Read lubukusu Ayu. 24 Bible Online

Ayu. 24 - lubukusu bible

Ayu. 24

¹“Siina sikila Wele ne akharao siise sie bukhalaki tawe, ne siina sikila abo bamumanyile ne bakhabona chindaalo nga echo chirio tawe?

²Babaandu benyosiao chinjakha che kamaloba, bayaaya bibiaayo ne khubiaaya.

³Banuula bafuubi chipunda chabwe, baapa kumusiingo ekhaafu eya namulekhwa.

⁴Bakhiingilila baabanani nio bakhakholelwa bung'ali bwabwe tawe, bataambi be mu sibala boosi babekisakho.

⁵Bataambi bali nga chipunda che mu sichiimi, barura ne bacha khukhola kimilimo, bayiima siakhulia mu sichiimi, bayiima siakhulia khulwe babaana babwe.

⁶Bataambi bakesa biakhulia biabwe mu mikuunda kiabeene, lundi bangalisia kimisabibu kie bamayaanu.

⁷Siilo bakona sichula, lundi se bali ne sisibiimbilo mu mbeo tawe.

⁸Efula eye mu bikulu ebatosia, mala bebaanda busa mu ndulo mwe kamabaale khukheyikama.

⁹Babaandu bamayaanu nabo banunula omwana omufuubi khwituru lia maawe ne kamaani, baapa omwana oyo kumusiingo khulwe kamakobi ka maawe.

¹⁰Bataambi bakeenda sichula ne se bali ne chingubo tawe, enjala ebalia, aakhaba ne bakesa biakhulia.

¹¹Bakhamulula kamafura khukhwama mu misabibu kie bamayaanu, batiing'a endali khukhwama mu matuunda ke kimisabibu, ne kakhali baulila bulesia.

¹²Babaandu baali siimbi khufwa balilila mu lukoba, ne kumwoyo kwoyo niye baunile kulilila buyeeti, ne kakhaba kario Wele se enaana khu lisaba liabwe tawe.

¹³“Baliio babaandu bamayaanu baaloba buwaanga, baakhamanyile chingila chabwo tawe, lundi se benya baloonde chingila echo tawe.

¹⁴Omwiiri enyokha makhelebeende, nio ache eere omutaambi nende omubanani, ne siilo omwiiri chana oyo aba omwifwi.

¹⁵Aakhaba emoni eyo mueeyi yosi elindiilila sisiilima, ne aloma ali, ‘Mbao emoni ekane yimbone tawe’ mala akisa bubweeni bwewe.

¹⁶Mu siilima bafuna chinju, ne kumuusi beyikaliilila munju, se bamanyile buwaanga tawe.

¹⁷Khu nibo boosi sisiilima sikali sili kumutikhinyi, sikila nibo basiima biriisio bie sisiilima sikali.

¹⁸“Ewe oloma oli, ‘Babaandu baabi bali nga lunyaasi luyilwa khangu ne kameechi, Wele aalaama kimikuunda kiabwe, se aliio oocha khukhola mu misabibu kiabwe lundi tawe.’

¹⁹Siimiyu ne kumuumu biomia kameechi ke barafu, Emakoombe yosi eyuula erio babooni.

²⁰Bamaawabwe babaasaala babeebilila, kamasina kabwe se kakhebuliilwa lundi tawe, nono bumayaanu bufunikha nga kumurongooro ne kuremwa.

²¹“Banaania omukhasi omukuumba ookhali ne omwana tawe, lundi se bakholela namulekhwa kamalayi tawe.

²²Kakhaba kario Wele mu bunyali bwewe eera babaami bakuluumi, benyokha ne bakhali ne lilieyikina lie khuuba balamu tawe.

²³Wele anyala aabalekha bebaasia bali bali mu muleembe, ne kakhali aloleelela chingila chabwe.

²⁴Bafumikha mu sise sikeekhe ne bawao, booma ne khuwao nga enyoonyi, lundi barusibwao nga bikala bie ngaanu.

²⁵Kaaba bali se kali kario tawe, naanu onyala ekesia ali ese omubeeyi, ne khukhwekesia ali mbaamo siindu mu niko ndomaloma tawe?”