Read lubukusu Ayu. 13 Bible Online

Ayu. 13 - lubukusu bible

Ayu. 13

¹Lola, ese samwene naboone kano koosi, samwene nauliile ne khukamanya koosi.

²Niko mumanyile, akhaba seesi ngamanyile. Enywe se mukhila ese tawe.

³Ne kakhali nenya ndomalome khu Munyali owa Bioosi, nenya mboolele Wele khuloondekhana nende ekesi yase.

⁴Ne kakhali enywe mumbakha ese bubeeyi, enywe mweesi muli nga basilikhi bataamba bukhala.

⁵Lukhila enywe musile busa, nio khusila okhwo khulolekhe khuuba limanya!

⁶Rekeeresia niko ndikho nibaasia, mala muulile ese ne ndoma kakaase.

⁷Eku, siina sikila ne muloma bubeeyi mwisina lia Wele? Enywe mwibaasia muli munyala mwaloma bung'ali bwa Wele khulwe khubea ku?

⁸Eku, mulikho mubabila Wele? Mulacha muyeete Wele mu kesi yewe?

⁹Wele aaba ne amuloleelesia enywe anyala aamunyoolamo sisiindu silayi ku? Enywe mwibaasia muli munyala mwabea Wele nga mubea omundu?

¹⁰Ng'ali Wele akhamurafwire enywe, mwaba ne mubabila lubeka lulala.

¹¹Eku, luyali lwewe se lukhamuriisie enywe? Buuri se bukhamutiile enywe sikila niye?

¹²Bukhala bwe chisimo chenywe buli nga bukhala bwe likokhe, ne kamayiingamo kenywe kali kaumbukha busa nga lisiisi lie liloba.

¹³Khe musile, ndekhe ndomalome, lekha ako kakeecha khunjekholekhakho kekholekhe!

¹⁴Siina sikila niyingisie samwene mu butinyu, mala nde bulamu bwase mu bunyali bwase?

¹⁵Wele ne enya alanjira, se ndi ne lilieyikina liliindi tawe, kakhaba kario ndamuboolela ke liiba liase lilayi.

¹⁶Buno bucha khuba buonia bwase, omundu okharia Wele tawe se eecha ebweeni wewe tawe.

¹⁷Rekeeresia bulayi kamakhuwa kaase, ulila niko ese ndomaloma.

¹⁸Manya muli nerekeekhe bulayi khuloma kakaase, ese manyile ndi ndakhalakilwa khuuba ng'ali.

¹⁹Naanu ooliio oonyala aaloma bubi bwase? Aaba ne aliio, ndasila busa mala fwe.

²⁰Ee Wele, fukiilila bibiindu bibili bino biong'ene, ne aba ese se nja khukhwekisakho tawe:

²¹Ndusiekho kumunaanio kwowo, lundi okhalekha buuri bwase khwiwe bwanderemia tawe.

²²Nio undaange, ne ese ndakhukobosia. Namwe ndekhe ese ndome, mala ewe ungobosie.

²³Nakhola bumayaanu ne bubwoni sikelo siina? Mboolele bubi ne bubwoni bwase.

²⁴Siina sikila ne undekha? Siina sikila ne umbukula ese khuuba omusiku wowo?

²⁵Ewe onyala wariikhirisia lisaafu liuchibwe ne mbeo? Ewe wenya khutimania likhuuchi liliomu?

²⁶Sikila oandika kamasitaka kamarafu khuloondekhana nase, ne khu khundiuukha busiro bwe bubwoni bwe mu buele bwase.

²⁷ Ewe umboa kiminyololo khu bikele, ne undoleelesia buli abuundu niio nja, omenieelesia akhaba bikhandakilo biase.

²⁸Omundu abulungukha nga kumurongooro kubolile, aweelelela nga engubo niyo kamake katanyakile.