Read lubukusu Ayu. 23 Bible Online

Ayu. 23 - lubukusu bible

Ayu. 23

¹Nio Ayubu aakobosia aaloma ali,

²“Aakhaba luno khukhwiloocha khwase khuli khurafu, kumunaanio kwa Wele khwise kuli kumukali akhaba ne ndikho ndila.

³Abaanga bali manyile abuundu niio nyala nanyoola Wele, andi nachiile niio ali!

⁴Andi namubooleele niye ekesi eeli khwise, andi namubooleele niye niko ndi nako.

⁵Andi nakhamanyile kamakhuwa niko akhangoboosie, ne khuulila ako niko akhamboolele.

⁶Eku, Wele akhayingane ne nase ne bunyali bwewe bukali? Tawe, akhandekeeresie.

⁷Abwenao omundu owa ng'ali anyala aaboolela Wele ekesi yewe, ne ese khoya naonisibwa no mukhalaki wase khulwa mindali.

⁸Lola, nja ebweeni, ne kakhali Wele se aliio tawe, ngobola enyuma, ne kakhali se mubona tawe,

⁹muyiima lubeka lwe kumukhono kumukhasi ne kakhali se mupiakho emoni tawe, ngobola lubeka lwe kumukhono kumuseecha ne kakhali se mubona tawe.

¹⁰Ne kakhali niye amanyile engila niyo njiilakho, ne amalile khukhuukhaka ndaba omukwalaafu nga esahabu.

¹¹Namuloondilekho buli abuundu mu bweyikinwa, naloondile engila yewe ne se naukhekho tawe.

¹²Se nalekha kamalaka kewe niko aandaka tawe, nasuubila kamalaka kewe.

¹³Ne kakhali niye se ali okaluukhana tawe, ne naanu onyala aamukaluukhania? Nilio niye enya, liliene elio nilio akhola.

¹⁴Sikila acha khukhola nisio andekekhela, ne endekekha ng'eneyo eli ndala khu biindu bikali nibio ali nabio mu mebaasio kewe khwise.

¹⁵Khwako ndi ne buuri ebweeni wewe, ne nibaasiakho busa ndi, mba ne buuri sikila niye.

¹⁶Wele aakholile nabeele omuri, Owe Bunyali Bwoosi aandikhiriisie.

¹⁷Sikila nabotookheleelwe ne sisiilima, ne sisiilima sikali siafuumile ese.