Read lubukusu Ayu. 17 Bible Online

Ayu. 17 - lubukusu bible

Ayu. 17

¹“Kumwoyo kwase kwafwiile, chindaalo chase chaweele, eng'ani yanindiilile.

²Ng'ali babanjekheelela bambotookheleele, ne ese mbaloleelela busa.

³Wele, njimeelele, sikila mbao akhaba mulala oonyala aanjimeelela ese tawe.

⁴Ewe wabamiinyasiisie nio bakhaulila tawe, khwako se olabalekha bakhile tawe.

⁵Omundu alaanga owasie bakabane kimiaandu, ne eyi babaana bewe omwene bakikona.

⁶Ne luno ese nekholile siienyameno khu baandu, mala bafucha kamare khwise.

⁷Chimoni chase se chibona bulayi tawe sikila bubeeleli, kumubili kwase kwoosi kuli nga sisiiniini.

⁸Baluungi basinyisibwa sikila kano, bakhali ne bubi basinyisibwa ne babaandu bakharia Wele tawe.

⁹Kakhaba kario baluungi bachiililila khukhola buluungi, ne abo bakhali banyaalu tawe bachiililila khunyoola kamaani.

¹⁰Ne kakhali enywe mweesi kobola lundi, ne ese se ndanyoola mwinywe omundu akhaba mulala ooli omukesi tawe.

¹¹Chindaalo chase chaweele ne kamarekekha kase konakibwe, alala ne liliekoomba liase lie kumwoyo.

¹²Babaandu bano balaanga siilo khuuba kumuusi, baloma bali, ‘Ne bwilabuule aba bwasieele.’

¹³Naaba ne mbukula e Makoombe khuuba engo wase, naaba ne naala bulili bwase mu siilima,

¹⁴naaba ne mboolela eng'ani ndi, ‘Ewe oli paapa,’ namwe enyeende ndi, ‘Ewe oli maayi wase,’ namwe, ‘Ewe oli omukooko wase,’

¹⁵aba lilieyikina liase lili waena? Naanu obona lilieyikina liase?

¹⁶Bioosi nibio neyikina bikhache ne nase emakoombe ku? Khukhakobole mwiloba fwembi ku?”