Read lubukusu Ayu. 29 Bible Online

Ayu. 29 - lubukusu bible

Ayu. 29

¹Ayubu lundi aachiililila ne lilomaloma liewe aaloma ali,

²Ee, andi ndi nga naba khaale, nga mu ndaalo nicho Wele aanindanga,

³nga Wele ne aaba nase buli lwoosi, nio ese nakeenda mu siilima sikila buwaanga bwewe,

⁴andi ndi nga naba mu ndaalo che buiinda bwase, biise nibio buliindi bwa Wele bwaba munju mwase.

⁵Wele Owe Bunyali Bwoosi aaba ne nase, ne babaana base baaba nase bangarire.

⁶Chindaalo echo nga naba ne naindiaala lukali, lundi naba ne kamafura kamakali khukhwama mu miseituni,

⁷nga nachichanga asilibwa mu siikhasio sie basaakhulu be lukoba, nga nekhalanga khu ndebe yase abuundu we bibiikhasio, q

⁸baele bambonanga mala bandekhela engila, ne basaakhulu benyokhanga mala beema khukhuumbelesia ese liria.

⁹Babaami nabo balekhanga khulomaloma, ne khuusuta kamakhono kabwe nio babaandu basile busa.

¹⁰Babaandu be lukoosi basilanga busa, se baalomangakho sisiindu tawe.

¹¹Buli mundu owaulilangakho efuma yase, aalomanga kamalayi khuloondekhana nase, akhaba babaambonanga bosi baalomanga bario.

¹²Sikila ese nayeeta bataambi babaasaba buyeeti, lundi bafuubi bakhaaba nende oobayeeta tawe.

¹³Abo bababechanga siimbi khufwa bambelesianga chikhabi, ne nakilanga banamulekhwa ne beemba kimienya kie khoyo.

¹⁴Buluungi bwaba engubo yase, nakhalakanga bung'ali mala bwambaakho nga ekaanjo ne kofiyo yase.

¹⁵Khu babofu, ese naba chimoni, ne khu baleme, bikele.

¹⁶Khu babanani, ese naba raarawabwe, lundi ese nakhalakilanga bareende mu bung'ali.

¹⁷Nafunaka bunyali bwe babaandu bakhali baluungi tawe, lundi nasikulanga nibo baaba ne baambile.

¹⁸Nio nebaasia ndi, Ese khafwiile munju mwase, lundi khamenye siise sileeyi lukali,

¹⁹nga kumurongooro nikwo chiisi chakwo choola khu meechi, lundi nikwo chisakia chakwo chibechanga ne luume siilo sioosi.

²⁰Lukoosi lwase se lwawechanga tawe, lundi nabechanga ne kamaani biise bioosi.

²¹Babaandu bandekeeresianga, mala baliinda, basilanga busa ne baliindile mbakaambile.

²²Nga namalanga khulomaloma, nibo se balomalomakho lundi tawe, mala elomo yase yabasiimisianga.

²³Banindiililanga ese oli baaliindiilila efula, baba nga balimi baliindiilila efula eye kumunaane.

²⁴Nabamunamunilanga ne batibisie lilieyikina, busangaafu bwase bwabaelesianga kamaani.

²⁵Nabemeelelanga ne khubekesia engila, nabamenyangamo nga omwami mu banamae bewe, lundi nabaoleelesianga oli ooleelesia baali mu masika.