Read lubukusu Ayu. 1 Bible Online

Ayu. 1 - lubukusu bible

Ayu. 1

¹Aabao omundu mu sibala sie Usi, lisina liewe aalaangwa Ayubu, omundu oyo se aabakho ne liibi liosi liosi lie khukhwikiichibwa tawe, lundi aaba omuluungi. Aaria Wele ne se eenya khukhola bumayaanu tawe.

²Ayubu aaba ne babaana basoleeli saba ne bakhaana bataru.

³Aaba ne kamakheese chielefu saba, chingamia chielefu chitaru, chieeyi eelefu ndala ne chipunda chikhasi chimia chiraano. Lundi aba ne bakholi bakali nio aaba omundu omukali mu baandu be ebukwe boosi.

⁴Babaana bewe basoleeli bakholaanga bubwaasio bwe khukhola chinaikara mu chinju chabwe mala balaanganga bakooko babwe bataru ne becha ne balia lundi ne banywa ne nabo.

⁵Enyuma we khumala buli naikara, Ayubu aarumanianga babaana bewe ne khubakwalaasia. Enyokhanga kumutikhinyi makhelebeende ne aana biianwa bie khukhwosia khuloondekhana ne bukali bwe babaana bewe boosi. Aakholanga ario sikila ebaasia ali abuundi babaana bewe bakhola bario bakhoma Wele mu miooyo kiabwe.

⁶ Endaalo ndaalo malaika baacha ebweeni wa Wele Omunyali Owa Bioosi, Sietani yesi aaba ne nabo.

⁷Wele Omunyali Owa Bioosi aareeba Sietani ali, “Waama waena?” Sietani aakobosia Wele Omunyali Owa Bioosi ali, “Nama khukeenda eyi neeyi ne khuyiiyayiiya mu sibala.”

⁸Nio Wele Omunyali Owa Bioosi aareeba Sietani ali, “Oboonekho omukholi wase Ayubu ku? Ng'ali mbao akhaba mulala khu sibala ooli omusuubilwa lundi omulayi nga niye tawe. Asaayanga Wele lundi eliinda, se eenyanga khukhola bumayaanu tawe.”

⁹ Sietani aakobosia ali, “Ayubu anyala aakhuria ewe, Wele aaba ne ataamba sifuno ku?

¹⁰Ewe se wamusira chimbeka choosi, alala ne nju yewe, ne bibiindu bioosi nibio ali ne nabio ku? Ewe wabiita chikhabi kimilimo kie kamakhono kewe lundi kimiaandu kiewe mu sibala kiatasiikhe lukali.

¹¹Ne kakhali luno yetiilakho khu bioosi nibio ali nabio, naye alakhulaama ewe ebweeni wowo.”

¹²Wele Omunyali Owa Bioosi aaboolela Sietani ali, “Lola, bioosi nibio ali ne nabio bili mu bunyali bwowo, ne kakhali okhatiila khu Ayubu omwene tawe!” Khwako Sietani aarura ebweeni wa Wele Omunyali Owa Bioosi.

¹³Endaalo ndala babaana ba Ayubu baba balikho balia naikara mungo mwa wandayaabwe omukhulu.

¹⁴Omurume aatima aacha khu Ayubu aamuboolela ali, “Chieeyi chibeele chilikho chilima, ne chipunda chibeele chilikho chaaya siimbi nacho,

¹⁵mala Basabea bachiibwaakala baacha nacho. Berire buli mukholi wowo ese seng'ene niye oramire. Ese seng'ene niye owibachile niiche khu khuboolela.”

¹⁶Omurume ne asiili khumala khulomaloma, omukholi okundi eecha mala aaloma ali, “Lueni lwe fula lupile kamakheese ne babaayi mala lwabeerire boosi. Ese seng'ene niye owibachile niiche khu khuboolela.”

¹⁷Ne asiili khumala khulomaloma tawe, omukholi okundi eacha mala aaloma ali, “Bakalitayo barumanisie bipupu bitaru mala beecha bebwaakala chingamia chowo bachibukula, beera bakholi bowo boosi. Ese seng'ene niye owibachile khukhwiicha khukhuboolela.”

¹⁸Ne asiili khumala khulomaloma, omukholi okundi eecha mala aaloma ali, “Babaana bowo babeele balikho balia naikara mungo mwo mwana wowo omukhulu,

¹⁹khangu busa ekhuungu yamila mu sichiimi yapa enju lubeka, enju yakwa khu baele abo mala boosi bafwiile. Ese seng'ene niye owibachile necha khu khuboolela.”

²⁰Ayubu nga ne aaulila kano, eenyokha aatabulaka engubo yewe. Aabeka kumurwe kwewe aakwa asi aasaaya Wele.

²¹Aaloma ali, “Ese naama munda mwa maayi sichula, lundi khakobole niio naama sichula. Wele Omunyali Owa Bioosi aana lundi Wele Omunyali Owa Bioosi aabukule. Lisina liewe lifume.”

²²Mu koosi kakeekholekha, Ayubu se akholelakho Wele bubwoni namwe aamwikiicha tawe.