Read lubukusu Ayu. 27 Bible Online

Ayu. 27 - lubukusu bible

Ayu. 27

¹Mala Ayubu aachiililila khuloma kamakhuwa kewe ali,

²“Nga Wele ne amenyile mindali, Wele oumbukuulekho bung'ali bwase, Wele Owe Bunyali Bwoosi oukholile ese nabeelela,

³ne naaba ne siili omulamu, mala Wele aaba ne asimbeelesia ese bulamu,

⁴kumunwa kwase se kuliloma lie bubeeyi tawe, ne lulimi lwase se lucha khuba lwe bubacha tawe.

⁵Se ndilomakho ndi enywe muloma bung'ali tawe, khukhwola lifwa liase, ese se khalekhe khukhwebuula khuuba ookhalikho ne bubi tawe tawe.

⁶Ese ndi omuluungi elala, ne se ndilekha khuloonda buluungi tawe, kumwoyo kwase se kunjikiichakho mu bulamu bwase bwoosi tawe.

⁷“Lekha omusiku wase anyoole siiukuumo sie bamayaanu, ne lekha oyo oumbiila aukuumwe nga ookhali omuluungi tawe.

⁸Sikila lieyikina siina liliio khu mundu ookhamanyile Wele tawe, Wele ne amubumbuluule, Wele ne abukula bulamu bwewe?

⁹Eku, Wele alaulila khulila khwewe butinyu ne bulimukwakho?

¹⁰Eku, alasangaalila Wele Omunyali Owa Bioosi? Akhasabe Wele biise bioosi?

¹¹Lekha ese mweyikie khuloondekhana ne Bunyali bwa Wele, mala ninoosie niko Wele Owe Bunyali Bwoosi arekekha.

¹²Enywe mweesi mwabuboone mwabeene, nono siina sikila ne mweluyia mu khuloma kamakhuwa ka busa?”

¹³“Kuno nikwo kumukabwa kwo mundu ooli omumayaanu khu Wele, nikwo bakuluumi banyoola khukhwama khu Wele Omunyali Owa Bioosi.

¹⁴Babaana bewe baakhakucha, bakhafwiile mwiie, ne lisaaye liewe se likhabe ne siakhulia siboola tawe.

¹⁵Abo baona ako bakhafwe lufu, ne banamulekhwa babwe se bakhabalile nibo tawe.

¹⁶Aakhaba ne babuusia efwesa nga kumuyekhe ekhabalikha tawe, ne khubuusia chingubo chingali,

¹⁷banyala bachibuusia, ne kakhali baluung'i bakhachifware, ne abo bakhalikho ne bubi tawe bakhakabane efwesa.

¹⁸Bombakha chinju chabwe chiili busa nga biswi, nga khasali nikho omuliindi owe mukuunda ombakha.

¹⁹Bakona siyiinda lulala lwong'ene, ne benyokha aba kimiaandu kiabwe kiachiile.

²⁰Biriisio bibapwookhakho nga kumukhula oli siilo, sisifuusia sibasuta.

²¹Ekhuungu eye ebukwe ebasuta angaaki ne bawao, ebarusia abuundu wabwe.

²²Ebauucha ne kamaani ne se eli ne siisa tawe, bakhaka khukhwilukha khukhwama khu bunyali bwayo.

²³Ekhuungu ebaapila chimbi mu khubachekheelela, lundi buli abuundu niio bacha ebariisia khulwe liiulukhuma liayo.”