Read lubukusu Ayu. 11 Bible Online

Ayu. 11 - lubukusu bible

Ayu. 11

¹Nio Sofari Omunaamati aakobosia mala aaloma ali,

²“Eku, kamakhuwa kamakali kano kache busa nokhakobosia tawe? Eku, khulomaloma khukali khukhola omundu aabalwa khuuba ng'ali?

³Ayubu, ewe wibaasia oli bubeeyi bunyala bwasisia babaandu? Ne ewe ne ofwochola mbao okhurafwira tawe?

⁴Sikila ewe oloma oli lisuubila liowo lili ng'ali, lundi oli ewe oli omukwalaafu ebweeni wa Wele.

⁵Abaanga Wele alomaloma, khukhukobosia ewe,

⁶aakhakhuboleele chisiiri che limanya. Sikila limanya lilimo chimbeka chingali. Nono manya oli, Wele se aabalile bubwoni bwowo bwoosi tawe.

⁷Eku, ewe onyala wamanya chisiri cha Wele? Onyala bukali bwa Wele Owe Bunyali Bwoosi?

⁸Bukali bwewe buli angaaki khukhila likulu, ewe se onyala sisiindu siosi siosi tawe? Buli asi mu lusiba khukhila e makoombe, ewe se onyala wamanya sisiindu siosi siosi tawe?

⁹Bukali bwewe obwo buli buleeyi khukhila sibala, ne bubalaayi bwabwo bukhila enyanja.

¹⁰Wele aaba ne eecha mala aara omundu mu siboe, namwe eecha mala aakhalakila omundu, naanu oonyala aamukhiingilila?

¹¹Wele amanyile babaandu bakhali ne bukhala tawe, ne abona bikholwa bimayaanu, se akholakho siindu tawe ku?

¹²Omundu omusilu se alinyoola limanya tawe, bulayi bwene nga epundamulia ne ekhanyala yabaywa tawe.

¹³Ayubu, kobolela Wele ne kumwoyo kwowo kwoosi, eenja buyeeti bwewe.

¹⁴Yerusiakho bumayaanu kaaba bali oli nabwo, okhalekha bumayaanu bwaaba mungo mwowo tawe,

¹⁵nio okeende ne kamaani ne okhali ne chisoni tawe, olaba ne kumuleembe ne se olaba ne buuri tawe.

¹⁶Olebilila butinyu bwowo, olabukhebulila busa nga kameechi kaamalile khubira.

¹⁷Bulamu bwowo bulaba buwaanga busa nga enyanga eye mwiangilwe, sisiilima sie bulamu bwowo silaba busa nga kumutikhinyi.

¹⁸Olaba bulayi sikila olaba ne lilieyikina. Olaba asi we buliindi bwa Wele ne khuuluukhila mu muleembe.

¹⁹Olakona asi ne se aliio oolakhuriikhirisia tawe, babaandu bakali bakheenye buyeeti khukhwama khwiwe.

²⁰Ne kakhali chimoni che bamayaanu chikhabofule, chingila chabwe che khukhwilukha choosi chikhabatibe, lilieyikina liabwe liong'ene likhabe khufwa.”