Read lubukusu Ayu. 21 Bible Online

Ayu. 21 - lubukusu bible

Ayu. 21

¹“Nio Ayubu aakobosia ali,

²Rekeeresia bulayi kamakhuwa kase, ne lekha lino libe khulwe khu khumboleelesia ese.

³Njekhaliilikhe mala ndomalome, ne malile khulomaloma, chiililila khu khunjekhelela.

⁴Ne kakhali ese, lilieloocha liase se lili khu baandu tawe, aba se ndi ne sifuno sie khutaamba liliekhaliilikha?

⁵Khe mubone butinyu bwase, mala mulauka, mulara kamakhono kenywe emunwa sikila khukhwesiindukha.

⁶Ne nibaasia khu kano, mba ne buuri bukali, ne mbaambwa ne bireengo bikali.

⁷Siina sikila babaandu bamayaanu ne bachiililila khumenya? Sikila siina ne boola mu bukhulu mala baba ne bunyali?

⁸Babaana babwe baindiaala nibo ne baboone, lisaaye liabwe lichoa nibo ne baliio.

⁹Chingo chabwe chili ne kumuleembe, ne siiukuumo sia Wele se sibalikho tawe.

¹⁰Chiuunwa chabwe se chikhilwa khuoona tawe, ne bisoonga biabwe bisaala ne se biuusia tawe.

¹¹Babaana babwe batiiti batima ne khukhwinyaa nga kamameeme, babaana babwe bakhina eng'oma.

¹²Bakhina khulwe kimienya kie chitamburini ne biilili, bekhoyela khu khuupa khwe kumulele.

¹³Bamenya limenya lie buiinda, lundi bafwa ne bali mu muleembe.

¹⁴Bamayaanu baboolela Wele bali, ‘Khurureo, khulekhe khube! Se khwenya khumanya chingila chowo tawe.

¹⁵Omunyali Owa Bioosi niye naanu nio efwe khumukholele? Ne efwe khulanyoola bukhala siina ne khumusaba niye?’

¹⁶Ng'ali khuindiaala khwe bamayaanu se khuli mu bunyali bwabwe? Kamarekekha kabwe se kali aleeyi ne Wele?

¹⁷Eku, khukhwola khenga bamayaanu ne bafwa matundubiikha? Khukhwola khenga ne banyoola butinyu? Khukhwola khenga ne baukuumwa sikila lirima lia Wele?

¹⁸Khukhwola khenga ne baba nga chikhaanja mu mbeo? Khukhwola khenga ne baba nga likhuuchi nilio ekhuungu esuta?

¹⁹Enywe muloma muli, ‘Wele aelesia omwana siiukuumo sikila bumayaanu bwa raraawe.’ Tawe! Lekha Wele aelesie omumayaanu omwene siiukuumo nio omumayaanu oyo amanye lino!

²⁰Lekha omumayaanu omwene eebonelekho libuna liewe, lekha banaanisibwe ne lirima lia Wele Owe Bunyali Bwoosi.

²¹Omumayaanu enaana siina khu lisaaye liewe nilio alalekha enyuma, endaalo eye lifwa liewe ne yolile?

²²Eku, aliio onyala ekisia Wele limanya? Wele se ali niye okhalakilanga akhaba abo baali angaaki lukali?

²³Omundu mulala afwa ne aindiaalile lukali, afwa ne ali mu bukoote ne mu buliindi,

²⁴afwa ne ali omunefu, afwa kamakuumba kewe ne kali ne kamaani.

²⁵Omundu okundi afwa ne ali ne bubeeleli mu mwoyo kwewe, se achanjamakho buiinda bwosi bwosi tawe.

²⁶Kakhaba kario, boosi bakhakone mwiloba, mala chinyeende chibalie boombi.

²⁷Lola, ese manyile kamebaasio kenywe koosi, ne kamarekekha kenywe ke khu khuukholela ese kamabi.

²⁸Sikila mureeba muli, ‘Nono enju yo mundu omukali eyo eli waena? Enju niyo omumayaanu oyo aamenyangamo eli waena?’

²⁹Eku, se mwareebakho babaandu bachichanga chingeendo tawe? Se mufukiilila buloli bwabwe?

³⁰Omundu omumayaanu se alekhwangwa khu ndaalo eye butinyu? Se asikulwangwa khu ndaalo eye burafu?

³¹Naanu okaania bikholwa biewe mu moni chewe? Naanu onyala amuruungia khu niko akholile?

³²Ne alikho asutwa khuyilwa sia ng'ani, siliindwa siewe siba ne baliindi.

³³Liloba lie mu ng'ani limubeela lilayi, babaandu boosi bamuloondakho, ne abo bamuraangirira se babalikha tawe.

³⁴Khwako enywe mulamboleelesia ese muriena ne kamakhuwa kakhalimo bukhala tawe? Mbao liramire khu makobosia kenywe tawe ne bukhali bubeeyi bwong'ene!”