Read lubukusu Ayu. 30 Bible Online

Ayu. 30 - lubukusu bible

Ayu. 30

¹“Ne kakhali luno banjekheelela, babaandu nibo ese khulila, baraara babwe se nababona khuuba babolaana khubara alala ne chimbwa chiliinda bibiaayo biase tawe.

²Eku, kamaani ke kamakhono kaabwe abeele kanjeeta siina? Babaandu nibo kamaani kaba ne kaweele?

³Sikila butaambi ne enjala engali, baakukuna liloba liliomu lundi lilianjukhwa.

⁴Baa chinyenyi ne kamasaafu ke mundaa mala balia aakhaba kimili kie kimirongooro kie biyeywe.

⁵Baoonwa khukhwama mu baandu, babaandu baabayokelela oli manya ne bayokelela babeefwi.

⁶Liabayingilila bamenye khu ndulo khwe chingulu ne mumatooma, mu maloo asi ne mu mabina ke mu mabaale.

⁷Balilila mundaa nga chisaang'i, beumba alala niio bisaala biakhuumba.

⁸Baba sipupu sie be siyiingwa! Babaapwa ne khuoonwa khukhwama mu maloba.

⁹“Nono luno beemba khu khunjekheelela ese, ese ndi siienyameno khu nibo.

¹⁰Bambiila, banjibebeea, nga bambonakho busa ne bafuucha kamare ebweeni wase.

¹¹Sikila Wele aamalile kamaani ne khu khuumbaambia chisoni, babeele balekhuule khukhola khwise koosi niko beenya.

¹²Sipupu siaamila kumukhono kwase kumuseecha khu khuunjibwaakala, baakhupa ese asi ne khurekekha chingila che libuna liase.

¹³Bonakaka engila yase, batasa butinyu bwase, ne se aliio yesi yesi oobakaania tawe.

¹⁴Beecha oli manya ne babirira mu sibaanga sibalaayi, basendekhelela ebweeni khangu nga bibuli enyuma we liliibwaakala.

¹⁵Bireengo bikali bingwakho, lukoosi lwase luwao oli manya ne lusutilwe ne khuungu, buiinda bwase bwaweleo nga lifuumbi.

¹⁶“Nono luno bulamu bwase bulikho buwa, chindaalo che engunyi chanjolilekho.

¹⁷Siilo kamakuumba kase koosi kachuuna, buchuuni bubuunjuuna se buolakho tawe.

¹⁸Wele aandiliile mu ngubo chase ne kamaani, aakhamaare ne kamaani khwikosi khwe ngubo yase.

¹⁹Wele aamwaatile mu matosi, ese nabeele nga lipukhuulu ne likokhe.

²⁰Ese khulilila ne kakhali se ungobosia tawe, niima khu khusaaya, ne kakhali se umbulila tawe.

²¹Ewe wangaluukhaanekho wabeele omurafu lukali khwise, ewe ukhupia ese siibi mu bunyali bwowo.

²²Ewe umwaata mu khuungu ne yimbuucha, mala umwaata eyi ne eyi mu mbembeesi eye kamaani.

²³Ng'ali, manyile ndi okhambile busa mu lifwa, abuundu niio balamu boosi bakhalakwa khukhwakaanana.

²⁴“Kakhaba kario, omundu se akaluukhana khu babanani ne basaba buyeeti butinyu ne bubakwiilekho tawe.

²⁵Eku, ese se nalilila oyo owaba mwimenya lie butinyu? Se nakholela siisa sikali bataambi?

²⁶Ne kakhali nga naenja kamalayi, bumayaanu bwecha, lundi nga nalindiilila buwaanga, sisiilima siecha.

²⁷Kumwoyo kwase kuunaania, ne se kweoleelesia tawe, chindaalo che butinyu chanjichilekho.

²⁸Ese mbubuuka eyi ne eyi mu ngunyi, ninyokha ne niima mu siikhasio ne khusaba buyeeti.

²⁹Ese ndi wandaaye owe bisuuche, lundi owasie owe chinyeefwe.

³⁰Sikhoba siase simaliia ne khukhwobukha, ne kamakuumba kaase kabila sikila kumureengo.

³¹Lituungu liase liabeele lie khu khuupa kumwenya kwe kamasika, ne kumulele kwase khu mumilo kwaabo baalila.”