Read lubukusu Ayu. 19 Bible Online

Ayu. 19 - lubukusu bible

Ayu. 19

¹Nio Ayubu aakobosia ne aaloma ali,

²“Eku, mulanjuunia kumwoyo khukhwola liina? Mulanaania ne kamakhuwa khukhwola liina?

³Enywe mwakhomile kamakhabi ekhumi, enywe se mulikho ne chisoni khu khuukholela ese kamabi tawe?

⁴Bwakhaba ne buli bung'ali bali nakhola bumayaanu, bumayaanu obwo buli bubwase samwene.

⁵Mwaba ng'ali ne mulikho mwefumisilia khwise, ne mubukula kumunaanio kwase khuuba kumusaango khwise,

⁶manya nono muli Wele aangoseele, mala andekire ne kumureko kwewe.

⁷Lola, nakhalila ndi, ‘Ndi mu butinyu’ mbao oungobosia tawe, ndila lukali khulwe buyeeti, ne kakhali mbao bung'ali tawe.

⁸Wele ekaale chingila chase nio se nyala nabira tawe, mala areere sisiilima khu ngila chase.

⁹Andusiisiekho luyali lwase, ne khukhufuula ekuutwa eye bubwami.

¹⁰Ambumisie buli lubeka mala nauliikhe, andusisiemo lilieyikina nga orusiao kumurongooro.

¹¹Wele akhalaliile, mala ambala ese khuuba nga omusiku wewe.

¹²Banamae bewe becha alala, berekekha khukhunjibwaakala bapa ekambi ne babotookhelesia liiema liase.

¹³Wele aakhola basaale base khu khungaluukhanakho, ne basaale base banjanjuukhe.

¹⁴Balebe base ne basaale bandekhile,

¹⁵bakeni base banjibiliile, bakholi base be siikhasi bambala ese khuuba omukwa, nabeele omukwa ebweeni wabwe.

¹⁶Naanga omukholi wase ne se aangobosia tawe, nenyekha mwikoonjelele.

¹⁷Kumuuya kwase nikwo mbeela kuunyila omukhasi wase, ne babaana ba maayi bambiila ese.

¹⁸Akhaba babaana bakeekhe bandekelesia ese, bandafwira ese buli nga bakhupiakho chimoni chabwe.

¹⁹Basaale base be aembi boosi bambiile, ne abo nibo nasiima bangaluukhanekho.

²⁰Nang'ayile nabeele busa siikhoba ne kamakuumba, lundi naoneele busa esitere emusia.

²¹Basaale base enywe, kholele siisa! Kholele siisa! Sikila Wele aakhupile nakwiile asi.

²²Siina sikila enywe mwesi ne muukhupia ese siibi nga Wele? Se mwanyaliikhe ne butinyu nibwo ndi nabwo tawe?

²³Nekoomba ndi kamakhuwa kase kaandikwe! Nekoomba ndi kaandikwe mu sitabu!

²⁴Nekoomba ndi kaandikwe khu lwanda, kaandikwekho ne kalamu eye sichuuma ne sibia nio kabeekho khulwa mindali.

²⁵Sikila ese manyile ndi Omusikuli wase amenyile mindali, ne ekhumaliilikha acha khuba omusooli wase khu sibala sino.

²⁶Akhaba kumubili kwase ne kubola, ese khabone Wele,

²⁷samwene khamubone, khamubone ne chimoni chase, kumwoyo kwase kwalindiliile!

²⁸Mwaba ne muloma muli, ‘Khulachiililila khumupia niye siibi sikila niye omwene omanyile sifuno sie butinyu buno,’

²⁹khe mumanye muli lifwa khwinywe liliio, sikila lirima lia Wele lilareera kumunaanio, nio mumanye muli bukhalaki buliio.”