Read lubukusu Ayu. 34 Bible Online

Ayu. 34 - lubukusu bible

Ayu. 34

¹Nio Elihu aloma ali,

²“Enywe muuli bakesi, ulila kamakhuwa kase, enywe mumanyile, ndekeeresie,

³sikila liiru liiulila chilomo, bulayi bwene nga lulimi ne luchanjama siakhulia.

⁴Lekha khwiroborere liili lia ng'ali, lekha fwabene khukhalake liili lilayi.

⁵Sikila Ayubu alomile ali, ‘Ese se ndi ne bubi tawe, ne kakhali Wele aandusiisiekho bung'ali bwase.

⁶Aakhaba ne khalikho ne bubi tawe, mbalwa busa khuuba omubeeyi, aakhaba ne khalikho ne kamabi tawe, likoonjo liase se liiona tawe.’

⁷Mundu siina ooli nga Ayubu, oobukula khukhweundukuma khuuba nga khunywa kameechi?

⁸Owikhala alala ne babaandu baabi, ne khukeenda ne babaandu bamayaanu.

⁹Sikila aloma ali, ‘Omundu se anyoola bukhala bwosi bwosi, mu khwenaana khusiimisia Wele tawe.’

¹⁰“Khwako, baandu be limanya enywe, ndekeeresie! Wele se anyala aakhola bumayaanu tawe, Wele Owe Bunyali Bwoosi se anyala aakhola kamabi tawe.

¹¹ Aruunganga babaandu khuloondekhana ne bikholwa biabwe, lundi akhabakholele khuloondekhana ne kimiima kiabwe.

¹²Ng'ali Wele se akholanga kamabi tawe, Wele Owe Bunyali Bwoosi se afumbikhakanga bung'ali tawe.

¹³Eku, naanu owaelesia Wele bunyali bwe khuliinda sibala? Naanu owamwamiisia khu limala lioosi?

¹⁴Abanga Wele eyibaasilia busa kakewe omwene, ne khukhwebukulila kumwoyo ne kumuuya kwewe kwe bulamu khukhwama khu sibala,

¹⁵andi bibiindu bie bulamu boosi biakhafwiliile khulala, ne omundu naye aakhakoboole mwipukhuulu.

¹⁶“Waaba ne oli ne limanya, rekeeresia niko ese ndoma.

¹⁷Eku, oyo owabiila bung'ali anyala aaruka? Onyala wabiiya Wele ooli omuluungi lundi owe bunyali,

¹⁸ooboolela omwami ali, ‘Ewe se oli ne sipoli,’ ne khu baruki ali, ‘Enywe muli bamayaanu?’

¹⁹Niye se ababilanga baruki, namwe asiime baiinda lukali khukhila bataambi tawe, sikila niye owababuumba boosi.

²⁰“Mu siise sikeekhe bafwa, musilo akari, babaandu besiindukha mala bafwa, nende be bunyali barusibwao khubirira mu maani kakhali ko mundu tawe.

²¹Sikila Wele aloleelelanga chingila cho mundu, niye abonanga likeenda liewe lioosi.

²²Mbao bumali, namwe sisiilima sikali, nimwo bamayaanu banyala bekisa tawe.

²³Wele se akhoyeele aboolele omundu yesi yesi, biise nibio omundu oyo alareerwa ebweeni wewe khukhalakilwa tawe.

²⁴Abunianga be bunyali ne asilii khubamenieelesia, ne khuura babaandi mu bweyaangu bwabwe.

²⁵Sikila amanyile biikholwa biabwe, abarusiakho bunyali mu silo, ne khubabunia.

²⁶Aukuuma bamayaanu khulwe bumayaanu bwabwe ebweeni we babaandu,

²⁷sikila balekha khumuloonda niye mala baaleka chingila chewe choosi,

²⁸nio bakhola bataambi balilila Wele, mala Wele aaulila lilila liaabo babaapisibwa siibi.

²⁹Niye nasilile, naanu oonyala aamubiiya? Niye ne akisile bubweeni bwewe, naanu oonyala aamubona, ebeele ekholo namwe omundu mulala?

³⁰Akhola ario nio omundu okhamanyile Wele, namwe abo batiimianga babaandu bakharuka tawe.

³¹“Eku, aliio omundu yesi yesi owaboolela Wele ali, ‘Ese nekhaliliikhe siiukuumo se nja khukhola bubwoni lundi tawe,

³²njeyikie niko khabona tawe, naaba ne nakhola bumayaanu, se nja khukhola ndio lundi tawe?’

³³Eku, acha khuruungia khuloondekhana ne nganakani yowo? Sikila ewe wenya orobore, se ndi ese tawe, khwako ewe loma niko omanyile!

³⁴Babaandu be likesi, ne babaandu be limanya babaambulilanga ese banyala baloma bali,

³⁵‘Ayubu alomaloma mu khukorwa, ne kamakhuwa kewe se kali ke bukesi tawe.’

³⁶Andi Ayubu akhakiilwe khukhwola khu siakamo, sikila kamakobosia kewe keekesia kali niye ali nga omumayaanu.

³⁷Sikila niye atasa bureengu khu bwoni bwewe, ayiingana ne nafwe, lundi atasa khuloma kamakhuwa kewe ke khukhangaaranila Wele.”