Read lubukusu Ayu. 32 Bible Online

Ayu. 32 - lubukusu bible

Ayu. 32

¹Khwako babaandu bataru bano baalekha khukobosia Ayubu, sikila omwene ebona ali ali omuluungi.

²Nio Elihu okhwa Barakeli, owe kholo eya Busi, owe nju eya Ramu, aakhalala. Akhalalila Ayubu sikila Ayubu eyibaasilia khuuba omulayi ne khubiiya Wele.

³Elihu lundi aakhalalila basaale bataru ba Ayubu sikila bakhilwa khunyoola likobosia, aakhaba ne baakhalakila Ayubu khuuba ne bubi.

⁴Siise esio Elihu aaba aalindiliile khulomaloma ne Ayubu sikila basaale bataru ba Ayubu abo baaba bakhulu khu niye.

⁵Ne nga Elihu aabona ali mbao likobosia khukhwama khu baandu bataru abo tawe, aakhalala.

⁶Mala Elihu okhwa Barakeli, owe kholo eya Busi aakobosia. “Ese ndi omwana khwinywe, ne enywe muli bakhulu khwise. Khwako ese nderema ne khuuria khuboola enganakani yase khwinywe.

⁷Naloma mumwoyo mwase ndi, ‘Enywe mwenyekha mulomalome, enywe basaakhulu mwenyekha mwekisie limanya lienywe.’

⁸Ne kakhali roho oyo, roho ooli mu mundu, kumuuya kwa Wele Owe Bunyali Bwoosi, nikwo kukhola omundu aamanya.

⁹Se bali basaakhulu baali bakesi tawe, namwe bakhulu bamanya bung'ali tawe.

¹⁰Khwako ese ndoma ndi, ‘Ndekeeresie, lekha nase muboolele niko nibaasia.’

¹¹“Lola, nalindiilila kamakhuwa kenywe, Narekeeresia lilomaloma lienywe lie bukesi, nga mwaba ne muyiimilisia nilio muloma.

¹²Namurekeeresia enywe bulayi, ne kakhali, mbao owekesia bubi bwa Ayubu, namwe aanyala khukobosia kakhuwa ka Ayubu tawe.

¹³Mube barekeerefu, mukhola murio mwaloma muli, ‘Efwe khwanyoolile limanya; oolakhila Ayubu ali Wele, ne se ali omundu tawe.’

¹⁴Ayubu se aalomaloome khwise tawe, khwako se mukobosia niye nga enywe mwakholile tawe.

¹⁵“Ayubu, babaandu bano barangaraarwe, se bali ne likobosia liosi liosi khwiwe lundi tawe, se bali ne likhuwa nilio baloma tawe.

¹⁶Eku, ese niindiliile sikila se balomaloma tawe? Sikila bemile eyo basilile busa, khaba se bakobosia lundi tawe?

¹⁷Ese sesi ndakobosiamo ese sesi ndaboola niko nibaasia.

¹⁸Ndi ne kamakhuwa kamakali ke khuloma, roho ooli mwise ambingiilila ndomalome.

¹⁹Ng'ali kumwoyo kwase kuli nga endali ekhali nende niio erusilia kumuuya kwayo tawe, nga eoochwa eye ndali embia eeli siimbi khwatikha.

²⁰Khukhwola ndome, nio mbuluukhe, khukhwola sute kumunwa kwase mala ngobosie.

²¹Se nja khubabila omundu yesi yesi, namwe ndome kamakhuwa ke khufumia busa omundu yesi yesi tawe.

²²Sikila ese se manyile khufumia busa omundu tawe, nakhola ndio, Wele owambuumba ese anyala aambunia!”