Read lubukusu Ayu. 39 Bible Online

Ayu. 39 - lubukusu bible

Ayu. 39

¹“Eku, ewe omanyile biise nibio chimbusi che mu bikulu chisaalanga? Namwe wabonakho chikicheu ne chisaala ku?

²Eku, onyala wabala kimieesi nikio chikekaanga nio chisaale, namwe omanyile siise nisio chisaalilamo?

³“Nga ne chichochomala khusaala ching'ana chabwe, lundi nga ne chisaala ching'ana chacho?

⁴Ching'ana chacho chichoa ne chiba ne kamaani, chikhula ne chili mundaa omwo, nio chilekha chimaawe ne se chikobola lundi tawe.

⁵“Naanu owaelesia chipunda mulia bulekhuule? Naanu owa chikangulula chikeende busa?

⁶Ese nachielesia sichiimi sibe mungo mwacho, mala sibala sia chumbe sibe niio chimenya?

⁷Chimenya sinaao khukhwama mu luyoka lwe mu lukoba, se chiulila luyoka lwe khuchikhosia kimilimo tawe.

⁸Chiyiiya mu bikulu, nimwo chiimilisia siosi siili sibisi chilie.

⁹“Eku, emboongo enyala yakhukholela ewe? Enyala yakona mwitaala liowo?

¹⁰Onyala wakiboa kumukoye mala yakhulimila, namwe wakikhola yakhweesa embako?

¹¹Onyala wakiikina sikila kamaani kamakali kaayo, namwe, onyala wakilekhela kumulimo kwowo?

¹²Eku, onyala wakiikina ekobole, ne khureera bikeswa niio bauulilanga?

¹³“Chindaa che nyefwe chipapara lukali, ne kakhali se enyala yapurukha nga khooro tawe?

¹⁴Sikila enyefwe elekha kamaki kaayo khwiloba, nio kanyoole bukhafu bwe asi,

¹⁵ne kakhali yibilila eli sikele sinyala siakaara, lundi yibilila eli esaang'i eye mundaa enyala yakaswalakilila.

¹⁶Enyefwe ekuluumianga lukali kamaana kaayo oli manya ne kakhali kakaayo tawe, kumulimo kwayo kwakhoonekha, se yeendekhelelakho tawe.

¹⁷Sikila Wele aakikhola yebilila limanya liayo, lundi se aakielesiakho bukesi tawe.

¹⁸Ne kakhali ne erakikha khutima, echekha aakhaba efarasi alala nende ookitimia.

¹⁹“Eku, Ayubu, ewe niwe owaelesia chifarasi kamaani kacho, mala wachira kamayeeye mu makosi?

²⁰Eku, ewe niwe ookholanga efarasi ne esunasuna nga esike? Ekhola luyoka lukali lwe khuukia!

²¹Ebuya liloba mu matooma ne kamaani, etima khucha niio liie liili ne kamaani kaayo koosi.

²²Echekheelela busa buri, se yesiindukha tawe; lundi se yiila enyuma ne eli mwiie tawe.

²³Bulwaani bwo oyo ookitimia bwekhupanakho lukali ne khumeniuukhila mu buwaanga bwe nyanga.

²⁴Chirwandukha chimbilo mu burafu ne lirima, ekhoombi ne yipa, se chiima cheoleelesia tawe.

²⁵Ekhoombi ne yipa, chikhola luyoka, chiunyilisia liie ne chili aleeyi, chiulila endiri eye bakhulu be banamae ne bayokela khurusia lilaka.

²⁶“Eku, kisiilili eika khupurukha khukhwama khwiwe, ne khupurukha khuucha siafubo?

²⁷Eku, efuruusi epurukha angaaki lukali sikila lilaka liowo, ne khukhwombakha siiswi siayo angaaki mu bikulu?

²⁸Ekhola lulwanda bukono bwayo, ne bubwooki bwe kamabaale nibwo bubwilukhilo bwayo.

²⁹Ne eli ebweeneyo, elola ebone nisio enyala yaatiila yaalia, chimoni chayo chisibonela aleeyi.

³⁰ Kamaana kaayo kakhuna kamafuki, ne niio sisiindu sifwiile sili, ao niio yosi eli.”