Read lubukusu Ayu. 36 Bible Online

Ayu. 36 - lubukusu bible

Ayu. 36

¹Nio Elihu aachiililila khuloma ali,

²“Njekhaliilikhekho atiiti, nase ndakhwekesia, sikila siili ne likhuwa nilio nenya ndome mu bweyaangu bwa Wele.

³Ndakhwekesia nga limanya liase ne lili likali, mala ndarumikhira niko manyile khukhwekesia buluungi bwa Wele Omubuumbi wase.

⁴Ng'ali niko ndikho ndoma se kali ke bubeeyi tawe, oyo ooli omwichufu mu limanya ali nawe; lundi mu bunyali bwewe, se alekhanga omwoni achiililile khumenya tawe.

⁵“Ng'ali, Wele ali owe bunyali ne se afwocholangakho omundu yesi yesi tawe, mu limanya liewe, niye ali owe bunyali bukali po!

⁶Se alekhanga bamayaanu ne bachiililila khumenya tawe, ne kakhali akholelanga babaapisibwa siibi bung'ali bwabwe.

⁷Se alekhanga khuliinda abo baali baluungi tawe, ne kakhali abamiianga buli lwoosi alala ne babaami, ne khubaelesia lukoosi.

⁸Ne babaandu baaba ne baboebwa ne kiminyololo, ne khuaambwa ne kimikoye kie buchuuni,

⁹Wele abekesia busiro bwe bikholwa biabwe, ne bubwoni bwe khukhwebonia nibwo bakholile sileka.

¹⁰Abekulanga kamaru baulile kamekisio, ne khubalaka barure mu bumayaanu.

¹¹Baaba ne baulila mala bamukholela, bamalila chindaalo chabwe mu buiinda ne kimiiko kie bulamu bwabwe mu busangaafu.

¹²Ne kakhali baaba ne bakhamuulila niye tawe, babunila mwiie, ne khufwa sikila se bali ne limanya tawe.

¹³“Bakharia Wele mu miooyo kiabwe tawe basiima khuuba ne lirima, Wele aakhababoa se bamusaba buyeeti tawe.

¹⁴Bafwa ne basiili baele, ne sisiakamo sie bulamu bwabwe siba sie chisoni chingali.

¹⁵Wele asikulanga abo baali mu buchuuni khubirira mu buchuuni bwabwe, lundi arumikhiranga butinyu bukali khubekula chimoni chabwe.

¹⁶Wele lundi akhurusia mu butinyu bukali ne khu khura abuundu alayi niio bumiinikhi bukhali tawe, ne khu khurekekhera sisiaalwa sie binulu lukali.

¹⁷“Ne kakhali luno wakhalakiilwe nga omumayaanu, bukhalaki ne bung'ali biakhuambile ewe.

¹⁸Yeliinda, okhafukiilila lirima liakhubea weundukuma, namwe bukali bwe kumuruungo bukhutiimie tawe.

¹⁹Eku, khulila khwowo khunyala khwakhurusia mu butinyu, namwe kamaani kowo koosi kanyala kakhuyeeta?

²⁰Okhekoomba siilo sioole tawe, siilo nisio babaandu barusibwanga niio bali tawe.

²¹Yeliinda! Okhakobola mu bumayaanu tawe, sikila waelesiibwe buchuuni nio oonisibwe khukhwama mu bumayaanu.

²²Lola, Wele afumisibwa lukali mu bunyali bwewe, naanu ooli omwekisia nga niye?

²³Naanu omwekisia engila yewe, namwe naanu oonyala aaloma ali, ‘Ewe wakholile kamabi?’

²⁴“Khebulila khufumia kumulimo kwewe, nikwo babaandu bemba.

²⁵Babaandu boosi bakuboone, buli mundu akuloleelela khukhwama aleeyi.

²⁶Ng'ali Wele ali omukali, ne efwe se khunyala khwamumanya tawe, bukali bwe kimiiko kiewe se bunyala bwamanyikhana tawe.

²⁷Niye okhwesanga kamame ke kameechi khukhwama khwiloba, ne khukhola kamame ke fula khukhwama mu namufweli.

²⁸Akholanga efula ne ekwa khukhwama mumafuumbi, ne khuchukha efula engali khu baandu.

²⁹Naanu onyala aamanya nga kamafuumbi ne kakeenda, namwe nga efula ne kukuma mwikulu, niio Wele amenyile?

³⁰Lola, asalanisianga lueni lwewe abuundu niio ali, ne khufuunikha chisiba che nyanja ne sisiilima.

³¹Khubirira khu fula aliindanga babaandu, ne khubaelesia siakhulia sikali.

³²Atiila lueni mu makhono keewe, mala alulaka khu khuupa abuundu niio eenya.

³³Liliatulukhana lie lueni liekesia khubaao khwewe. Ali ne libuba khu bumayaanu, khwako lirima liewe liburukha.”