Read lubukusu Ayu. 16 Bible Online

Ayu. 16 - lubukusu bible

Ayu. 16

¹Nio Ayubu aakobosia ali,

²“Nauliile bibiindu bikali nga bibienebio. Enywe mweesi muli baoleelesi banaania.

³Kamakhuwa kenywe kakhali ne bukhala tawe kali ne sisiakamo ku? Namwe siina sikila ne muchiililila khuyingana?

⁴Abanga bali enywe niye ese ne ese niye enywe andi nakhalomile niko muloma, nakhalomile kamakhuwa kamakali khwinywe ne khumuchekheelela.

⁵Nakhamutinyiliisie enywe khulwe khumuboolela kamakhuwa busa, kamakhuwa kase kakhamuoleelesie enywe.

⁶“Ne ndomaloma, buchuuni bwase se buboomba tawe, nakhaba ne ndekha khulomaloma, koosi malala busa.

⁷Ng'ali Wele, ewe wamalile ese kamaani, ewe wonakaake biili siimbi nase bioosi.

⁸Ewe wakholile nabeele omung'au, ne buno buli buloli khwise, bung'au bwase bwabeele omusiku wase, burusia buloli khwise ebweeni wase.

⁹Wele aambiile mala mu lirima liewe andabulaake, aakhalaliile ese, omusiku wase aakhoondoola ese.

¹⁰Babaandu banjekheelela ese, baakhupa ese chimbi ne khu khuukhoma, boosi basaangilila ese.

¹¹Wele aandekhile ese mu makhono ke babaandu be mbelekeu khu niye, aamwaatile ese mu bunyali bwe bamayaanu.

¹²Naba mu muleembe, ne kakhali Wele aandonyamo, aakhamara likosi mala aafuniakakamo.

¹³Buembo bwewe khukhwama buli lubeka bwambotookheleele, aambunaake chimbiko chase ne se aakholela siisa tawe, achukha asi endurwe yase.

¹⁴Wele ambunaka ne elang'anakho, anjibwaakala nga kunariiria.

¹⁵Nenabila kamakunia niko nifwara, ne kamaani kase koosi kawela mu lufuumbi.

¹⁶Chimoni chase chabesema sikila khulila, ne bisike biase biekesia sisiilima,

¹⁷akhaba ese ne ekhakholakho sisiindu siosi siosi simayaanu tawe, ne lisaba liase lili likwalaafu.

¹⁸Ee, sibala, okhafuunikha kamafuki kase tawe, ne okhemia lilila liase nio lilekhe khuuliilikhana tawe.

¹⁹ Akhaba luno, lola, omuloli wase ali mwikulu, oyo ooli lubeka lwase ali angaaki lukali.

²⁰Basaale base bafwochola, ne ese ndilila Wele.

²¹Nenya omundu ekoonjelele Wele mu bweyaangu bwase, bulayi bwene nga omundu ne ekoonjelela mu bweyaangu bwo musaale wewe.

²²Sikila kimiiko mikeekhe kiri kikiicha, ndachiila khu ngila niyo khanyala nakobolelakho lundi tawe.”