aba mu maloba ka Kosieni kong'ene, nimwo Baisiraeli bamenyanga.

²⁷Farao aarumania balaange Musa ne Aruni mala aababoolela ali, “Mu siise sino nakholile bubwoni, Wele Omunyali Owa Bioosi ali ng'ali, ne kakhali samwene ne babaandu base se khuli ng'ali tawe.

²⁸Saba Wele Omunyali Owa Bioosi! Khwanyalikhe ne likukuma lino ne kamaarara! Ndamulekhuula muche. Se muramakho ano lundi tawe.”

²⁹Musa aamuboolela ali, “Nga ne ndarura mu lukoba busa ndi, ndasuta mu ngaaki kamakhono kase mala sabe Wele Omunyali Owa Bioosi. Likukuma lie efula licha khwakama, ne kamaarara se kacha khubao lundi tawe. Nio ewe omanye oli sibala sili sia Wele Omunyali Owa Bioosi.

³⁰Ne kakhali manyile ndi ewe ne bakholi bowo mukhaba ne liria khu Wele Omunyali Owa Bioosi tawe.”

³¹(Efwamba ne shayiri bionekha, sikila eshayiri yaba yalabile, ne efwamba yaba yanile.)

³²Ne kakhali mbao engaanu akhaba ndala eyalala tawe, sikila niyo ekhula kalaa.

³³Nio Musa alekhana ne Farao owa Misiri, arura enje we lukoba, mala asuta kamakhono kewe mu ngaaki aasaba Wele Omunyali Owa Bioosi. Ne libalukhaka, kamaarara, ne efula biawa.

³⁴Ne kakhali nga Farao abona ali efula ne kamaarara ne likukuma biaweele, niye ne bakholi bewe bakhola bubwoni. Mala Farao alumia kumwoyo kwewe.

³⁵Kumwoyo kwa Farao kwaluma ne se alekhuula Baisiraeli baacha tawe. Se akhola ario tawe, nga Wele Omunyali Owa Bioosi aloma khubirira khu Musa.