Read lubukusu Ayu. 22 Bible Online

Ayu. 22 - lubukusu bible

Ayu. 22

¹Nio Elifasi Omutemani aakobosia aaloma ali,

² “Omundu anyala aaba ne bukhala khu Wele ku? Ng'ali oyo ooli ne limanya ali ne bukhala khu mwene yeng'ene.

³Eku, ewe wibaasia oli khubirira mu khuba omuluungi onyala wasaangaasia Wele? Namwe buli bukhala khu niye ewe waaba ne okhalikho ne bubi bwosi bwosi tawe?

⁴Eku, Wele akhuukuuma lundi akhukhalakila ewe khulwe buluungi bwowo?

⁵Tawe, lili sikila bumayaanu bwowo buli bukali! Bubwoni bwowo buli bukali po!

⁶Ewe waraakho bawandaayo kamakobi ka busa, lundi wabafuula chingubo chabwe mala barama sichula.

⁷Ewe se waelesia be bulesia kameechi baanywa tawe, lundi wemana be njala siakhulia.

⁸Ewe waeleesie omundu owe kamaani kamaloba, walekhile omundu niye osiimiliisiemo amenyemo.

⁹Walekhile banamulekhwa makhono mataaka, se wayeetile bafuubi tawe.

¹⁰Khwako kimireko kiakhubotookheelele ewe, ne buuri bukali bwakhuambile ewe.

¹¹Buwaanga bwabeele sisiilima khwiwe, khwako se onyala wabona tawe, ne kameechi kamakali kakhufuuniikhe!

¹²Ng'ali Wele ali mwikulu angaaki, lola nga ching'enieesi che angaaki lukali ne chili aleeyi!

¹³Kakhaba kario ewe oreeba oli, ‘Wele amanyile siina? Anyala aabona khubirira mu mafuumbi kamasiro khu khukhalakila?

¹⁴Kamafuumbi kamasiro kamukhiingilila niye khubona, ne akeenda, abotookhelela mu ngaaki mwong'ene.’

¹⁵Eku, ewe olaloonda engila eye khaale, niyo babaandu bamayaanu baakeendelakho?

¹⁶Babaandu abo barusibwao siise siabwe ne sisiili khwoola, kumusiingi kwabwe kwasutwa ne kumukhula.

¹⁷Baboolela Wele bali, ‘Khurureo, siina nisio Wele Omunyali Owa Bioosi anyala akhola kwifwe?’

¹⁸Ne kakhaba kario, Wele niye owechusia mu chinju chabwe bibiindu bilayi, ne kakhali kamebaasio ke bamayaanu kaukhana ne kakewe.

¹⁹Babaandu baluungi babona kameene ako mala basangaala, ne baakhali ne bubi tawe nabo babachekha.

²⁰Baloma bali, ‘Ng'ali basiku befwe babunisiibwe, ne nibio balekha kumulilo kwabiosiisie.’

²¹Nono Ayubu, fukiilisiana ne Wele mala obe ne kumuleembe, mu ngila yino olaba bulayi.

²²Fukiilila kamekisio kewe, mala osuubile kamakhuwa kewe.

²³Waaba ne wiboombia wamwene, mala wakobola khu Wele Omunyali Owa Bioosi, lundi warusia mungo mwowo bumayaanu,

²⁴waaba ne okhawesielia bukesi khu miiandu kiowo tawe, lundi obukule esahabu eye ofiri nga kamabaale ke mu luuchi,

²⁵Wele Owe Bunyali Bwoosi aaba ne ali niye esahabu yowo, lundi efwesa yowo eye bukhala bwe angaaki,

²⁶okhasangaalile mu Wele Omunyali Owa Bioosi, mala omweyine khulwe buyeeti.

²⁷Okhamusabe mala akhuulile, nawe okhaliinde lisuubisia liowo khu niye.

²⁸Koosi niko wenya khukhola kakhanyalikhe, lundi buwaanga bukhakhosie khu ngila chowo.

²⁹Sikila Wele aboombianga babebonia, ne kakhali aonianga abo babeboombia.

³⁰Wele asikulanga abo bakhali ne bubi tawe, khwako ewe olasikulwa bikholwa biowo biaaba ne biikhali biibi tawe.”