Read lubukusu Ayu. 31 Bible Online

Ayu. 31 - lubukusu bible

Ayu. 31

¹“Nakholile endakaano ne chimoni chase, khwako naama ndiena nekoomba omukhaana owe yabwana?

²Ese khanyoole siina khukhwama khu Wele Owe Bunyali Bwoosi? Ne kumukabwa kwase khukhwama khuyo Owe Bunyali Bwoosi kuli siina?

³Eku, butinyu se bukwa khu bakhali ba ng'ali tawe, ne libuna khwaabo bakhola bumayaanu tawe?

⁴Eku, se abona chingila chase, ne khubala bikele biase bioosi tawe?

⁵“Naaba ne ngendeele mu bumayaanu, ne sikele siase sienyoeleesie khubea babaandu,

⁶lekha ngelwe khu sikelo siili abwene, lekha Wele amanye bung'ali bwase!

⁷Kaaba bali sikele siase siaba siauukhe khu ngila, ne kumwoyo kwase kwaloondeleele kameelu ke chimoni chase, lundi kaaba bali lisaanda liosi liosi liaba liaandile khu makhono kaase,

⁸lekha ese miiche mala okundi abilie, lundi lekha nibio namiicha bikhuulwake.

⁹“Kumwoyo kwase kwaaba ne kwiikoomba omukhasi, namwe naaba ne nebuulila a muliango kwo owasiase,

¹⁰lekha omukhasi wase asieele okundi, lekha baseecha babaandi bakone naye.

¹¹Sikila okwo kwakhabeele kumusaango kumumayaanu, nikwo bakhalaki khukhwola barusie bukhalaki.

¹²Sikila okwo kuli kumulilo kutirira emakoombe, mala kwosia buli sisiindu nisio endi nasio.

¹³Naaba ne naloba khurekeeresia omukholi wase owe siseecha namwe owe siikhasi, ne anjiloochela mu bung'ali bwewe,

¹⁴khakhole siina Wele ne akhalakila ese? Nga akhandeebe, khamukobosie ndiena?

¹⁵Oyo owambuumba ese munda mwa maayi, se ali niye owabuumba bakholi base boosi tawe ku?

¹⁶“Ese naloba khuelesia bataambi nisio beenya, namwe nakila banamulekhwa bafwa kumwoyo?

¹⁷Ese nalia siakhulia siase seng'ene, ne bafuubi baonga enjala?

¹⁸Tawe! Khukhwama mu buele bwase ese nabeele omulesi wabwe, khukhwama butoro ese nemeleele banamulekhwa.

¹⁹Kaaba bali nabona omundu ne afwa sikila se ali ne chingubo tawe, namwe omutaambi ne ali sichula,

²⁰mala naye aasabila ese chikhabi ne khu khuukhupila ese orio ne kumwoyo kwoosi, aakhaba ese ne khamuelesie niye luluuya lwe chingubo che bufuumbo bwe kamakheese kaase tawe?

²¹Kaaba bali narikhirisia omufuubi mu koti, nemanyile ndi bakhalaki balaba lubeka lwase,

²²lekha libeka liase likhongokhe, ne lekha kumukhono kwase kufunikhe khukhwamila mu mayi.

²³Sikila naria ndi Wele anyala andeerera butinyu, ese se nyala neema ebweeni we bukali bwewe tawe.

²⁴“Eku, ese nareere lilieyikina liase mu sahabu, namwe nabooleele esahabu engwalaafu ndi, ‘Ewe oli buliindi bwase?’

²⁵Eku, ese nasangaalila bukali bwe kimiaandu kiase, namwe nebonia sikila bikali nibio kamakhono kaase kanyoolile?

²⁶Kaaba bali nalola khu nyanga ne efwa, namwe kumwesi mu chelecheenje yakwo,

²⁷mala kumwoyo kwase kwakhweeswa khubisaaya mu bwikisi, nio ese nekwayila kamakhono kaase mu khubifumia nibio,

²⁸buno bwosi buli bumayaanu bukhoyela siiukuumo sie bakhalaki, sikila aba naba omubeeyi khu Wele Owe Angaaki.

²⁹“Eku, ese nasangaaliile khubuna khwo musiku wase, namwe nekhoya nga butinyu ne bwamukwakho?

³⁰Tawe! Se nafukiilila kumunwa kwase khumwenyela niye kamabi, khulwe khumulaama afwe tawe.

³¹Bakholi base boosi balomelanga busa abuwaanga, buli mukeni ali omulekhuule khukhwicha mungo mwase.

³²Ooli khu lukeendo se akona khungila enje we nju yase tawe, nekuulilao oyo owaba ne abira khu ngila.

³³Eku, ese nakisile kamabi kase nga babaandu babaandi? Eku, ese nalobile khukhweyama bubwoni bwase?

³⁴Se naria khukhwima ebweeni we sipupu sie babaandu, namwe nasila busa namwe nefungila munju, bali sikila nariire birikhirisio ne kileki yabwe tawe.

³⁵Ee, abanga bali omundu oundekeeresia aliio! Nyala napa kumuuri kwase khu buli siindu nisio ndomile. Lekha Wele Owe Bunyali Bwoosi aangobosie. Ee, abanga bali naboolela basiku base bare kamasitako kabwe khwise mu buandike!

³⁶Ng'ali nakhakasutile khwibeka khwase, nakhaketiuukhile nga ekuutwa.

³⁷Andi nakhabaliile Wele buli siindu nisio nakhola, andi muchiileyo ne ndi ne kamaani nga omwana owo mwami.

³⁸Naaba ne neeba kamaloba niko miichangamo, ne khukhola kimifurechi kiako kilile,

³⁹sikila nyoolela bukhala mu biaamo biako ne se mbaana kumuruungo tawe, mala ndeera lifwa khu beene maloba,

⁴⁰khwako lekha kamawa kamelemo mu bweyaangu bwe engaanu, ne enyoonyi mu bweyaangu bwe shayiri.” Kamakhuwa ka Ayubu kakamila ao.