Read lubukusu Ayu. 20 Bible Online

Ayu. 20 - lubukusu bible

Ayu. 20

¹Nio Sofari, Omunaamati, aakobosia aaloma ali,

²“Rekeeresia khuboolele, kamebaasio kase kali kamaboofu, ndi ne silukuluku sie khu khuboolela.

³Liliikiicha liowo lili bukhomo khwise, ne kumwoyo kwase khubira kamebaasio kaase kumbelesia niko khukobosia.

⁴Enywe, se mumanyile kano khukhwama khale tawe, se mumanyile muli khukhwama nga omundu ne areebwa khu sibala,

⁵busangaafu bwo omumayaanu buli bwe siise sikeekhe, ne liliekhoya lio omundu okharia Wele se lili khulwe siise sitiiti busa?

⁶Akhaba buleeyi bwewe bwe sileka ne bwitiila khwikulu, ne kumurwe kwewe ne kwoola mu maleesi,

⁷akheeywe aweeo khulwa mindali nga biibi biewe, abo babamubona bakhareebe bali, ‘Ali waena?’

⁸Akhaweo busa nga kamarooro, akhatibe busa nga kamalola ke siilo.

⁹Chimoni chichamubona se chikhamubone lundi tawe, se chikhamubonekho lundi ne ali abuundu wewe tawe,

¹⁰Babaana bewe bakhasabe kumwalaalo khukhwama khu bataambi, lundi babeene bakhakobosieyo kimiaandu kiewe.

¹¹Akhaba ne aaba ne kamaani ke sisoleeli, koosi kakhakobole mwipukhuulu naye.

¹²Akhaba bumayaanu ne buli bunulu mukhanwa mwewe, akhaba ne abukisa asi we lulimi lwewe,

¹³akhaba ne akhenya khubulekha tawe, lundi akhaba ne abukuuta mukhanwa mwewe;

¹⁴kakhaba kario, siakhulia esio siluluwa ne sioola munda mwewe, siba nga buchiba bwe ndemu munda mwewe.

¹⁵Amila buiinda, ne kakhali alaburusia lundi, Wele akhabakhole barusie buiinda khukhwama munda chabwe.

¹⁶Bakhanuune buchiba bwe chindemu, ne lulimi lwe endemu nafwo lukhamwire.

¹⁷Se akhamenye lukali khukhwola ekhoyele buiinda bwewe tawe, chinjichi chichechula bubuukhi ne kamabeele kamabou.

¹⁸Bakhakobosieyo kamatuunda ke kimilimo kiewe, ne se bakhabiliekho tawe, se bakhekhoyele bukhala bwe bubwofuli bwewe tawe,

¹⁹sikila aapia siibi bataambi lundi aabanaania, aabanuula nibo chinju ne omwene se aachombakha tawe.

²⁰Sikila kumuluungo kwewe se kuola tawe, se aabiikhakho sisiindu siosi siosi nisio aasiima tawe.

²¹Ne alia, mbao nisio asikasia tawe, khwako buiinda bwewe se buchiililila tawe.

²²Aba nende buli siindu nisio eenya ne butinyu bumukwakho, butinyu bukali bumukwakho.

²³Omumayaanu alia ne ekura lukali, ne kakhali Wele acha khumurumira lirima liewe, kumunaanio kumukali oli efula kukhamubeekho kube nga siakhulia siewe.

²⁴Ne eebacha embalu eye sichuuma, buembo bwe kumukasa bukhamulase akwe.

²⁵Buembo bubonekha khukhwama mu mukoongo kwewe, bubwoki buumeniuukha bukhabonekhe khukhwama mu mbiko chewe, lundi biriisio bie lifwa bikhamuambe.

²⁶Sisiilima sikali silindiilila kimiaandu kiewe, kumulilo kukhabwanwa no omundu tawe kukhamubunie, bioosi bibiarama munju mwewe bikhosibwe.

²⁷Likulu lilibuula bumayaanu bwabwe, ne sibala silibakaluukhanakho.

²⁸Kimiaandu kie munju chewe kikhasutwe, kikhamwaatwe aleeyi endaalo eye burafu bwa Wele.

²⁹Kuno nikwo kumuruuru nikwo omundu omumayaanu anyoola khukhwama khu Wele, kumukabwa nikwo Wele aakhalaka khulwo omumayaanu.”