Read lubukusu Ayu. 10 Bible Online

Ayu. 10 - lubukusu bible

Ayu. 10

¹“Ese ndeka bulamu bwase, ndaba omulekhuule mu khwiloocha khwase, ndalomaloma sikila buchuuni nibwo ndi nabwo.

²Ndaboolela Wele ndi okhakhalakila ese khuuba omumayaanu tawe, ne kakhali nenya manye sifuno sie bukhalaki bwowo.

³Eku, ewe osiimisibwa khu khuupia siibi? Ewe olekeelesia kumulimo kwe kamakhono kowo? Ewe osiimisibwa ne kamarekekha ke bamayaanu?

⁴Eku, ewe oli ne chimoni nga cho omundu? Eku, ewe obona nga babaandu?

⁵Eku, chindaalo che bulamu bwowo chili nga che babaandu? Ne kimiiko kie bulamu bwowo kili nga kie babaandu?

⁶Nio likile ewe ne oyiima bubi bwase, ne oenja bubwoni bwase,

⁷akhaba ewe ne omanyile oli ese se ndi ne bumayaanu tawe, se aliio oonyala aasikula ese khukhwama mu bunyali bwowo tawe.

⁸Kamakhono kowo niko kakaandekekha ese mala kambuumba, ne kakhali luno ewe wakaluukhane olikho umbunia.

⁹Khebulila oli ewe owambuumba khukhwama khu liloba. Eku, ewe wenya ungaluukhasie lundi mbe lipukhuulu?

¹⁰Se wanjukha ese nga oochukha kamabeele, mala wamboya ese nga ooboya liboonda?

¹¹Ewe wafwara ese siikhoba ne nyama, mala woonga alala bikuumba biase ne chiisia.

¹²Ewe wambelesia ese bulamu ne khu khunjekesia busiime bukhawa tawe, mala ese nabaao sikila buliindi bwowo.

¹³Kakhaba kario ewe wakisa bibiindu bino mu mwoyo kwowo, manyile ndi ewe waba ne sifuno sino mu nganakani chowo.

¹⁴Ese naaba ne khola bubwoni ewe undoleelela, ne se umbeela bumayaanu bwase tawe.

¹⁵Naaba ne khola bumayaanu aba butinyu bwanyoola! Akhaba ne ndi omuluungi se nyala ne fumia tawe, sikila mba ne chisoni chingali ne nibaasia buchuuni bwase.

¹⁶Ne nebonia, ewe umbaaya oli ne oaaya etalang'i, mala lundi ukholela ese ke khuukia lukali.

¹⁷Oreera buloli buyaakha khwise, ne lirima liowo khwise litasikha, mala undeerera ese banamae bayaakha.

¹⁸Wele, siina sikila ne wafukiilila ese nasaalwa? Andi nafwa omundu yesi yesi ne akhaambonakho tawe,

¹⁹andi nasutwa nayilwa mu ng'ani khukhwama munda, mala naaba nga ookhaabakhowo tawe.

²⁰Eku, bulamu bwase se buli bubwimbi mala buli embi khuwa? Ndekhe mbe, wakana nyoola liioleelesia litiiti,

²¹ne siili khucha abuundu niio khalikobola lundi tawe, mu sibala sie sisiilima sikali ne bubeeleli.

²²Sibala sie sisiilima, ne likoyaana, niio akhaba buwaanga buli nga sisiilima.”