Read lubukusu Ayu. 26 Bible Online

Ayu. 26 - lubukusu bible

Ayu. 26

¹Nio Ayubu aakobosia ali,

²“Ng'ali ewe wayeetile lukali oyo okhali ne bunyali tawe! Lundi waoniisie lukali omundu ookhali ne kamaani tawe!

³Ewe wakelekeele lukali oyo ookhali na limanya tawe, ne khuaana likaambila lilayi!

⁴Olomaloome kamakhuwa kano mu buyeeti bwa naanu? Okhwimeeleele mu khulomaloma ali roho owa naanu?”

⁵“Bafu be emakoombe asi baterema, bateremela mu meechi ke mu lusiba asi we sibala.

⁶Emakoombe eli khwaasie busa ebweeni wa Wele. Se siliio sinyala siamukhiingilila niye khubona tawe.

⁷Wele akalaasia embaka eye likulu ebunaswa abuundu aali busa, mala akhwiikha sibala mu ngaaki abuundu niio sisiindu siosi siosi sikhali tawe.

⁸Wele abuusianga kameechi mu mafuumbi kewe kamasiro, ne kameechi ako se katabula kamafuumbi tawe.

⁹Akhiingaanga kumwesi kuangaale, akubiimbangakho lifuumbi liewe.

¹⁰Aareere engara eye lulwakha khu meechi, nga lulwakha akari we buwaanga ne sisiilima.

¹¹Chinjeko che likulu chiterema, lundi chiuka lukali sikila khurafua khwa Wele.

¹²Aasisia enyanja khulwe bunyali bwewe, mala aabunia kukuundu Rahabu khulwe limanya liewe.

¹³Aakwalaasia likulu khulwe kumuuya kwewe, ne kumukhono kwewe kweera kuremu kukwaba ne kwiilukha.

¹⁴Bino bili busa bilala khu bikholwa bikali bie bunyali bwewe, kano kali matiiti busa niko khuulilangakho! Ne kakhali naanu oonyala aamanya bukali bwe bunyali bwewe?”