Read lubukusu Ayu. 18 Bible Online

Ayu. 18 - lubukusu bible

Ayu. 18

¹Nio Bilitati Omushuhi, aakobosia aaloma ali,

²“Eku, olaayaaya ne chilomo khukhwola liina? Se osilakho fwesi khwalomaloma.

³Siina sikila ne okhubukula efwe khuuba nga chikhaafu? Siina sikila ne okhubukula efwe khuuba basilu ebweeni wowo?

⁴Ewe olikho wetabulakamo sikila lirima liowo wamweene. Eku, sibala sicha khwanjukhwa sikila ewe? Namwe wibaasia oli lulwanda lukharusibweo sikila ewe?

⁵ Ng'ali buwaanga bwe bamayaanu bukhasimisibwe, ne chinjaso che kumulilo kwabwe se chikhakhosie tawe.

⁶Bulamu bwe bamayaanu, bukhasime nga etaa.

⁷Likeenda liabwe lie kamaani likhembiisibwe, ne babeene bakhaambilwe mu mireko kiabwe kimimayaanu.

⁸Sikila likeenda liabwe babeene likhabamwaate mu lutimba, bakhakwe mwiloo ne balikho bakeenda.

⁹Kimireko kikhabatiile bikele biabwe, luriimba lukhabaambile elala.

¹⁰Bakisile kumukoye kumuchwisia asi, kumureko kwareerwe khu ngila yabwe.

¹¹Butinyu bubariikhirisia buli lubeka, mala bubaloondakho buli abuundu niio bacha.

¹²Kamaani kabwe kabawamo sikila enjala, ne butinyu bwabaliindiliile.

¹³Lufu lulia kimibili kiabwe, lifwa libabunia.

¹⁴Barusibwa khukhwama khu nibio beyikina, ne bayilwa mu lifwa, liili omwami oriisia.

¹⁵Kamaeema kabwe se kali kakabwe lundi tawe, boseliamo bibiindu biiunya bulayi khurusiao bubi.

¹⁶Kimili kiabwe kilioma, ne chisakia chabwe chiliniaala.

¹⁷Babaandu be khu sibala balibebilila, ne kamasina kabwe se kalikhebulilwa tawe.

¹⁸Balirusibwa khukhwama mu buwaanga khucha mu siilima, mala balitimanisibwa khukhwama mu sibala.

¹⁹Se balirama ne babaana namwe babechukhulu mu baandu babwe tawe, mala mbao olirama niio bamenyanga tawe.

²⁰Abo be mumbo baliuka khu kabekholekhakho, liiterema likali liliamba abo be ebukwe.

²¹Ng'ali elio nilio limenya lie bamayaanu, abwenao niio abuundu wabo bakhamanyile Wele tawe.”