Read lubukusu Ayu. 35 Bible Online

Ayu. 35 - lubukusu bible

Ayu. 35

¹Nio Elihu aachiililila khuloma ali,

²“Ayubu, ewe wibaasia oli lino lili lia ng'ali? Ewe oloma oli, ‘Ndi ng'ali ebweeni wa Wele,’

³Ewe ne oreeba oli, ‘Nanyoolile bukhala siina naaba ne khakholile bubwoni tawe? Nanyoolile bukhala khukhila nga abeele mba ne kholile bubwoni?’

⁴Ese ndakhukobosia, ewe ne basaale bowo.

⁵Lola likulu! Mala obone, lola kamafuumbi kaali angaaki khuukhila ewe!

⁶ Waaba ne wakhola bubwoni, aba wakholilekho sisiindu siosi siosi khu Wele omwene ku? Ne bumayaanu bwowo bwaaba ne bukucha, omukholakho siina?

⁷Waaba ne oli omuluungi, oyeeta Wele siina? Namwe siina nisio anyoola khukhwama khwiwe?

⁸Babaandu nga ewe buchuunisibwa sikila bumayaanu bwowo, ne bulayi nibwo okhola buyeeta babaandu babaandi.

⁹“Sikila bukali bwe bumiinikhi babaandu balilanga banyoole buyeeti, benya buyeeti obwo nio baone khukhwama khu bukuluumi bwe babaandu be bunyali.

¹⁰Ne kakhali se aliio aakhaba mulala oreeba ali, ‘Wele Omubuumbi wase, oanaanga kamaani siilo,

¹¹Wele okhwekisianga lukali khukhila chisaang'i che khu sibala, ne khukhukhola efwe khuba bakesi khukhila chinyuni ali waena?’ Tawe.

¹²Balila, ne kakhali se abakobosia tawe, sikila khukhwebonia khwe babaandu bamayaanu.

¹³Ng'ali Wele se aulila kamalilo ka busa tawe, Wele Omunyali Owa Bioosi se abibukulangamo lukeendo tawe.

¹⁴Sili sisiindu sikeekhe lukali ewe ne oloma oli se wanyalile khumubona tawe, lundi oli ekesi yowo eli ebweeni wewe, ne wamuliindile niye!

¹⁵Nono, sikila Wele se eekesia lirima liewe tawe, ne khuloleelesia lukali bumayaanu bwe babaandu tawe,

¹⁶Ayubu ewe otasa khulomaloma kamakhuwa ka busa, se wamanyile kamakhuwa niko olomaloma tawe.”