Read lubukusu Ayu. 2 Bible Online

Ayu. 2 - lubukusu bible

Ayu. 2

¹Lundi yabao endaalo ndala niyo malaika ba Wele becha khukhweyekesiana babeene ebweeni wa Wele Omunyali Owa Bioosi. Sietani lundi eecha ne nabo khukhwiyekesiana ebweeni wa Wele Omunyali Owa Bioosi.

²Wele Omunyali Owa Bioosi aareeba Sietani ali, “Waama waena?” Sietani aamukobosia ali, “Nama khukeenda eyi ne neeyi ne khuyiiyayiiya mu sibala.”

³Wele Omunyali Owa Bioosi aamureeba ali, “Eku, Oboonekho omukholi wase Ayubu ku? Mbao akhaba mulala khu sibala ooli omusuubilwa lundi omulayi nga niye tawe. Asaayanga Wele lundi eliinda, se enyanga khukhola bumayaanu tawe. Ewe wakila ese namwibwaakala akhaba sikila ne sikhabaao tawe. Ayubu asichiililila khuuba omusuubilwa nga khale.”

⁴Sietani aakobosia ali, “Siikhoba khulwe siikhoba! Omundu anyala aana bioosi nibio ali nabio khulwe khuonia bulamu bwewe.

⁵Ne kakhali luno wamutiilakho busa omwene, niye acha khu khulaama ewe ebweeni wowo.”

⁶Wele Omunyali Owa Bioosi aboolela Sietani ali, “Lola, ali mu bunyali bwowo ne kakhali okhamwiira tawe.”

⁷Nio Sietani enyokha ebweeni wa Wele Omunyali Owa Bioosi mala aelesia Ayubu kamakoonjo kumubili kwoosi.

⁸Ayubu aabukula sikoloonjo sie nyuungu nisio eyakalila omwene, mala ekhala mwikokhe.

⁹Nio omukhasi wewe eecha amureeba ali, “Siina sikila ne osiili busa ne lisuubila nga khale? Laama Wele mala ofwe!”

¹⁰Ayubu aamukobosia ali, “Ewe olomaloma nga mulala khu bakhasi basilu. Ne khufukiilila kamalayi khukhwama khu Wele, se khufukiilila ne kamabi tawe ku?” Mu kano koosi Ayubu se akholakho bumayaanu mu niko alomalomanga tawe.

¹¹Ayubu aba ne basaale bewe bataru. Nga basaale bewe abo baulila kamabi koosi kakamwichakho, becha buli mulala khukhwama ewewe. Bano baaba Elifasi khukhwama mu lukoba lwa Temani, Bilitati khukhwama mu lukoba lwa Shuhi, ne Sofari khukhwama mu lukoba lwa Naamata. Bafukiilisiana boosi khuucha khumubona ne khumuoleelesia.

¹²Babonela Ayubu sinaao, ne kakhali se bamumanya tawe. Barakikha khu khuupa chimbuungu ne khulila, batabulaka chingubo chabwe mala bechukhakakho lipukhuulu khu mirwe kiabwe.

¹³Nio bekhala ne naye asi chindaalo saba siilo ne kumuusi ne bakhalomakho elomo tawe, sikila babona bali kumunaanio kwewe kwaba kumukali lukali.