Read lubukusu Ayu. 28 Bible Online

Ayu. 28 - lubukusu bible

Ayu. 28

¹“Ng'ali efwesa eli ne liloo nilio bakiyabamo, ne esahabu abuundu we khukikwalaasiliao.

²Sichuuma sirusibwanga mwiloba, ne koopa mu mabaale kayengusiibwe.

³Babaandu baayaba kamabaale ke buukusi bwe angaaki bareeranga chitaa mu sisiilima, bamenieelesianga mu bibale bie kamaloo kamaleeyi lukali, ne khuyaba kamabaale ke bukusi bwe angaaki mu siilima sikali.

⁴Balima kamaloo mwitooma sinaao khukhwama niio babaandu bamenyile, beebililwa, se aliio oobirirao tawe, besungwacha, bali aleeyi khukhwama niio babaandu bali.

⁵Khukhwama mwiloba biakhulia binyoolekhamo, ne kakhali bibiindu biili asi walio bikaluukhanisibwa oli manya ne kumulilo.

⁶Kamabaale kalio kalimo kamabaale ke bukusi bwe angaaki kamabuusi, ne lipukhuulu lialio lilimo esahabu.

⁷“Mbao engosia emanyile engila ng'eneyo tawe, aakhaba emoni eya wasio ekhakibonakho tawe.

⁸Chisaang'i chindafu se chaikiswaalakho tawe, aakhaba etalang'i se yaikibirirakho tawe.

⁹Omundu asiuulanga kamabaale kamaandalafu po, asiuubula bikulu khukhwola khu bibale biabio.

¹⁰Eekulanga bibaanga mu chinyaanda, ne emoni yewe ebonanga buli libaale lie bukusi bwe angaaki.

¹¹Ayaba khunyoola binoko bie kameechi, ne sisiindu sisiekisa asi asibakala abuwaanga.

¹²“Ne kakhali limanya lilanyoolekha waena? Abuundu we limanya niio waena?

¹³Se aliio omundu oomanyile engila eye khukhwolela limanya tawe, lundi se linyoolekhana mu sibala sie balamu tawe.

¹⁴Chisiba chiloma chili, ‘Limanya se lili mwifwe tawe,’ ne enyanja nayo eloma eli, ‘Se lili ne nase tawe.’

¹⁵Limanya se linyala liakulwa khulwe sahabu tawe, aakhaba efwesa engali se nyala yaanwa nga bukusi bwalio tawe,

¹⁶Limanya se linyala lialeekhasibwa ne bukhala bwe sahabu eya Ofiri tawe, namwe bukhala bwe kamabaale ke bukusi bwe angaaki ka Satoniki namwe kamabuusi tawe.

¹⁷Esahabu ne bikiio se bilekhaana nalio tawe namwe se linyala liakulaanwa ne kamamili ke sahabu enosie tawe.

¹⁸Bukusi bwe limanya se bulekhaanisibwa ne bukusi bwe kamabaale ke bukusi bwe angaaki ke mu nyanja namwe kang'enang'ena tawe. Kamabaale ke bukusi bwe angaaki ke mu nyanja kaakhosia ne kali mu buwaanga se kakhila limanya tawe.

¹⁹Libaale lie Kushi se likelaanisibwa nalio tawe, lundi se lilekhaanisibwa ne sahabu enosie tawe.

²⁰“Nono limanya liama waena? Ne sinoko sie limanya sili waena?

²¹Liakisibwa khukhwama khu buli siindu sie bulamu, lundi liakisibwa khukhwama khu nyuni chipurukhanga.

²²Emakoombe ne Lifwa biloma bili, ‘Khwaulilakho busa khuloondekhana ne limanya ne kamaru kefwe.’

²³“Wele amanyile engila eye limanya, lundi amanyile niio limanya lili.

²⁴Sikila niye abonanga bibiakamo bie sibala, lundi abonanga buli siindu asi we likulu.

²⁵Nga aelesia embeo busiro bwayo, ne khukhalakila kameechi lulwakha lwako,

²⁶nga aakhalaka niio efula enyala yakwa yoola, ne engila niyo lueni ne lubalukha lukhoya khuloonda,

²⁷Wele aabona limanya mala aalikela, aalirao mala alimenieelesia.

²⁸ Nio Wele aaboolela omundu ali, ‘Lola, khuuria Omwami Wele nilio limanya, ne khulekha bumayaanu khuli khuuba ne limanya.’ ”