Read lubukusu Ayu. 33 Bible Online

Ayu. 33 - lubukusu bible

Ayu. 33

¹“Nono Ayubu, ulila niko ese ndoma, mala orekeeresie kamakhuwa kase koosi,

²Lola, nerekeekhe khulomaloma kakaase, ese samwene ndalomaloma.

³Kamakhuwa kase kaboola buluungi bwe kumwoyo kwase, ne niko manyile ndakaloma mu bung'ali.

⁴Roho owa Wele aambuumbile ese, ne kumuuya kwa Wele Omunyali Owa Bioosi kumbelesia bulamu.

⁵Waaba ne onyala ngobosie, rekekha bulayi kamayiingamo kowo ebweeni wase, mala orobore lubeka nilwo olaba.

⁶Ewe ne nase khulekhaana ebweeni wa Wele, ese sesi nabuumbwa khukhwama khwiloba.

⁷Nono mbao sikila orie ese tawe, se nja khukhumiina tawe.

⁸Ng'ali, olomile ne mbulila, lundi nauliile kamakhuwa kowo koosi.

⁹Ewe oloma oli, ‘Ese ndi omumiliiu, se ndikho ne bubi tawe, ese ndi omukwalaafu, se ndikho ne bumayaanu tawe.

¹⁰Lola, Wele anjikhakasiangakho busa, ambukulanga khuuba nga omusiku wewe,

¹¹ amboanga kiminyololo khu bikele biase, mala aloleelela likeenda liase lioosi.’

¹²“Ne kakhali ese khukobosia ndi: Lola Ayubu, mu kano se oli ng'ali tawe. Wele ali omukali khukhila omundu busa.

¹³Siina sikila ne omuyingania, ne oloma oli, ‘Se acha khukobosiakho kamalilo kase tawe,’

¹⁴Wele alomaloma, ne eelelamo mu ngila ekiindi, ne kakhali omundu se aulila tawe.

¹⁵ Wele alomaloma ne babaandu mu marooro ne mu malola, ne bakonile liilo likali mu bulili bwabwe,

¹⁶nio eekule kamaru ke babaandu, ne khubariisia ne chingaani chewe,

¹⁷nio akaluukhasie babaandu khukhwama mu bikholwa biabwe, mala abarusiekho sileka siabwe.

¹⁸Mu ngila yino, Wele akhiingilila kumwoyo kwo mundu khukwa mu buko, lundi akhiingilila embalu ekhabunia bulamu bwewe tawe.

¹⁹“Omundu aukuumwa ne buchuuni bwa Wele mu sitanda siewe, ne kumureengo kuchiililila mu makuumba kewe,

²⁰nio omulwale amilwa khulia siakhulia, aakhaba siakhulia nisio aasiima.

²¹Aba omung'au lukali, ne khureka enje busa kamakuumba kewe kakaaba mukari.

²²Aba siimbi lukali khucha mu Buko, ne bulamu bwewe buli siimbi niio bareera lifwa bali.

²³Abanga omundu abaayo ooli ne malaika, omukaya, mulala khu bamalaika eelefu, khukhwekesia omundu liili lia ng'ali khukhola,

²⁴mala amukholela siisa ne aloma ali, ‘Mureesie! Akhacha mu Buko tawe! Ese nanyoolile kumuruungo kwe khumusikula niye.’

²⁵Lekha kumubili kwewe kweyobule, lekha akobole mu ndaalo che kamaani ke buele,

²⁶Omundu oyo asaba Wele, mala afukiililwa, eecha ebweeni wa Wele ne khoyo, ne Wele amukobosia niye mu liiba lie buluungi.

²⁷Ne emba ebweeni we babaandu ali, ‘Nakhola kamabi ne khufuumbikha bung'ali, ne se naukuumwa tawe.

²⁸Wele aasikula ese khacha nabunila mu Buko tawe, mala siili omulamu lundi mbona buwaanga.’

²⁹“Lola, Wele akhola bibiindu bino bioosi, akholela omundu ari kamakhabi kamakali.

³⁰Khuonia kumwoyo kwewe khukhwama mu Buko, nio amukhola anyale khubona buwaanga bwe bulamu.

³¹Ayubu ulila, ndekeeresie, sila busa, mala ese ndomalome.

³²Waaba ne oli ne likhuwa loma, lomaloma sikila nekoomba khubona bung'ali bwowo.

³³Ne kakhali kario tawe, ndekeeresie, sila busa ne ndakhwekisia ewe limanya.”