Read lubukusu Ayu. 38 Bible Online

Ayu. 38 - lubukusu bible

Ayu. 38

¹Nio Omwami Wele aaboolela Ayubu khukhwamila mu siifuusia ali,

²“Ewe naanu oomaliisia likaambila liase mu makhuwa kakhali ke likesi tawe?

³Yirekekha nga omundu owe siseecha, ese nja khu khureeba, mala ewe ungobosie.

⁴“Waaba waena ne ndao kimisiingi kie sibala? Waaba ne oli ne limanya, mboolele.

⁵Naanu owakhalaka buleeyi ne bukhiikha bwasio? Okhoya obe ne omanyile! Namwe naanu owakololosia luusia khupiima sibala?

⁶Eku, kimisiingi kiasio kiema khu siina namwe naanu owakhwiikha enjeko yasio

⁷nga ching'enieesi cha sulwe ne chaba chimbila alala, mala babaana ba Wele bayokela khulwe khoyo?

⁸ Naanu owakhiingilila enyanja khukhwichula sibala, nga kameechi kechula khukhwama mu chisiba chayo?

⁹Ese niise owafuunikha enyanja ne kamafuumbi, mala nakibotookhelesia sisiilima sikali.

¹⁰Naraao chinjakha che nyanja, ne khukikhiingilila ne bikiingi ne kimiliango,

¹¹nakiboolela ndi, ‘Okhabira ano tawe! Ne kamaleesi kowo ke kamaani kaakama ano.’

¹²“Eku Ayubu, ewe mu bulamu bwowo wakhalakilakho kumutikhinyi kubeo? Wakholakho makhelebeende liamanya biise biako,

¹³nio katiile sibala ne chinjika chako, ne khutimania bamayaanu be mu sibala?

¹⁴Sibala sikaluukhananga ne khuuba ne rangi nga engubo, sikaluukhana sifwaana nga liloba lio mubuumbi ne likaluukhasibwaanga khuuba kumuuri.

¹⁵Buwaanga se buaanwa khu bamayaanu tawe, ne kumukhono nikwo basuta khu khuupa babaandu kulafunwa.

¹⁶“Eku, ewe wengilakho mu fututusie che khu sibale sie nyanja?

¹⁷Eku, ewe wekesibwakho bilibwa bie lifwa, namwe bilibwa bie sisiilima sikali po?

¹⁸Eku, omanyile bubalaayi bwe sibala? Waaba ne omanyile koosi kano, mboolele.

¹⁹“Ewe omanyile niio buwaanga bumenyile? Omanyile niio sisiilima siamanga,

²⁰nio osiyile niio simenyanga, ne khumenieelesia chingila chiicha niio simenyile?

²¹Ewe okhoyeele omanye, sikila beele wasaalwa khale, ne chindaalo chowo chili chingali lukali!

²²“Eku, wengilakho mwibiikhilo lie paraafu, namwe wabonakho libiikhilo lie kamaarara,

²³nibio nabibiikha khulwe biise bie butinyu, ne chindaalo che khu khuupana ne liie?

²⁴Ngila siina eecha abuundu niio buwaanga bururira, namwe abuundu niio ekhuungu eye bukwe yamanga nio esalaanila khu sibala?

²⁵“Naanu owaarura lulwaakha nilwo efula namatoa eloonda, namwe engila eye lueni,

²⁶khureera efula khu sibala abuundu niio omundu akhamenyile tawe, mu siangalaamwe, siikhalimo omundu tawe,

²⁷khuchukhiilila kamaloba kamoomu lundi kakhali ke ngakha tawe, ne khukhola liloba limelemo bunyaasi?

²⁸Eku, efula eli ne raraawe, namwe naanu osaalile kamame ke luume?

²⁹Eku, ebarafu yaama munda mwa naanu? Naanu owasaala kamaarara ke mwikulu?

³⁰Kameechi kaandalala ne kaba nga libaale, ne khungaaki khwe nyanja khuambaana sikila bunyifu bukali.

³¹ “Loleelela bipupu bie ching'enieesi, eku, onyala waboa kiminyololo kia Kilimia, namwe wakangulula buborore bwa Orioni?

³²Eku, onyala warangirira ching'enieesi cha Masaroti mu biise biacho, namwe warangirira ling'u ne ching'ana chalio ku?

³³Eku, omanyile kamalaka karumikhirwa khuruka likulu? Eku, onyala walirekekhera buruki bwalio khu sibala?

³⁴“Onyala waboolela kamafuumbi ne kumumilo kwe angaaki, nio kakwisie efula engali ekhufuunikhe?

³⁵Eku, ewe onyala waruma chimbeni, mala chiche, nio chikalukhe niio oli mala chikhuboolele chili, ‘Khuli ano?’

³⁶Naanu owaelesia enyuni elaangwa Ibisi limanya lie khumanya khukhwichula khwe luluuchi lwa Naili, namwe owaboolela etaaywa bukesi bwayo?

³⁷Naanu ooli omukesi onyala aabala kamafuumbi? Naanu oonyala eenamisia chioochwa che kameechi che mwikulu,

³⁸nio lufuumbi mu sibala lwebuusie, ne liloba nalio liiambaane liekhole kamatosi?

³⁹“Onyala waaya khuelesia etalang'i siakhulia, namwe wekusia ching'ana chayo

⁴⁰ne chekisile mu mabina kaacho, namwe ne chilindiiliile abuundu niio chekisile?

⁴¹Naanu oelesianga enyefwe siakhulia siayo, kamaana kaayo ne kalilila Wele, ne kayiiyayiiya sikila khutaamba siakhulia?”