Read lubukusu Ayu. 3 Bible Online

Ayu. 3 - lubukusu bible

Ayu. 3

¹ Enyuma wako, Ayubu arakikha khulomaloma mala aalaama endaalo eye khusaalwa khwewe.

³“Lekha endaalo eye khusaalwa khwase elaamwe, alala ne siilo nisio balomelakho bali, ‘Omwana owe sisoleeli aaesiibwe.’

⁴Lekha endaalo eyo ekaluukhane ebe sisiilima Wele owe angaaki akhenaanakho sikila niyo tawe, ne buwaanga bukhakikhosiakho tawe.

⁵Lekha sisiilima ne bubeeleli bukibeekho, lekha kamafuumbi kakibekho, lekha bumali bwe kumuusi bukiteremie.

⁶Lekha sisiilima sikali sibe khu siilo esio! Okhasibalila alala ne chindaalo che kumwiiko tawe, lundi sikhabalilwakho alala ne chindaalo che kumwesi tawe.

⁷Lekha siilo esio sibe sikuumba, ne busangaafu bukhauliilikhanilamo tawe.

⁸Lekha balaamanga, balaame endaalo eyo, abo bamanyile khukhiingilila Lefiatani[1],

⁹lekha ching'enieesi che kumutikhinyi kwayo chimaliie, lekha siilo esio siliinde khunyoola buwaanga, ne kakhali sikhabunyoolakho tawe, kumutikhinyi kukheecha kwasibonekhela tawe.

¹⁰Sikila se siakhiingilila khusaalwa khwase tawe, se siambiimba khukhwama mu butinyu tawe.

¹¹Siina sikila ne khaafwilao enyuma we khusaalwa? Siina sikila ne kharura munda mwa maayi mala nataambao?

¹²Sikila siina maayi wase ne aasaala ese? Siina sikila ne nanuuna kamaturu?

¹³Andi luno nakona asi mu muleembe ne silile, andi luno nakona, mala andi ndikho mbola.

¹⁴Alala ne babaami ne bakeleki be liloba, babeyombakhila buyaakha khukhwama mu maumbu,

¹⁵namwe ne babaami babaaba ne esahabu, babechusia chinju chabwe efwesa engali,

¹⁶Siina sikila ese ne khaasiikhwa nga omwana osaalilwe omufu? Nga omwana omutoro okhaabonakho buwaanga tawe?

¹⁷Ebweeneyo bamayaanu balekha khunaania, ebweeneyo baluile baola.

¹⁸Ebweeneyo baboe bali mu muleembe alala, se baulila luyoka lwe babaami babwe tawe.

¹⁹Be asi nende be bunyali baliyo, ne banasioobi bali balekhuule.

²⁰Sikila siina buwaanga ne bukhoselia abo bachiililila khumenya mu butinyu? Sikila siina bulamu ne buelesibwa abo bali mu bubeeleli?

²¹ Benya bafwe, mala lifwa se liicha tawe, baliyiima khukhila ne bayiima libiikhilo liliekisa.

²²Bekhoya lukali, lundi basangaala ne boola mu siliindwa.

²³Siina sikila omundu ookhabona tawe anyoole buwaanga, omundu niye Wele aakhiingilila buli lubeka?

²⁴Khusikhiikha khuli nga siakhulia siase, ne buchuuni bwase buchichukha nga kameechi.

²⁵Sikila sisiindu nisio naria nisio sisiimbaamba, ne sisiimba buuri nisio sisinjichakho.

²⁶Se ndi ne kumuleembe namwe buoleelefu tawe, se ndi ne buuluukhi tawe, butinyu bwong'ene buchiililila khukhwicha.”