Read lubukusu Ayu. 15 Bible Online

Ayu. 15 - lubukusu bible

Ayu. 15

¹Nio Elifasi, Omutemani aakobosia ali,

²“Eku, omundu owe limanya anyala aakobosia ne kamakhuwa ke busilu? Anyala aaba ne chilomo chingali busa ku?

³Eku, anyala aaloma kakewe mu lomo chikhali chindayi tawe? Anyala aaloma kakewe mu makhuwa kakhalimo bukhala tawe?

⁴Ne kakhali ewe se olikho oria Wele tawe, lundi olikho okhiingilila kamasaba khu Wele.

⁵Bumayaanu bwowo bukhuboolela niko oloma, khwako ewe orobora khurumikhira lulomo lwe babeeyi.

⁶Kumunwa kwowo kumwene kukhukhalakila ewe, se ndi ese tawe, kamakhuwa kowo kameene kakhubuula.

⁷Eku, ewe niye omundu owanyoa khusaalwa? Eku, ewe wasaalwa bikulu ne bisiili khuba mu sibala?

⁸Eku, warekeeresia mu muse kwa Wele? Ewe wikhola khuuba omukesi weng'ene?

⁹Siina nisio omanyile nisio efwe khukhamanyile tawe? Siina siili mu mebaasio kowo nisio efwe khukhebaasiakho tawe?

¹⁰Efwe khuli ne basaakhulu lundi be chimbuchi khu mirwe, bukhulu bwabwe bukhila bukhulu bwa raraao.

¹¹Eku, khuoleelesia khwa Wele khuli khukeekhe lukali khwiwe? Likhuwa nilio akhuboolela mu kalaa se lili siindu khwiwe tawe?

¹²Siina kumwoyo kwowo ne kukhutiimia, siina sikila chimoni chowo ne chekesia lirima?

¹³Siina sikila ne waukha khu Wele, lundi ne olomaloma kamakhuwa nga kameenako?

¹⁴ Eku, aliio omundu oonyala aaba omukwalaafu ku? Omwana owo mukhasi yesi yesi anyala aaba omulayi ku?

¹⁵Lola, Wele se eyikina akhaba batakatifu bewe tawe, akhaba likulu se lili likwalaafu ebweeni wewe tawe,

¹⁶aba kalaba kariena khu mundu busa, omundu ooli sisiindu sie lisinye lundi siibola? Omundu ookhola bumayaanu oli ne anywa kameechi!

¹⁷Rekeeresia, mala ese ndakhuboolela ndakhuboolela niko mboone.

¹⁸Niko be limanya baaloma, niko bakuuka babwe bakhaakisa tawe.

¹⁹Niibo bong'ene nibo Wele aaelesia sibala, ne omukwa se aababiramo tawe.

²⁰Babaandu bamayaanu banaanisibwa mu ndaalo chabwe choosi, ne khu bakuulumi kimiiko nikio baarekekhelwa kioosi.

²¹Baulila luyoka lwe khuriisia lukali, mu khuindiaala omwonaki eecha khubebwaakala.

²²Nibo se basuubila bali balirura mu siilima siabwe tawe, khumaliilikha khwabwe khuli lifwa lie embalu.

²³Bayiiyayiiya khuyiima siakhulia mala bareeba bali, ‘Sili waena’? Bamanyile bali endaalo eye sisiilima eli siimbi khwoola,

²⁴kumunaanio ne lirima bibateremia, bibebwaakala nga omwami owerekekheele liie.

²⁵Sikila bakholeele Wele sisiayuumba, ne khuchiililila khulekelesia Wele Omunyali owa bioosi,

²⁶bacha khu khupania Wele ne sileka, ne ngabo emboofu lundi esiro,

²⁷sikila banerire mumoni, ne khunesia chinda chabwe chosi,

²⁸bakhamenye mu ngoba chichanjukhwa, mu chinju nicho omundu akhakhoyeele khumenyamo tawe, chinju chiili kamakubili.

²⁹Bamayaanu se baliindiaala tawe, kimiaandu kiabwe se kicha khulama tawe, namwe se kicha khukucha khu sibala tawe.

³⁰Bamayaanu se bakhebache sisiilima tawe, kumulilo kukhomie chisakia chabwe, ne ekhuungu ekhabarusieo.

³¹Baba basilu lukali mala beyikina bumayaanu bwabwe, bumayaanu obwo niibwo buucha khuba kumuruuru kwabwe.

³²Bakharuungwe siise siabwe ne sikhoola tawe, ne chisakia chabwe se chikhakaliie lundi tawe.

³³Bakhabe nga kumusabibu kukhukhumusibwa bibiaamo biakwo ne bisiili biibisi, nga kumuseituni ne kukhukhumusia bimuli biakwo.

³⁴Sikila babaandu bakharia Wele tawe bali nga bakuumba, ne kumulilo kucha khwosia chingo chichombakhwa khubirira mu asoya.

³⁵Baesia bubacha ne khusaala bumayaanu, kimiooyo kiechula kerekekha bubeeyi buli lwosi.”