Read lubukusu Ayu. 37 Bible Online

Ayu. 37 - lubukusu bible

Ayu. 37

¹“Kumwoyo kwase kuterema sikila kano, lundi kweliiya lukali ne kurura abuundu wakwo.

²Rekeeresia khukhwatulukha khwe kumumilo kwa Wele, ne likukuma liliama mu niye ne alomaloma.

³Aruma lueni khwikulu khwoosi, khukhwama lubeka lulala lwe sibala khukhwola lubeka luluundi.

⁴Kumumilo kwewe kuulukhuma enyuma walwo, akukuma ne kumumilo kwewe kwe luyali, lundi se akhiingilila chimbeni kumumilo kwewe ne kuuliilikhana tawe.

⁵Wele akukuma mu ngila eye liiukia ne kumumilo kwewe, akholanga bibiindu bikali po nibio khukhanyala khwamanya tawe.

⁶Alakanga kamaarara ali, ‘Kwa khu sibala,’ ne khu fula ali, ‘Kwa lukali.’

⁷Emianga kimilimo kia buli mundu, nio babaandu boosi bamanye kimilimo kiewe.

⁸Chisaang'i che mundaa chingila niio chekisanga, ne khuuba busa mu mabina kaacho.

⁹Sisiifuusia siamila siafubo, ne bunyifu khukhwama mu mbeo eye bunaswa.

¹⁰Kumuuya kwa Wele kureerao eparaafu, lundi kukaluukhasia kameechi ne kaba nga kamaarara.

¹¹Echusia kamafuumbi kamasiro ne bunyifunyifu, kamafuumbi kasalanisia lueni lwewe.

¹²Bioosi bibotookhelela khukhola koosi, buli abuundu mu sibala sioosi, khuloondekhana nga Wele ne abilaka.

¹³Wele akhola lilienya liewe khu sibala, libeele lie khuukuuma babaandu, namwe khubekesia busiime bwewe.

¹⁴“Ee Ayubu, rekeeresia lino, sila mala wibaasie bibiindu bie khuukia nibio Wele akhola.

¹⁵Eku, ewe omanyile nga Wele abilakanga, ne khukhola lueni lwe lifuumbi liewe lukhosia?

¹⁶Eku, ewe omanyile nga kamafuumbi ne kakelakelanga khwikulu, kimilimo kie khuukia kio oyo oomanyile buli siindu?

¹⁷Ewe oweulila oli wefwarire chingubo chireera lukesi lukali, biise nibio embeo ebilile euucha khukhwama ebunafubo?

¹⁸Eku, ewe onyala wachalaasia likulu nga Wele ne khulikhola lilume nga sikioo sie sibia?

¹⁹Kwekisie nilio khukhaboolele Wele, sikila khuli mu siilima, se khumanyile nisio khuloma tawe.

²⁰Eku, naanu oonyala aamuboolela niye ali, nenya khulomaloma? Naanu khuno owenya khuuba mu butinyu?

²¹“Ne luno babaandu se banyala baloleelela mu buwaanga, ne bukhosia khwikulu, embeo ne euchile yarusiao kamafuumbi tawe.

²²Esahabu eemelamela yamila ebunaswa, Wele efwarire luyali lwe khuukia.

²³Omunyali Owa Bioosi, niye khukhanyala khwamwimbiia tawe, ali omukali mu bunyali ne mu bung'ali, ali ne buluungi bukali ne se afuumbikhanga bung'ali tawe.

²⁴Khwako babaandu bamuria niye, se abukulaanga lukeendo mu mundu yesi yesi ooli ne sileka tawe.”