Read lubukusu Ayu. 14 Bible Online

Ayu. 14 - lubukusu bible

Ayu. 14

¹“Omundu owasaalwa no mukhasi amenya busa chindaalo ndiiti, chindaalo chichechula butinyu bukali.

²Nga khamuli amulikha, ne akelao ooma, eyuula nga sisiiniini, ne awao.

³Wele, siina sikila ololeelele omundu nga oyo? Siina sikila omureere ebweeni wowo akhalakilwe?

⁴Naanu onyala amia sisiindu similiiu mu siindu sinyaalu? Se aliio akhaba mulala tawe.

⁵Sikila chindaalo che bulamu bwewe chamalwa khubisibwa, omanyile bukali bwe kimieesi kie bulamu bwewe, lundi ewe wamala khumureerao sikelo nisio akhanyala aatuuma tawe.

⁶Khwako laangula mala omulekhe, mulekhe abe nio asangaale nga omukholi oruungwa buli ndaalo.

⁷Kumurongooro ne kuremwa, lilieyikina lie khusisina lundi liliio, mala chinduburi chakwo se chifwa tawe.

⁸Kimili kiakwo kiakhaba ne kikofulila mwiloba, ne sisina siakwo siakhafwila asi mwiloba,

⁹kwakhaunyilakho busa kameechi, kukhasisine, mala kurekho chisakia nga kumurongooro kumwaana.

¹⁰Ne kakhali omundu afwa, ne kumubili kwewe kusiikhwa. Omundu ne amalile khusuumbukha, aba ali waena?

¹¹Nga kameechi ne kawelelela khukhwama mu nyanja, lundi nga luluuchi ne luteenya mala lwooma,

¹²omundu yesi afwa mala se enyokha lundi tawe, likulu ne lisiiliio se enyokha tawe, namwe se asiisimusibwa khukhwama mwiilo liewe tawe.

¹³Ee Wele, andi ungisile e makoombe, andi ungisile khukhwola nga lirima liowo ne liwa, wakharobore siise nisio oreereo mala wakhebulila ese.

¹⁴Eku, kaaba bali omundu afwa, anyala aamenya lundi ku? Ese ndakhola kimilimo kiase biise biase bioosi, khukhwola nga ne ndilekhuulwa.

¹⁵Nono andi okhanaange mala fukiilile, andi okhekoombe khubona sibuumbe nisio ewe obuumbile.

¹⁶Nio andi okhabale likeenda liase, ne se okhaloleelesie bubwoni bwase tawe.

¹⁷Andi bubi bwase bukhaboelwe mu oochwa, andi se okhakhebulile bumayaanu bwase tawe.

¹⁸Ne kakhali sikulu sikwa ne sibulungukha, ne lulwanda lukhuulikha khukhwama abukono walwo,

¹⁹kameechi kamakali kalia kamabaale, kumukhula kucha ne liloba, mu ngila nga eyo ewe wonakaka lilieyikina lio mundu.

²⁰Ewe oulila elala omundu khulwa mindali mala achiila elala, omukaluukhasia lukoondo lwewe ne omurusiao.

²¹Babaana bewe bakhaebwa lukoosi niye se amanya tawe, babaana bewe bakhaambwa chisoni niye se abona tawe.

²²Aulila buchuuni bwe kumubili kwewe bwong'ene, ne elila omwene.”